ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ޚިޔާނާތްތެރިވެ، ބޭރުގެ ފަރާތްތަކުން އެހީގެ ގޮތުގައި ޔޫއެސް ޑޮލަރުން ލިބޭ ފައިސާ އެ އެސޯސިއޭޝަންގެ އިސްވެރިންނާއި އެސޯސިއޭޝަނާ ގުޅުން އޮންނަ ފަރާތްތަކަށާއި، ކުންފުނިތަކުގެ އެކައުންޓްތަކަށް ޖަމާކޮށް، ނަހަމަގޮތުގައި ބޭނުންކޮށް މަނީ ލޯންޑްރިންގެ އަމަލުތަކެއް ހިންގާކަމަށް ތުހުމަތުކުރެވޭ މައްސަލާގައި އަމީން ކޮންސްޓްރަކްޝަންގެ މައްޗަށް ދައުލަތުން ދައުވާ އުފުލައިފިއެވެ.
ޕްރޮސިކިއުޓާ ޖެނެރަލްގެ އޮފީހުން މި މައްސަލަ ކްރިމިނަލް ކޯޓަށް ހުށަހަޅާފައިވަނީ މިދިޔަ އާދިއްތަ ދުވަހުއެވެ.
އެ ކުންފުންޏާ ދެކޮޅަށް އުފުލާފައިވަނީ މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން، މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާއެވެ.
ޕީޖީ އޮފީހުން ބުނީ 2016 ވަނަ އަހަރުން ފެށިގެން އެފްއޭއެމްގެ ރައީސްގެ ގޮތުގައި ހުންނަވައިގެން ބައްސާމް އަދީލް ޖަލީލް އެ އެސޯސިއޭޝަންގެ އެކައުންޓުގެ ޗެކު، 8 އޭޕްރިލް 2021 ގައި ތައްޔާރުކުރުވައި، ޗެކުގައި އޭނާ ސޮއިކޮށް 14 އޭޕްރިލްގައި ފީފާއިން އެފްއޭއެމްގެ އެކައުންޓަށް ޖަމާކުރި އެއް މިލިއަން ނުވަލައްކަ ނަވާރަހާސް ނުވަސަތޭކަ ފަންސާސް އެމެރިކާ ޑޮލަރުގެ ތެރެއިން އެއް މިލިއަން އެމެރިކާ ޑޮލަރު ނެގޭ ގޮތަށް، އަމީން އެވެނިއުގެ އެޕާޓްމަންޓް ގަތުމަށް ޗެކު ދޫކުރުމުން، އެ ޗެކުގައިވާ ފައިސާއަކީ އެފްއޭއެމްގެ ފައިސާކަން އެނގިހުރެ ބަލައިގަނެފައިވާ ކަމަށެވެ.
އަދި އެ ފައިސާއަކީ ޑޮލަރު ގަތުމުގެ މުއާމަލާތެއްކަމަށް ބަޔާންކޮށް، ބޭންކް އޮފް ސިލޯނަށް ސިޓީ ފޮނުވައި، 14 އޭޕްރީލް 2021 ދުވަހު އަމީން ކޮންސްޓްރަކްޝަންގެ އެކައުންޓަށް އެ ފައިސާ ޖަމާކޮށް، އެ ފައިސާއަށްވާ ދިވެހި ރުފިޔާ އެފްއޭއެމްއަށް އަނބުރާ ދެއްކުމަކާ ނުލައި، އެ ފައިސާއަށްވާ ދިވެހި ރުފިޔާ އެ އެސޯސިއޭޝަނަށް ނަގުދު ފައިސާއިން ދީފައިވާކަން ދެއްކުމުގެ ގޮތުން އަމީން ކޮންސްޓްރަކްޝަންގެ ނަމުގައި ކޭޝް ވައުޗަރުތަކެއް ތައްޔާރުކޮށް، މަނީ ލޯންޑާކުރުމަށް އެ ކުންފުނިން ބައްސާމަށް އެހީތެރިވެދީފައިވާކަމަށް ޕީޖީން ބުނެފައިވެއެވެ.
ދައުލަތުން ވަނީ އެކަމުގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ USD1,000,000 (އެއް މިލިއަން އެމެރިކާ ޑޮލަރު) އަމީން ކޮންސްޓްރަކްޝަންއިން ނަގައިދިނުމަށާއި، އެ ކުންފުނީގެ އަމަލުގެ ސަބަބުން ބައްސާމް ހޯދައި ލިބިގަނެ ބޭނުންކުރަމުން ގެންދިޔަ އެ ކުންފުނީގެ އަމީން އެވެނިއު އެޕަރޓްމަންޓް A1205 އަދި A1206 ދައުލަތަށް ނަގައިދިނުމަށް އެދިފައެވެ.
މީގެއިތުރުންވެސް މި މައްސަލައިގައި އެފްއޭއެމްގެ އެކައުންޓްސް ޑިޕާޓްމަންޓްގެ ކުރީގެ ހެޑު މުޙައްމަދު ޢަޤީލް އަދި އެކަމުގައި ބައްސާމަށް އެހީތެރިވެދިން އިތުރު މުވައްޒަފެއް ކަމަށްވާ ހަސަން ވަހީދުގެ މައްޗަށް ވަނީ ދައުވާ އުފުލާފައެވެ.