މާފުށީ ޖަލުގައި ތިބި ގައިދީންނަށް ފޯނާއި މަސްތުވާތަކެތި ހޯދައިދީ، ނަހަމަ ގޮތުގައި އެތައް ފައިސާއެއް ހޯދި މައްސަލާގައި ޝަރީއަތް ނިމެންދެން ބަންދު ކޮށްފައިވާ ހަތަރު މީހަކު ބަންދުން ދޫކޮށްލަން ދައުލަތުން ކްރިމިނަލް ކޯޓުގައި މިއަދު އެއްބަސްވެއްޖެ އެވެ.
ޖަލަށް ފޯނާއި ޑްރަގްސް ވެއްދި މައްސަލާގައި އޮފިސަރުންތަކެއް ހައްޔަރުކުރީ މިދިޔަ ޖޫން މަހުގެ 28ގައި ކަމަށްވާއިރު، މީގެތެރޭގައި 13 މީހަކު ހިމެނެ އެވެ. މީގެތެރެއިން ފަސް މީހެއްގެ މައްޗަށް ވަނީ ދައުވާ އުފުލާފަ އެވެ. އެ އޮފިސަރުންނަކީ:
1. ޖިނާޙް އަބްދުއްރަޙީމް، ރ. އުނގޫފާރު، އައިވަރީހައުސް
2. އަލީ ހިޝާމް، ކ. މާފުށި، ބީޗްހައުސް،
3. އަލީ ނާޒިމް، ހދ. ނޭކުރެންދޫ، ތަރާނާގެ
4. މުހައްމަދު ފަތޫހު ފަތުހުﷲ، ގއ. ވިލިނގިލި، ކުއްޅަވައްގެ
5. އަލީ އަސްފާގް، ނ. ލަންދޫ، ކާމިނީގެ
އޭގެ ތެރެއިން ފަތޫހު ފިޔަވައި ދެން ތިބި އެންމެން އަދިވެސް ތިބީ ބަންދުގަ އެވެ.
ބާކީ ތިބި ހަތަރު މީހުން ބަންދުން ދޫކުރަން އެދި އެ މީހުންގެ ފަރާތުން ހުށަހެޅުމުން ކްރިމިނަލް ކޯޓުގައި ބޭއްވި އަޑުއެހުމުގައި ދައުލަތުގެ ވަކީލުން ވަނީ އެ މައްސަލާގައި ހައްޔަރުކުރި އެހެން މީހަކު ކްރިމިނަލް ކޯޓުން ބަންދުކުރީ އިހްތިސާސެއް ނެތި، ގާނޫނާ ހިލާފަށް ކަމަށް ހައި ކޯޓުން ނިންމާފައިވާތީ، މިހާރު ބަންދުގައި ތިބި މީހުން ވެސް ބަންދުން ދޫކޮށްލަން ޖެހޭ ކަމަށެވެ. ނަމަވެސް މައްސަލައިގެ ގޮތުން އެ މީހުންގެ ޕާސްޕޯޓް ހިފެހެއްޓުމަށާއި އިތުރު ޝަރުތުތަކެއް ކުރަން ދައުލަތުން އެދުނެވެ.
މި މައްސަލަ ބައްލަވާ ގާޒީ ވަނީ އެމީހުންގެ ބަންދާ މެދު ނިންމާ ނިންމުން ފަހުން އިއުލާންކުރާނެ ކަމަށް ވިދާޅުވެފަ އެވެ.