އިހަވަންދޫ ކަރަންޓު ވިއުގަ ނިމުމާއެކު ކުރިން ދިމާވި މައްސަލަތައް ހައްލު ވެގެންދާނެ އެވެ. އެކަން ރައްޔިތުންވެސް ފާހަގަ ކުރެ އެވެ.
ހއ.އިހަވަންދޫގައި ކަރަންޓުގެ ހިދުމަތް ދިނުމަށް ބޭނުންކުރާ ކޭބަލް ނެޓްވޯކް އަޕްގްރޭޑްކޮށް، އައު ޓްރާންސްފޯމަރުތައް ބަހައްޓައި، ކަރަންޓު ފޯރުކޮށްދިނުމަށް ތައްޔާރު ވެއްޖެ އެވެ.
އެ ރަށުގެ ފެނަކާ އޮފީހުން ބުނީ އިހަވަންދޫގައި މިހާރު އަޅާފައި އޮތް ކޭބަލް ނެޓްވޯކް އަކީ މީގެ 16 ވަރަކަށް އަހަރު ކުރިން އަޅާފައި އޮތް ކޭބަލް ނެޓްވޯކެއް ކަމަށެވެ. ކޭބަލް ނެޓްވޯކް ބަދަލުނުކޮށް އޮތުމުން ރައްޔިތުން ބޭނުންވާ މިންވަރަށް ކަރަންޓް ފޯރުކޮށް ނުދެވުމަކީ ފެނަކައަށް ދިމާވާ ގޮންޖެހުމެއް ކަމަށް ބުނެފައިވެ އެވެ.އިހަވަންދޫ ފެނަކަ ޑެޕިއުޓީ މެނޭޖަރު މުހައްމަދު ސަމީރު ވިދާޅުވީ އެ ރަށުގެ ކަރަންޓް ކޭބަލް މިހާރު ބަދަލުކޮށްފައިވާކަމަށެވެ. އެބަދަލާއެކު، ޓްރާންސްފޯމަރުތައް ބަހައްޓާ ހިދުމަތް ދިނުމަށް މިހާރު ތައްޔާރުވަމުންދާކަމަށް ވެސް އޭނާ ވިދާޅު ވިއެވެ. އެގޮތުން ރަށުގެ ތިން ސަރަހައްދެއްގައި ޓްރާންސްފޯމަރުތައް ބަހައްޓާ ޓެސްޓްކޮށް، ޑިސްޓިބިއުޝަން ފޮށިތަކަށް ގުޅުމުގެ މަސައްކަތައް ކުރަމުންދާ ކަމަށް ސަމީރު ވިދާޅުވި އެވެ. އަދި މިފަހަރު އެޅި ކަރަންޓު ކޭބަލް ގާތްގަނޑަކަށް 40 އަހަރު ބޭނުން ކުރެވޭނެ ކަމަށްވެސް އޭނާ ވިދާޅުވި އެވެ. 
އިހަވަންދޫ ކަަރަންޓުގެ މައްސަލަ ހައްލު ވެގެން ދިއުމާއެކު އެ ރަށުގެ ރައްޔިތުން ތިބީ އުފަލުންނެވެ. ރަށުގެ ރައްޔިތުން ބުނީ މި މަޝްރޫއުގެ ސަބަބުން އެ ރަށުގެ ރައްޔިތުންނަށް ވަރަށް ބޮޑު ފަސޭހައެއް ވެގެންދާނެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ