އިޒްރޭލުން ފަލަސްތީނުގެ ޢައްޒާއަށް ދޭ ހަމަލާތައް ހުއްޓާލުމާ އެކު ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ. މި ނިންމުމާ ގުޅިގެން އުފާ ފަޅުކުރައްވާ ރައީސް އެކްސްގައި ކުރެއްވި ޕޯސްޓެއްގައި ވަނީ ހަނގުރާމައަށް 15 މަސް ފަހުން ހަމަލާތައް ހުއްޓާލަން އެއްބަސްވި ޚަބަރު އަޑުއިވުމުން ހިތްހަމަޖެހޭ ކަމަށެވެ. https://x.com/MMuizzu/status/1879609680680354286?t= އަދި މި ނިންމުމަށް ވާސިލުވާން އެހީތެރިވެދިން ގައުމުތައް ކުރި މަސައްކަތް ރާއްޖެއިން ބަލައިގަންނަ ކަމަށް ރައީސްގެ ޕޯސްޓުގައި ވެއެވެެ. މި ޕޯސްޓުގައި ވަނީ ހަނގުރާމަ ހުއްޓާލުން ދެމެހެއްޓުމަށާއި، ހިޖުރަކޮށްފައިވާ މީހުން އެނބުރި ގައުމަށް އާދެވޭކަން ކަށަވަރުކޮށް އިންސާނީ އެހީ ފޯރުކޮށްދިނުމަށް ކަމާގުޅުންހުރި ފަރާތްތަކަށް ގޮވައިލާފައެވެ. އަދި ފަލަސްތީނު އަލުން އާބާދުކުރުމަށް ބޭނުންވާ ސަޕޯޓު ވަގުތުން ފޯރުކޮށްދިނުމަށް ވެސް ގޮވައިލާފައި ވެއެވެ. އިޒްރޭލުން ފަލަސްތީނުގެ ޢައްޒާއަށް ދެމުންގެންދާ ހަމަލާތައް ހުއްޓާލުމަށާއި ހަމާސްއިން ރަހީނުކޮށްފައިވާ އިޒްރޭލު މީހުން މިނިވަން ކުރަން ދެފަރާތުން އެއްބަސްވެ އެކަން އިއުލާނުކޮށްފަިއ ވަނީ މިރޭގެ ވަގުތެއްގައެވެ. އެމެރިކާގެ އިންތިޚާބީ ރައީސް ޑޮލަންޑް ޓްރަމްޕް ވެސް ވަނީ މިކަން އިއުލާނު ކުރައްވައި، މަރުހަބާ ވިދާޅުވައެވެ. ޓްރަމްޕް އިއުލާން ކުރެއްވިގޮތުގައި އިސްރާއީލުން މިކަމަށް އެއްބަސްވެފައިވަނީ އެމެރިކާ، މިސްރު އަދި ގަތަރު މެދުވެރިއަކަށް ވެގެން އިސްރާއީލާއި ހަމާސް ޖަމާއަތުން ނުސީދާ ގޮތެއްގައި ގަތަރުގެ ވެރިރަށް ދައުހާގައި ކުރިޔަށްދިޔަ ވާހަކަތަކުގައެވެ. މި ހަމަލާތައް ނިންމާލަން އިޒްރޭލުން އެއްބަސްވެފައި ވަނީ ހަނގުރާމައަށް 15 މަސް ވީފަހުންނެވެ. މި ހަނގުރާމަ ފަށާފައި ވަނީ، 2023ވަނަ އަހަރުގެ އޮކްޓޯބަރު މަހުގެ ހަތްވަނަ ދުވަހު ހަމާސްއިން ދިން ކުއްލި ހަމަލާއަކަށް ރައްދު ދިނުމުގެ ގޮތުންގެވެ. ޢައްޒާގެ ހެލްތު މިނިސްޓްރީގެ ތަފަސްހިސާބުތައް ދައްކާގޮތުން މި ހަނގުރާމައިގައި ޢައްޒާގެ 46،000އަށްވުރެ ގިނަ މީހުން ޝަހީދުކޮށްލަފައި ވެއެވެ. މީގެ ކުރިން ވެސް މިފަދަ އެއްބަސްވުންތައް އިޒްރޭލުން ވަނީ އެކުލަވާލާފައެވެ. ނަމަވެސް އިޒްރޭލުން އެ އެއްބަސްވުންތަކަށް ތަބާވެފައެއް ނުވެއެވެ.