ގުރުއާން ހިތުދަސްކުރާ ފަރާތްތައް ދަސްވެނިވުމަށް ކޮންމެ އަހަރަކު ހާއްސަ ހަފްލާއެއް ބާއްވަން ނިންމާފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް ވިދާޅުވީ މި ހަފްލާ ބޭއްވުމަށް ހަމަޖެހިފައިވަނީ ކޮންމެ އަހަރެެއްގެ ރަމަޟާން މަހުގެ 27 ވިލޭރޭ ކަމަށާއި، ދަސްވެނިންނަށް ހާއްސަ ގައުނެއް ވެސް ތައްޔާރުކުރެވޭނެ ކަމަށެވެ.
މި އަންނަ ރަމަޟާން މަހުގެ 27 ވިލޭރޭ ގުރުއާން ހިތުދަސްކުރާ ފަރާތްތައް ދަސްވެނިވުމުގެ ފުރަތަމަ ހަފްލާ އޮންނާނެ ކަމަށްވެސް ޝަހީމް ވަނީ ވިދާޅުވެފައެވެ.
މިނިސްޓަރު ޝަހީމް ވަނީ މިއަހަރުގެ މިހާތަނަށް ގިނަ ބަޔަކު ގުރުއާން ހިތުދަސްކޮށް، ހާފިޒުކަމުގެ އިމްތިހާން ހެދުމަށް އެދިފައިވާ ކަމަށާއި، އެގޮތުން މިހާރުވެސް 3 މީހަކު ގުރުއާން ހިތުދަސްކުރުމަށްފަހު އިމްތިހާން ހަދަމުންދާ ކަމަށާއި 2 މީހަކު އިމްތިހާނު ހެދުމަށް އެދިފައިވާ ކަމަށް ވިދާޅުވެފައެވެ. މީގެ އިތުރުން 5 އަހަރުގެ ކުއްޖަކުވެސް ގުރުއާން ހިތުދަސްކުރުމަށްފަހު މުރާޖައާ ކުރުމަށް އެދިފައިވާ ކަމަށްވެސް ޝަހީމް ވަނީ ވިދާޅުވެފައެވެ.
ފާހަގަކޮށްލެވޭ ގޮތުގައި އޮކްޓޯބަރު 2022 އިން ސެޕްޓެންބަރު 1، 2024 ގެ ނިޔަލަށް ގުރުއާން ހިތުދަސްކޮށް ސަނަދު ހާސިލުކުރި 28 ހާފިޒުންނަށް ރައީސް ޑރ. މުހައްމަދު މުއިއްޒު ވަނީ ރާއްޖެ އިސްލާމްވި ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި މެޑައްޔާއި ހަނދާނީ ލިޔުމާއި އިނާމު ދެއްވާފައެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވަނީ، ދިވެހި މުޖުތަމައަކީ ގުރްއާނާއި ސުންނަތް އިރުޝާދު ދޭ ފަދައިން ބައްޓަންވެފައިވާ ރަނގަޅު މުޖުތަމައަކަށް ބަދަލުކުރުމުގައި ހުރިހާ ފަރާތްތަކުން ބައިވެރިވެ އެއްބާރުލުން ދިނުމަށް އެދިވަޑައިގެންފިއެވެ.