ބަންގްލަދޭޝްގެ ކުރީގެ ބޮޑުވަޒީރު ހާލިދާ ޒިޔާގެ ހާލު ސީރިއަސްވެ، ހޮސްޕިޓަލުގައި އެޑްމިޓްކޮށްފި އެވެ.
އެކަމަނާގެ އާއިލާ އާއި ސަޕޯޓަރުން ވަނީ އެކަމަނާއަށް އަވަސް ޝިފާއަކަށް އެދި ދުއާކޮށްދިނުމަށް އެދިފަ އެވެ. 
ޒިޔާ، 80،ގެ އަމިއްލަ ޑޮކްޓަރު ޒާހިދު ހުސައިން ނޫސްވެރިންނަށް އިއްޔެ ވިދާޅުވި ގޮތުގައި، ހާލިދާ ވަނީ މި މަހު 23 ވަނަ ދުވަހުން ފެށިގެން ޑާކާގައި ހުންނަ އެވާކެއާ ހޮސްޕިޓަލްގައި އެޑްމިޓްކޮށްފަ އެވެ. އަދިވެސް އެކަމަނާ އޮތީ އިންޓެންސިވް ކެއާގަ އެވެ.
ހާލިދާ އެޑްމިޓް ކުރީ ފުއްޕާމޭގެ އާލާސްކަންފުޅަކާ ގުޅިގެންނެވެ. ޑޮކްޓަރުން ވިދާޅުވާ ގޮތުގައި އޭނާއަށް ދޭ ބޭހުން އަންނަނީ ރަނގަޅު އަސަރެއް ކުރަމުންނެވެ.
"މި ވަގުތު އަޅުގަނޑަށް ބުނެވިދާނެ އެކަމަނާގެ ހާލު އޮތީ ފާއިތުވެ ދިޔަ ތިން ދުވަހުގައި ވެސް އޮތް ވަރުގައި ކަމަށް. ނަމަވެސް ބޭހަށް ގުޑަމުން އަންނަނީ،" ހުސައިން ވިދާޅުވި އެވެ.
ހުސައިން މިހެން ވިދާޅުވެފައި މިވަނީ ހާލިދާގެ ބަންގްލަދޭޝް ނޭޝަނަލް ޕާޓީ (ބީއެންޕީ)ގެ ސެކްރެޓަރީ ޖެނެރަލް މިރްޒާ ފަހްރުލް އިސްލާމް އަލަމްގިރު ހާލިދާގެ ހާލުކޮޅު ސީރިއަސް ކަމަށް ވިދާޅުވެފައި ވަނިކޮށެވެ.
ޑެއިލީ ސްޓާ އިން ރިޕޯޓުކޮށްފައިވާ ގޮތުގައި، ހާލިދާއަކީ ހިތުގެ މައްސަލަތަކާއި ކިޑްނީގެ މައްސަލަތަކާއި ހަކުރު ބައްޔާއި ފުއްޕާމޭގެ މައްސަލަތަކާއި ރާއްޖެބަލީގެ އިތުރުން ލޮލުގެ ބަލިތައް ހުންނަ ބޭފުޅެކެވެ.
އޭނާގެ ހިތަށް ވަނީ ދާއިމީ ޕޭސްމޭކަރެއް ވެސް ލައްވައިފަ އެވެ. 
މީގެ 17 އަހަރު ކުރިން 2008 ވަނަ އަހަރުން ފެށިގެން ލަންޑަނުގައި ދިރިއުޅުއްވަމުން އަންނަ ހާލިދާ ދޮށީ ދަރިކަލުން ތާރިގް ރަހްމާން ވަނީ ބަންގްލަދޭޝްގެ ރައްޔިތުންގެ ކިބައިން އޭނާގެ މަންމައަށް އަވަސް ޝިފާއެއް މިންވަރުކޮށްދިނުމަށް ދުއާކޮށްދިނުމަށް އެދިވަޑައިގެންފަ އެވެ.
މަގާމުން ދުރުކޮށްފައިވާ ޝޭހް ހަސީނާގެ ބޮޑުވަޒީރު ކަމުގައި، ހާލިދާގެ މައްޗަށް ކޮރަޕްޝަންގެ ކުށް ސާބިތުވެ، 2018 ވަނަ އަހަރުން ފެށިގެން ވަނީ ޖަލަށް ލައިފަ އެވެ. އަދި ބޭސްފަރުވާއަށް ބޭރަށް ފުރުން ވެސް ވަނީ މަނާކޮށްފަ އެވެެ.
ހަސީނާ މަގާމުން ވަކިކުރިތާ ކުޑަ ދުވަސްކޮޅެއް ފަހުން ހާލިދާ ދޫކޮށްލީ މިދިޔަ އަހަރު އެވެ.
ސިއްހީ ހާލުކޮޅު ގޯސްވި ނަމަވެސް އަންނަ އަހަރުގެ ފެބްރުއަރީ މަހު ބާއްވާ އާންމު އިންތިހާބުގައި ކެމްޕެއިން ކުރައްވާނެ ކަމަށް ހާލިދާ ވަނީ ވައުދުވެވަޑައިގެންފަ އެވެ. އަދި އެ އިންތިހާބުގައި ބީއެންޕީ އެންމެ ކުރީ ސަފުގައި އުޅޭނެ ކަމަށް ބެލެވެ އެވެ.
ބަންގްލަދޭޝްގެ ވަގުތީ ލީޑަރު މުހައްމަދު ޔޫނުސް ވެސް ވަނީ ބަޔާނެއް ނެރުއްވައި ހާލިދާްއަށް އަވަސް ޝިފާއަކަށް އެދިވަޑައިގެންފަ އެވެ.
"ޑިމޮކްރަސީއަށް ބަދަލުވި މި ދަނޑިވަޅުގައި ހާލިދާ ޒިޔާއަކީ، ގައުމަށް ވަރަށް ބޮޑު ހިތްވަރެއް. އެކަމަނާގެ އަވަސް ޝިފާއަކީ ގައުމަށް ވަރަށް މުހިންމު ކަމެއް،" ޔޫނުސް ވިދާޅުވި އެވެ.