ޒަވާޖީ ޙަޔާތެއްގައި ދިރިއުޅެމުން ދަނިކޮށް ބައިވެރިޔާގެ ކިބައިން ތިމާގެ ހިތް ނުރުހޭފަދަ ކަންތައްތަކެއް ފެނުމުން އެވާހަކަ ބުނެފިނަމަ ތިމާއާއި ވަކިވެދާނެކަމުގެ ބިރަށް ނުބުނެ އެބަ ތިބެއެވެ.  
ފިރިމީހާގެ ކިބައިން އެފަދަ ކަމެއް ފެނުމުން އަނބިން ނުބުނެ ތިބެނީ އަނބިންގެ ނިކަމެތިކަން ބޮޑުވުމުންނެވެ. ގިނަފަހަރު ފިރިން ނުބުނެ ތިބެނީވެސް އަނބިންނަށްވުރެ ފިރިން ނިކަމެތިވީމައެވެ. އަދި ލޯބިވާވަރު ބޮޑުކަމުން ބައިވެރިޔާ ގެއްލެން ބޭނުން ނުވުންވެސް ސަބަބެއް ކަމުގައި ހިމެނެއެވެ. އަދި މިނޫންވެސް ސަބަބެއް އޮވެދާނެއެވެ.  
އެކުވެރި މިތުރުންނޭވެ! ކިތަންމެ ބޮޑަށް ލޯބިވީނަމަވެސް، އަދި ތިމާގެ ހުރި ނިކަމެތިކަން ޤަބޫލުކުރެވުނަސް ދައްކަންޖެހޭ ވާހަކަ ދައްކާށެވެ. ބުނަންޖެހޭ ވާހަކައެއް ބުނާށެވެ. ނޫންނަމަ އެކަން އޮންނާނީ ސިކުނޑީގައި ބޮޑު ބުރައެއްގެ ގޮތުގައެވެ. ހިތަށް ދާނީ އަނިޔާ ލިބެމުންނެވެ. ނަތީޖާއަކީ ވޭން އުފުލަންޖެހުމެވެ.  
އެއްވެސް މީހަކަށް ހިތްދަތިކަމުގައި މުޅި ޢުމުރު ހޭދައެއް ނުކުރެވޭނެއެވެ. އެކަންކުރަން އުޅެފިނަމަ ބޮޑު ބައްޔަކަސް އެކަންވެގެންދާނެއެވެ. ބުނަންޖެހޭ އެއްޗެއް ބުނުމުން އެއީ ކުށެއް ކަމަށް ބަލައި ދޫކޮށްލި ނަމަވެސް އަދި ވަކިވާންޖެހުނަސް ބުނަންޖެހޭ އެއްޗެއް ބުނާށެވެ. ދޫކޮށްލިނަމަވެސް ވަކިވިނަމަވެސް ދުވަސްކޮޅަކުން އެކަމުން އަރައިގްނެވޭނެއެވެ. އިން ޝާ ﷲ
 
- އަލަފް / މިއަދުނޫސް