ސްޕެނިޝް ލަލީގާގައި އެފްސީ ބާސެލޯނާ އާއި ވެލެންސިއާ ބައްދަލުކުރި މެޗު ތަފާތު ބޮޑު ނަތީޖާ އަކުން ބާސާ ކާމިޔާބު ކޮށްފިއެވެ. ބާސާގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ހަތް ލަނޑު އެއް ލަނޑުގެ ނަތީޖާ އަކުންނެވެ. ބާސާގެ ފަރާތުން މޮޅު ކުޅުމެއް ފެނިގެންދިޔަ މިމެޗުގެ ފުރަތަމަ ލަނޑު ޖަހާ ބާސާއިން ލީޑު ނަގާފައިވަނީ މެޗުގެ ތިންވަނަ މިނެޓުގައެވެ. މިލަނޑު އެޓީމަށް ކާމިޔާބު ކޮށްދިނީ ފްރޭންކީ ޑި ޖޮންގްއެވެ. މިލަނޑު ޖެހިތާ ފަސްމިނެތް ފަހުން އެޓީމުގެ ލީޑު ފުޅާކޮށްދިނީ ފެރާން ޓޯރޭޒްއެވެ. ބާސާގެ ތިންވަނަ ލަނޑު މެޗުގެ 14ވަނަ މިނެޓުގައި ކާމިޔާބު ކޮށްދިނީ ރަފީނިއާއެވެ. އަދި މެޗުގެ 24ވަނަ މިނެޓާއި ފުރަތަމަ ހާފުގެ އިތުރު ވަގުތުގެ ހަތަރުވަނަ މިނެޓުގައި ފާމިން ލޯޕޭޒް ކާމިޔާބު ކޮށްދިން ދެ ލަނޑާއެކު ބާސާއިން ފުރަތަމަ ހާފު ނިންމާލީ ފަސް ލަނޑުގެ ލީޑަކާއެކުއެވެ. މިމެޗުގައި ބާސާގެ ހަވަނަ ލަނޑު މެޗުގެ 66ވަނަ މިނެޓުގައި ކާމިޔާބު ކޮށްދިނީ ރޮބަޓް ލެވަންޑޯސްކީއެވެ. އަދި ބާސާގެ ފަހު ލަނޑަކީ ވެލެންސިއާގެ ސެޒާ ޓަރޭގާ އަތުން ބައި ކޮޅަށް ވަން ލަނޑެކެވެ. މިމެޗުގައި ވެލެންސިއާއިން ކާމިޔާބު ކުރި ހަމައެކަނި ލަނޑު އެޓީމަށް ކާމިޔާބު ކޮށްދިނީ 59ވަނަ މިނެޓުގައި ހޫގޯ ޑޫރޯއެވެ. މިކާމިޔާބީއާއެކު ބާސާ މިވަނީ ލަލީގާގައި ހަތަރު މެޗަށްފަހު ފުރަތަމަ ފަހަރަށް މެޗަކުން މޮޅުވެފައެވެ. އަދި މިހާރު އުޅެނީ 42 ޕޮއިންޓާއެކު ތާވަލްގެ ތިންވަނައިގައެވެ. އަދި ވެލެންސިއާ އުޅެނީ 16 ޕޮއިންޓާއެކު ތާވަލްގެ 19 ވަނައިގައެވެ. މިމުބާރާތުގައި ކުޅުނު އެހެން މެޗުތަކަށް ބަލާލާއިރު ރަޔޯ ވަޔަކާނޯ އާއި ޖިރޯނާ ބައްދަލުކުރި މެޗު ދެ ލަނޑު އެއް ލަނޑުން ވަޔަކާނޯ ކާމިޔާބު ކޮށްފައިވާއިރު ގެޓާފޭއާއި ރެއާލް ސޮސިއެޑާޑް ބައްދަލުކުރި މެޗު ތިން ލަނޑު ސުން ލަނޑުން ކާމިޔާބު ކޮށްފައިވަނީ ގެޓާފޭއެވެ. އަދި އެތުލެޓިކް ބިލްބާއޯ އާއި ލެގާނޭސް ބައްދަލުކުރި މެޗު ނިމުނީ ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ.