ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރާއްޖެ އަށް ދީފައިވާ ސަސްޕެންޝަނުން ލުޔެއް ދިނުމާ އެކު، ވާދަކުރި ފުރަތަމަ ތިން މުބާރާތުގައި ވާދަކޮށް، ރިވައިވަލް ސްޕޯޓްސްގައި ހިމެނޭ ގައުމީ ބެޑްމިންޓަން ޓީމުގެ ކުޅުންތެރިން ތިން މުބާރާތުން ޖުމްލަ އެކު ހަތް މެޑަލް ހޯދައިފި އެވެ.
މިދިޔަ ސެޕްޓެމްބަރު މަހު، ބީޑަބްލިއުއެފް އިން ވަނީ ބައިނަލްއަގުވާމީ މުބާރާތްތަކުގައި ރާއްޖޭގެ ކުޅުންތެރިންނަށް ކުޅެވޭ ގޮތަށް ސަސްޕެންޝަނަށް ލުއިތަކެއްް ދީފަ އެވެ.
އޭގެ ފަހުން، ރިވައިވަލް އިން ވާދަކޮށްފައިވާ ބީޑަބްލިއުއެފް އިން ރުހުންދީފައިވާ ތިން މުބާރާތަކީ، ޒެމްބިއާ އިންޓަނޭޝަނަލް އާއި ބޮޓްސްވާނާ އިންޓަނޭޝަނަލްގެ އިތުރުން މިއަދު ނިމުނު، އަކުއާސްޕްރިންގް ސައުތު އެފްރިކާ އިންޓަނޭޝަނަލް އެވެ.
މި މުބާރާތްތަކުގައި ރިވައިވަލް ސްޕޯޓްސްގެ ހައި ޕާފޯމަންސް ޓީމުގެ ހަ ކުޅުންތެރިއަކު ފެނިގެންދިޔަ އެވެ. އެއީ، ނިބާލް އަހުމަދު، ޒަޔާން ޒަކީ، ފާތިމަތު ނަބާހާ (ނަބާ)، އައިމިނަތު ނަބީހާ (ނަބީ)، ހަަސަން ޒަޔާން މުހައްމަދު، އަދި ހައިޝަމް އިބްރާހިމް އަލީ އެވެ. ރިވައިވަލްގެ ކޯޗު، ނަޝްފާން މުހައްމަދު ވެސް ޓީމާ އެކު ދިޔައިރު، ޓީމުގެ މެނޭޖަރަކަށް ޝާނިފް އެވެ.
ޒެމްބިއާ އިންޓަނޭޝަނަލް މުބާރާތުގެ މިކްސް ޑަބަލްސް އިން ޒަޔާން އާއި ނަބާގެ ޕެއާ އިން ރަން މެޑަލާއި އަންހެން ޑަބަލްސް އިން، ނަބީ އާއި ނަބާގެ ޕެއާ އިން ރިހި މެޑަލް ހޯދި އެވެ. ބޮޓްސްވާނާ އިންޓަނޭޝަނަލް އިން، އަންހެން ޑަބަލްސް އިން ނަބާ އާއި ނަބީގެ ޕެއާ އިން ރިހި މެޑަލެއް ހޯދިއިރު، މިކްސް ޑަބަލްސް އިން ޒަޔާން އާއި ނަބާގެ ޕެއާ ވަނީ ލޯ މެޑަލެއް ހޯދައިފަ އެވެ.
މިއަދު ނިމުނު ސައުތު އެފްރިކާ އޯޕަންގައި، ނަބާ ވަނީ އަންހެން ސިންގަލްސް އިން ލޯ މެޑަލެއް ހޯދައިފަ އެވެ. އަދި، މިކްސް ޑަބަލްސް އިން ޒަޔާން އާއި ނަބާގެ ޕެއާ އިން ލޯ މެޑަލެއް ހޯދިއިރު، މި ތިން މުބާރާތުގައި ވެސް ނަބާ އާއި ނަބީގެ ޕެއާ އިން އަންހެން ޑަަބަލްސްގައި ލިބިފައިވަނީ ރިހި މެޑަލް އެވެ.
ތިން މުބާރާތުގެ ފައިނަލުގައި ވެސް ނަބީ އާއި ނަބާގެ ޕެއާ ބަލިވީ ދެކުނު އެފްރިކާގެ ޕެއާ އެއް ކަމަށްވާ ދެކުނު އެފްރިކާގެ އެމީ އެކަމަން އާއި ޖޮހަނީޓާ ޝޮލްޓްޒް އަތުންނެވެ. ޒެމްބިއާ މުބާރާތުގެ ފައިނަލުގައި، 21-16، 21-14 އިން ބަލިވިއިރު، ދެން ކުޅުނު ދެ ފައިނަލުގައި ވެސް ނަތީޖާ ނެރުނީ ތިން ސެޓަށް ގޮސްގެންނެވެ. އެ ގޮތުން، ބޮޓްސްވާނާގައި ސެޓުތައް ދިޔައީ، 21-19، 13-21 އަދި 15-21 އިންނެވެ. އަދި، މިއަދު، ދެކުނު އެފްރިކާގައި ކުޅެގެން ސެޓުތައް ދިޔައީ، 09-21، 26-24 އަދި 14-21 އިންނެވެ.