ފުލުހުންގެ ބަންދުގައި ބަހައްޓައިގެން ހޯމް މިނިސްޓަރ ޢުމަރު ނަސީރު ކޯޓަށް ހާޒިރު ކުރުމަށް ކްރިމިނަލް ކޯޓުން ފުލުހުންގެ މައްޗަށް އަމުރު ނެރެފި އެވެ.
ވަގުތު އެމްވީއަށް މަޢުލޫމާތު ލިބިފައިވާ ގޮތުގައި، ކްރިމިނަލް ކޯޓުން ފުލުހުންގެ މައްޗަށް މި އަމުރު ނެރެފައި ވަނީ އިއްޔެގެ ވަގުތެއްގަ އެވެ.
މި އަމުރާ ގުޅޭ ގޮތުން ފުލުހުންގެ މީޑިޔާ އޮފިޝަލް ވިދާޅުވީ، މިވަގުތު މިކަމާ ބެހޭ ގޮތުން އެއްވެސް އެއްޗެއް ދެންނެވެން ނެތް ކަމަށެވެ.
ޢުމަރު ބަންދުގައި ބަހައްޓައިގެން ކޯޓަށް ހާޒިރު ކުރުމަށް އަމުރު ނެރެފައި މި ވަނީ، އިއްޔެއަށް ތާވަލު ކުރެވިފައިވާ، ޢުމަރުގެ މައްޗަށް ދަޢުލަތުން ކުރާ އަމުރަށް ނުކިޔަމަންތެރިވުމުގެ ދަޢުވާގެ އަޑުއެހުމަށް ޢުމަރު ހާޒިރު ނުވުމުންނެވެ.
ޢުމަރުގެ މައްޗަަށް ދަޢުލަތުން ދަޢުވާ ކުރަނީ، ކުރީގެ ރައީސް ނަޝީދުގެ ސަރުކާރާ ދެކޮޅަށް ކުރެވުނު މުޒާހަރާތަކެއްގައި، ހަރުގަނޑުތަކެއް ބަހައްޓައިގެން ސިފައިންގެ މައި މަރުކަޒުގެ ތެރެއަށް ވަނުމަށް ބަޔަކަށް ބާރުއަޅާ ފަދަ ގޮތަކަށް ވާހަކަ ދެއްކެވުމުގެ ސަބުންނެވެ.
މި މައްސަލައިގެ ފުރަަތަމަ އަޑުއެހުމުގައި، ޢުމަރު ވަނީ މި ދަޢުވާއަށް އިންކާރު ކޮށްފަ އެވެ.
އިއްޔެގެ ޝަރީޢަތް ތާވަލު ކޮށްފައި ވަނިކޮށް، ޢުމަރު ވަނީ މަސްތުވާތަކެތި އަތުލައިގަތުމަށް ބޭނުންކުރާ ކުއްތާއާއި ބޮޑީ ސްކޭނަރތަކެއް ހޯދުމަށް ނެދަރލެންޑްސްއަށް ރަސްމީ ދަތުުރުފުޅެއްގައި ފުރާ ވަޑައިގެންފަ އެވެ. ހޯމް މިނިސްޓްރީގެ މީޑިޔާ ކޯޑިނޭޓަރ ބުނެފައި ވަނީ، މި ދަތުރުފުޅު ނިންމަވާލެއްވުމަށް ފަހު ޢުމަރު މާލެ ވަޑައިގަންނަވާނީ ހޯމަ ދުވަހު ކަމަށާއި، މާލެ ވަޑައިގަތުމަށް ފަހު އޭނާ ކޯޓަށް ވަޑައިގަންނަވާނެ ކަމަށެވެ.
މިއީ ރާއްޖޭގައި މިނިސްޓަރަކު ކޯޓަށް ހާޒިރު ކުރުމަށް ފުލުހުންގެ މައްޗަށް އަމުރު ނެރުނު ފުރަތަމަ ފަހަރެވެ.