ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢުގެދަށުން އެއަރޕޯޓް އިމާރާތްތަކުގެ ކޮންކްރީޓް މަސައްކަތްތައް ނިމުމާ ގާތްވެފައިވާކަމަށާއި ފިނިޝިން މަސައްކަތްތައް ފެށުމަށް ތައްޔާރުވަމުން އަންނަކަމަށް ރީޖަނަލް އެއަރޕޯޓްސް ކުންފުނީގެ މެނޭޖިން ޑިރެކްޓަރ އަޙުމަދު މުބީން ވިދާޅުވެއްޖެއެވެ.
ހަނިމާދޫ އެއަރޕޯޓް ތަރައްޤީކުރަނީ އަހަރަކު 1.3 މިލިއަން ފަތުރުވެރިންނަށް ޚިދުމަތް ދެވޭ ފެންވަރަށެވެ.
ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢާ ގުޅޭ މަޢުލޫމާތު ހިއްސާކުރައްވަމުން ރީޖަނަލް އެއަރޕޯޓްސް ކުންފުނީގެ މެނޭޖިން ޑިރެކްޓަރ އަޙުމަދު މުބީން ވިދާޅުވީ، ހަނިމާދޫ އެއަރޕޯޓްގެ މަސައްކަތްތައް ޓައިމްލައިނާ އެއްގޮތަށް ކުރިއަށްދާކަމަށެވެ. މުބީން ވިދާޅުވީ އެއަރޕޯޓް މަސައްކަތްތަކުގެ ތެރެއިން އައު ރަންވޭގެ ހުރިހާ މަސައްކަތްތަކެއްހެން މިހާރު ނިމިފައިވާކަމަށެވެ. އަދި ޓަރމިނަލް އިމާރާތުގެވެސް ކޮންކްރީޓް މަސައްކަތްތައް ނިމި، ފިނިޝިންއާ ގުޅުންހުރި މަސައްކަތްތައް ފެށުމަށް މިހާރު ތައްޔާރުވެފައިވާކަމަށެވެ.
ރީޖަނަލް އެއަރޕޯޓް އެމްއޭސީއެލްގެ ދަށަށް ބަދަލުކުރުމަށް ސަރުކާރުން މަސައްކަތް ކުރަމުންދާއިރު، މި މަޝްރޫޢުގެ މަސައްކަތްތައް ކުރިއަށްގެންދިއުމުގައި އެމްއޭސީއެލްގެ މަޝްވަރާވެސް ހޯދަމުންދާކަމަށް މުބީން ވިދާޅުވިއެވެ.
"ކުރިން ޕްލޭންކުރީ އަންނަ އަހަރުގެ މަރޗްއަށް މުޅި މަޝްރޫއު ނިންމަން. ނަމަވެސް އެކި ސަބަބުތަކާއެކު މިހާރު އައު އެއަރޕޯޓް ހުޅުވުން ޖުލައިއަށް ވަނީ ފަސްކޮށްފައި. މިހާރު ބޮޑެތި މަސައްކަތްތައް ނިމި، ފިނިޝިން މަސައްކަތްތަކާ ދިމާލަށް މިދަނީ. ކުރިއަށް އޮތްތާނގައި އުތުރުގެ މައި އެއަރޕޯޓަށް ވާނީ މި އެއަރޕޯޓް." ރީޖަނަލް އެއަރޕޯޓްސްގެ މެނޭޖިން ޑިރެކްޓަރ މުބީން ވިދާޅުވިއެވެ.
މުބީން ވިދާޅުވީ މި އެއަރޕޯޓާއެކު އެންމެ ބޮޑު ލުޔަކަށް ވާނީ، ވެލާނާ އިންޓަރނޭޝަނަލް އެއަރޕޯޓަށް ބާރުބޮޑުވުމުގެ މައްސަލައަށް ލިބޭ ހައްލުކަމަށެވެ.
"އިންޑިއާ ލަންކާފަދަ ޤައުމުތަކުން އަންނަ ފަތުރުވެރިން މާލެއަށް ނުގޮސް ޑައިރެކްޓް ފްލައިޓްތައް ހަނިމާދުއަށް ފަށާނަން. އެއަރލައިންތަކަށްވެސް އަގު ހެޔޮވާނެ." ރީޖަނަލް އެއަރޕޯޓްސްގެ މެނޭޖިން ޑިރެކްޓަރ މުބީން ވިދާޅުވިއެވެ.
ހަނިމާދޫ އެއަރޕޯޓް ތަރައްޤީކުރުމުގެ ޢަމަލީ މަސައްކަތް ފެށީ 2023ވަނަ އަހަރުގެ ޖެނުއަރީމަހުއެވެ. މި މަޝްރޫޢު ކުރިއަށްގެންދަނީ އިންޑިއާގެ ޖޭއެމްސީ ޕްރޮޖެކްޓްސްއާއި ހަވާލުކޮށްގެންނެވެ. ރަންވޭއާއި ޓަރމިނަލްގެ އިތުރުން، ޔުޓިލިޓީ ބިލްޑިންގް، ފިއުލް ފަރމް އަދި އެއަރޕޯޓް ޖެޓީގެ މަސައްކަތްވެސް ކުރިއަށްދެއެވެ.
ހަނިމާދޫ އެއަރޕޯޓް ތަރައްޤީކުރުމުގެ ދެވަނަ ފިޔަވަހީގެދަށުން ސީޕްލޭން ޓަރމިނަލެއް ތަރައްޤީކުރުމަށް ވަނީ ހަމަޖެހިފައެވެ.