ހުޅުމާލޭގައި ހުރި ސްޓެލްކޯގެ ޓްރާންސްފޯމަރަކަށް ގެއްލުންދީ އެ ތަނުން ވައްކަން ކުރަން އުޅެނިކޮށް އެ ތަނުގެ މުވައްޒަފުން ހުއްޓުވުމުން، މުވައްޒަފަކަށް ހަމަލާ ދިން މައްސަލާގައި ހައްޔަރުކުރި މީހާގެ ވަނަވަރު ފުލުހުން މިއަދު އާންމުކޮށްފި އެވެ.
ވީކިހިނެއް؟ - ހުޅުމާލޭ ދެވަނަ ފިޔަވަހީގެ ރީތިގަސްމަގު ބްރިޖް ކައިރީ ހުރި ސްޓެލްކޯގެ ޓްރާންސްފޯމަރަކަށް ގެއްލުންދީ ވައްކަން ކުރަން އުޅެނިކޮށް ސްޓެލްކޯގެ މުވައްޒަފުންތަކެއް ގޮސްއިން ހިފެހެއްޓީ ރޭގެ ވަގުތެއްގަ އެވެ.
ތަފްސީލް - ފުލުހުން ބުނި ގޮތުގައި، އެ މީހާ ވަނީ ފަހުން ސްޓެލްކޯގެ މުވައްޒަފަކަށް ހަމަލާދީ، މާރާމާރީ ވެސް ހިންގައިފަ އެވެ. އެ މީހާ ރޭ ފުލުހުންގެ ބެލުމުގެ ދަށަށް ގެނެސްފައިވާ އިރު ފުލުހުން ވަނީ އޭނާގެ ވަނަވަރު ވެސް އާންމުކޮށްފަ އެވެ.
ހައްޔަރުކުރި މީހާއަކީ އިބްރާހީމް ޒާލިފް، 37، ޗަނބޭލީގެ/ށ. ބިލެތްފަހި އެވެ.
ފާހަގަކޮށްލެވޭ - ހުޅުމާލޭ ފޭސް ދޭއްގައި ސްޓެލްކޯ އިން ބަހައްޓާފައިވާ ހައި ވޯލްޓޭޖު ދެ ޓްރާންސްފޯމަރަކަށް ބަޔަކު ގަސްތުގައި ގެއްލުން ދީފައިވާ މައްސަލައެއް ވެސް މިދިޔަ ހޮނިހިރު ދުވަހު ވަނީ ފެންމަތިވެފަ އެވެ.
އެނގުން މުހިންމު - ޓްރާންސްފޯމަރުތައް ބަހައްޓާފައި ހުންނަނީ ވަށާފާރެއްގެ އެތެރޭގައި ވަށައިގެން ބަންދުކޮށް ޑަބަލްކޮށް ތަޅުލައިފަ އެވެ.
މިފަދަ ހައި ވޯލްޓޭޖު ޓްރާންސްފޯމަރުތަކާ ކުޅެ ހެދުމަކީ ކަރަންޓުގައި ޖެހި ސީރިއަސް އަނިޔާއެއް ލިބުން ނުވަތަ މަރުވެދާނެ ފަދަ ނުރައްކާތެރި ކަމެއްކަން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ފާހަގަކުރެއްވި އެވެ.