މަގާމުގެ ނުފޫޒު ބޭނުންކޮށްގެން ބިދޭސީ ބައެއްގެ އަތުން ފައިސާ ފޭރިގަނެ، ކޮރަޕްޝަންގެ އަމަލުތަކެއް ހިންގި ކަމަށް ބުނާ ނެގި ކަމަށް ބުނާ މައްސަލާގައި ކުށަށް އިއުތިރާފިވެފައިވާ އިމިގްރޭޝަން އޮފިސަރަށް މިއަދު ހުކުމްކޮށްފި އެވެ.
ވީކިހިނެއް؟ - އެއީ މި ސަރުކާރުގެ ފުރަތަމަ އިމިގްރޭޝަން ކޮންޓްރޯލަރު ޝަމްއާން ވަހީދު ހިމެނޭ ގޮތަށް އިމިގްރޭޝަންގެ ބައެއް މުވައްޒަފުން ގަވާއިދާ ހިލާފު އޮޕަރޭޝަނެއްގައި ބިދޭސީ މަސައްކަތްތެރިންގެ ބަޔަކު ހައްޔަރުކޮށް އޭގެ ތެރެއިން އެކަކުގެ އަތުން 530،000ރ. ނެގި މައްސަލައެކެވެ.  
މި މައްސަލާގައި ދައުވާކުރި 5 މީހުންގެ ތެރެއިން ކުށަށް އިއުތިރާފުވީ މުހައްމަދު އަލްސަން އިސްމާއިލް، މޫނިމާގެ/ތ. ބުރުނި އެވެ. އޭނާއާ އެކު ދައުލަތުން ވަނީ އިއުތިރާފުގެ އެއްބަސްވުމެއް އެކުލަވާލައިފަ އެވެ.
ތަފްސީލް - މިއަދު ކްރިމިނަލް ކޯޓުގައި މައްސަލައިގެ ހުކުމްކުރުމަށް ބޭއްވި އަޑުއެހުމުގައި، ގާޒީ އިބްރާހީމް އިހުސާން އަދަބު ކަނޑައެޅުއްވީ ވެސް އިއުތިރާފު އެއްބަސްވުމުގައިވާ ގޮތަށެވެ. އެ ގޮތުން:
ކުށުގެ އަސާސީ އަދަބަކީ 9 މަހާއި 18 ދުވަހުގެ މުއްދަތަކަށް ޖަލަށް ލުން
އިއުތިރާފު އެއްބަސްވުމުގައި ވަނީ އޭގެ ތެރެއިން ޖަލު އަދަބުގެ ގޮތުގައި 2 މަހާއި 3 ދުވަސް ކަނޑައެޅުމަށް
ހުކުމުގެ ބާކީ ޖޫރިމަނާއަށް ބަދަލުކޮށް، ޖޫރިމަނާގެ ގޮތުގައި 45،000ރ. އެއް އަހަރުގެ ތެރޭގައި ދައްކާ ގޮތަށް
މި މައްސަލަގާއި އަލްސަން ބަންދުގައި 2 މަހާއި 3 ދުވަސް ވަނީ ހޭދަކޮށްފައި؛ އެ މުއްދަތު ހުކުމުން އުނިކުރުމުން ތަންފީޒުކުރާނެ އަދަބެއް ނެތް