ފެނަކަ ކޯޕަރޭޝަނާއި ސްޓެލްކޯއިން މާލެ އާއި އަތޮޅު ތަކުގެ ދެމުންގެންދާ ކަރަންޓުގެ އަގު ހެޔޮކޮށްފި އެވެ.
ިނޫސްވެރިންނާ މިއަދު ބައްދަލުކުރައްވާ އެންވަޔަރަމަންޓް މިނިސްޓަރު ވިދާޅުވީ ކަރަންޓުގެ އަގު 10 ޕަސަންޓާއި 15 ޕަސަންޓަށް ހެޔޮކުރަން ނިންމާ އަންނަ މަހުގެ ބިލު މިބަދަލާއެކު ހަދަން ނިންމާފައިވާ ކަމަށެވެ.
ތޯރިގު ވިދާޅުވީ ކަރަންޓް އަގަށް ބަދަލު ގެނައީ ތެލުން ނަގާ ޑިއުޓީ ފަސް ޕަސަންޓަށް ކުޑަކުރުމުން ކަރަންޓްގެ ހިދުމަތްދޭ ކުންފުނިތަކަށް ތެޔޮ ގަންނަން ލިބޭ އަގު ހެޔޮވުމުން ކަމަށެވެ. ސްޓެލްކޯއަށާއި ފެނަކައަށް ތެޔޮ ލީޓަރެއް 7.94 ރުފިޔާއަށް މިހާރު ގަންނަން ލިބޭ ކަމަށްވެސް ވިދާޅުވި އެވެ.
މިނިސްޓަރު ވިދާޅުވީ ތެލަށް ބަރޯސާވާ އިގްތިސޯދީ ދާއިރާތަކަށް މިބަދަލުގެ ސަބަބުން ހެޔޮ ބަދަލުތަކެއް އަންނަމުންދާ ކަމަށެވެ. އެގޮތުން ތެލުގެ ޑިއުޓީއަށް ގެނައި ބަދަލާ ގުޅިގެން މަސްވެރިންނަށާއި ރާއްޖޭގެ ޓޫރިޒަމް ދާއިރާއަށް ލުއިފަސޭހަތަކެއް ލިބޭނެ ކަމުގައިވެސް ވިދާޅުވި އެެވެ.
ތޯރިގު ވިދާޅުވީ ކަރަންޓުގެ އަގަށް އަންނަ ބަދަލު އަންނާނީ ހަމައެކަނި ގޭބިސީތަކުގެ ބިލަށް ނޫން ކަމަށާއި ވިޔަފާރިތަކުގެ ބިލުންވެސް އެބަދަލުތައް ފެންނަމުންދާނެ ކަމަށެވެ. އަދި ކަރަންޓް ބިލަށް އަންނަ ހެޔޮ ބަދަލުތަކުގެ ތަފްސީލް މައުލޫމާތު ވަރަށް އަވަހަށް ހާމަކުރާނެ ކަމަށްވެސް ވިދާޅުވި އެވެ.
މިނިސްޓަރު ވިދާޅުވީ ކަރަންޓުގެ އަގަށް ބަދަލު ގެނައި ނަމަވެސް ޓެރިފަށާއި ފިއުލް ސާޗާޖުގެ ގޮތުގައި ނަގަމުންދާ އަދަދުތަކަށް ބަދަލެއް ގެނައުމަށް ނިންމާފައި ނުވާ ކަމަށެވެ. ފިއުލް ސާޗާޖު ނަގަނީ ތެޔޮ ލީޓަރެއް ގަންނަން ލިބޭ އަގު 8 ރުފިޔާ އިން މައްޗަށް ދިއުމުން ކަމަށްވެސް ވިދާޅުވި އެވެ.
މިނިސްޓަރު ތޯރިގު އިތުރަށް ވިދާޅުވީ ކަރަންޓް އަގު ހެޔޮކުރަން ނިންމުމާ ގުޅިގެން ފެނަކައާއި ސްޓެލްކޯ އަށް އަހަރަކު ލިބޭ އާމްދަނީ 270 މިލިއަން ރުފިޔާ ކުޑަވެގެންދާނެތީ ފެނަކައާއި ސްޓެލްކޯގެ ހިންގުން ހަރުދަނާކުރަން ކުރަންޖެހޭ މަސައްކަތްތައް ކުރާނެ ކަމަށެވެ.
ނޫސްވެރިންގެ މިބައްދަލުވުމުގައި ސްޓެލްކޯއާއި ފެނަކައިގެ އިސްވެރިން ވެސް ބައިވެރިވެވަޑައިގެންފައިވާއިރު ކަރަންޓްގެ އަގު ހެޔޮކުރަން ނިންމާފައިވާ ގޮތުގެ ތަފްސީލް މިއަދު ހިއްސާކުރައްވާފައެއް ނުވެ އެވެެ. ނަމަވެސް ވަރަށް އަވަހަށް އެމައުލޫމާތު ހިއްސާކުރައްވާނެ ކަމަށް އެބޭފުޅުން ވަނީ ވިދާޅުވެފަ އެވެ.