މުޖުތަމައުގެ ތެރޭގައި ފިތުނަ އުފެދޭ ވާހަކަތަށް ދައްކާ، ފަރާތްތަކާއި އެކު ބައްދަލުވުން ބޭއްވުން، ޖުމްހޫރީ ޕާޓީގެ ލީޑަރު ގާސިމް އިބްރާހިމްއަށް، ކްރިމިނަލް ކޯޓުން މަނާކޮށްފިއެވެ.
މިއީ ގާސިމް ދޫކޮށްލުމަށް ކްރިމިނަލް ކޯޓުން ކުރި އަމުރުގައި، ބުނެފައިވާ ހަތް ޝަރުތުގެ ތެރެއިން ޝަރުތެކެވެ.
އެ ކޯޓުން ގާސިމްއަށް ދެން ކޮށްފައިވާ ޝަރުތުތަކުގައި ބުނެފައިވަނީ، ތަހުގީގަށް ފުރިހަމައަށް އެއްބާރުލުން ދިނުމަށާއި، ފުލުހުންގެ ހުއްދަ ލިޔުމަކުން ލިބިގެން ނޫނީ، ރާއްޖެއިން ބޭރަށް ނުދިޔުމަށާއި، ގާސިމް ހައްޔަރުކުރި މައްސަލައިގެ ހެކި ގެއްލިދާފަދަ އެއްވެސް ކަމެއް އަދި ހެއްކަށް ނުފޫޒު ފޯރުވާފަދަ، އެއްވެސް ކަމެއް ނުކުރުމަށެވެ.
އަދި މުޖުތަމައުގެ ތެރޭގައި ފިތުނަ ފަސާދައާ، ހަމަނުޖެހުން އުފެދޭ ފަދަ ވާހަކަތަށް ނުދެއްކުމަށާއި، އަދި އެފަދަ ވާހަކަތަށް ދެއްކުމަށް ގާސިމްގެ ގެދޮރު ބޭނުން ނުކުރުމަށާއި، އެފަދަ ކަންކަން ކުރުމަށް އެހެން މީސްމީހުންނަށް އެތަންތަން ނުދިނުމަށާއި، ދައުލަތުގެ ތިންބާރާއި، ތިންބާރުގެ ވެރިންނާ ބެހޭގޮތުން ރައްޔިތުންގެ ހިތްތަކުގައި، ނުތަނަވަސްކަން އުފެދޭ ފަދަ ވާހަކަތަށް ނުދެއްކުމަށް ވެސް، ކްރިމިނަލް ކޯޓުން ވަނީ ގާސިމްއަށް އަންގާފައެވެ.
ގާސިމް މިއަދު ދޫކޮށްލީ އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުންނެވެ.
މިދިޔަ މަހުގެ 20 ވަނަ ދުވަހު ގާސިމް ހައްޔަރު ކޮށްފައި ވަނީ ރައްޔިތުންގެ މަޖިލިހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ ހުށަހަޅަން 42 މެމްބަރުންގެ ސޮއި ހޯދަން، "ގަވާއިދާ ހިލާފަށް" މަސައްކަތްކުރެއްވުމާއި ސަރުކާރު ވައްޓާލަން މަސައްކަތްކުރައްވާކަމުގެ ތުހުމަތުގައެވެ.
ހައްޔަރުކުރުމަށްފަހު މިދިޔަ މަހުގެ 21 ވަނަ ދުވަހު ގާސިމް ބަންދަށް ކްރިމިނަލް ކޯޓުން ވަނީ 15 ދުވަސް ޖަހާފައެވެ. ކްރިމިނަލް ކޯޓުގެ އެ ނިންމުމަށް ހައިކޯޓުން ވެސް ތާއީދުކުރިއެވެ. އަދި މިމަހުގެ ފަސްވަނަ ދުވަހު ކްރިމިނަލް ކޯޓުން ވަނީ ގާސިމްގެ ބަންދަށް އިތުރު ހަތަރު ދުވަސް ޖަހާދީފައެވެ. އެ މުއްދަތު ހަމަވީ މިއަދަށެވެ.
ގާސިމް މިއަދު ދޫކޮށްލިއިރު އޭނާ އާއި ދެކޮޅަށް ދައުލަތުން އުފުލާފައިވާ ތިން ދައުވާއެއްގެ ޝަރީއަތް މިހާރު ވަނީ ފެށިފައެވެ.
ގާސިމްގެ މައްޗަށް އުފުލާފައިވަނީ ރިޝްވަތު ދޭން އުޅުމުގެ ދައުވާ އާއި ރަސްމީ ގޮޮތުން ކުރަންޖެހޭ ކަމަކަށް ނުފޫޒު ފޯރުވަން އުޅުމުގެ ދައުވާ އާއި ވޯޓު ދޭން ހުރި މީހަކަށް ނުފޫޒު ފޯރުވުމުގެ ދައުވާ އެވެ.