މޫސުން ތަން ނުދޭތީ، މާދަމާ މާލޭގައި މައިދާނުގައި ކުރުމަށް ހަމަޖައްސާފައި އޮތް އަޟްހާ ޢީދު ނަމާދު، މައިދާނުގައި ނުކުރާ ގޮތަށް މިނިސްޓްރީ އޮފް އިސްލާމިކް އެފެއާޒްއިން ނިންމައިފިއެވެ.
އެ މިނިސްޓްރީއިން ހާމަކޮށްފައިވާ ގޮތުގައި، މައިދާނުގައި އީދު ނަމާދު ކުރެވެން ނެތީ، މޫސުން ތަން ނުދިނުމުގެ ސަބަބުންނެވެ. އެހެންކަމުން، މައިދާނުގައި އީދު ނަމާދު ނުކުރަން ނިންމާފައިވާ ކަމަށް އެ މިނިސްޓްރީއިން ބުންޏެވެ.
މާލޭގައި މައިދާނުގައި ޢީދު ނަމާދު ކުރުން އޮންނަނީ، މާލޭގެ ހުޅަނގު ދެކުނު ފަރާތުގައި އޮންނަ މާފަންނު ބޯޅަ ދަނޑާއި، އިންވެގެން އޮންނަ ދަނޑުތަކުގައި، ބޮޑު ޖަމާޢަތެއް ހަދައިގެންނެވެ.
މާލޭގައި ފަހުގެ ތާރީޚުގައި މައިދާނުގައި އީދު ނަމާދު އެންމެ ފުރަތަމަ ކުރެވުނީ، 2012 ވަނަ އަހަރުގެ ފިތުރު ޢީދު ދުވަހުއެވެ. އޭގެ ފަހުން، ވިއްސާރަވެ، މޫސުން ތަން ނުދޭ ހާލަތެއް ދިމާވެގެން ނޫނީ، އީދު ނަމާދުގެ ރަސްމީ ޖަމާޢަތް މާލޭގެ މިސްކިތެއްގައި ކޮށްފައެއް ނުވެއެވެ.