ވ. އަތޮޅު ކައިރިއަށް ޑައިވްކުރުމަށް ގޮސް އުޅެނިކޮށް ގެއްލުނު އިޓަލީވިލާތަށް ނިސްބަތްވާ ހަތަރު ފަތުރުވެރިން ހޯދުމަށް ޓަކައި، އެ ގައުމުގެ ސަރުކާރުން ހުށަހެޅި އެހީތެރިކަމުގެ ފުރުސަތުގެ ދަށުން، ފިންލޭންޑުގެ ތަޖުރިބާކާރުންގެ ޓީމެއް ރާއްޖެ އައުމަށް ހަމަޖެހިފައިވާ ކަމަށާއި، އެޓީމް އަންނަންދެން މިވަގުތަށް ގެއްލުނު ޑައިވަރުން ހޯދުމުގެ އޮޕަރޭޝަން މެދުކަނޑާލައިފައިވާކަމަށް ސަރުކާރުން ބުނެފިއެވެ.
ބުރާސްފަތި ދުވަހު ގެއްލުނު އެ ފަސް ފަތުރުވެރިންގެ ތެރެއިން މިހާތަނަށް ފެނިފައި ވަނީ އެންމެ މީހެކެވެ. އެ މީހާ ފެނިފައި ވަނީ މަރުވެފައި އޮއްވައެވެ. ބާކީ ހަތަރު ފަތުރުވެރިން ހޯދުމަށް އެމްއެންޑީއެފުން އަންނަނީ ފުޅާ ސާޗް އެންޑް ރެސްކިއު އޮޕަރޭޝަނެއް ކުއިއަށްގެންދަމުންނެވެ. އެ އޮޕަރޭޝަންގައި، އެމްއެންޑީއެފްގެ ޑައިވަރަކު ވަނީ އިއްޔެ ނިޔާވެފައެވެ.
ސަރުކާރުގެ އިސްތަރުޖަމާނު، މުހައްމަދު ހުސައިން ޝަރީފް (މުންދު) ވިދާޅުވީ، ފީނުމުގެ ތިން ޓެކްނިކަލް ތަޖުރިބާކާރަކު، އިޓަލީވިލާތުގެ ސަރުކާރުން ހުށަހެޅި ހުށަހެޅުމެއްގައި މިއަދުގެ ހެނދުނުގެ ވަގުތެއްގައި ރާއްޖެ އަންނާނެ ކަމަށެވެ. އަދި އެ މީހުން އައުމާ އެކު، ޓޫރިސްޓުން ހޯދުމުގެ އޮޕަރޭޝަން އަލުން ފަށާނެކަމަށް އޭނާ ވިދާޅުވި އެވެ.
"ތިން މީހުންނަކީ ފިންލޭންޑު މީހުން ކަމަށް މައުލޫމާތު ލިބެނީ. އެ މީހުން އެކަމަށް ހާއްސަ އިކުއިޕްމެންޓާ އެކު ރާއްޖެ އަންނާނެ،" މުންދު ވިދާޅުވިއެވެ.
މުންދު ވިދާޅުވީ، އިޓަލީ ފަތުރުވެރިން ހޯދުމަށް ކުރަމުން ދިޔަ މަސައްކަތް ކުރަނިކޮށް، އެމްއެންޑީއެފް ކޯސްޓް ގާޑުގެ ސްޓާފް ސާޖަންޓް، މުޙައްމަދު މަހުދީ ނިޔާވުމާ ގުޅިގެން، އެ އޮޕަރޭޝަން މަޑުޖައްސައިލައިފައިވާ ކަމަށެވެ. އަދި ފިންލޭންޑުގެ ޑައިވަރުންނާ މަޝްވަރާކުރުމަށްފަހު، އެ އޮޕަރޭޝަން ކުރިއަށް ގެންދާނެ ގޮތެއް އެމްއެންޑީއެފުން ނިންމާނެ ކަމަށްވެސް މުންދު ވިދާޅުވިއެވެ.
އެމްއެންޑީއެފުން ކުރިން ބުނީ މިހާތަނަށް ހޯދުނު މީހާގެ ހަށިގަނޑު ފެނުނީ ގާތްގަނޑަކަށް 60 މީޓަރު (197 ފޫޓް) އަޑިން ކޭވްއެއްގެ ތެރެއިން ކަމަށެވެ. ބާކީ ތިބި ހަތަރު ޑައިވަރުން ވީކަމަށް ލަފާކުރެވެނީ، ދިގުމިނުގައި ގާތްގަނޑަކަށް 200 ފޫޓު ހުންނަ އެ ކޭވްގެ ތެރޭގައި ކަމަށް ވެސް އެމްއެންޑީއެފް އިން ބުނެފައިވެއެވެ.