ގައުމުގެ ބޮޑު ސަރަހައްދުތަކުގައި ދާހިލީ ހަނގުރާމައެއް ހިނގަމުން ދަނިކޮށް އަދި އަސްކަރީ ސަރުކާރުގެ ބެލުމުގެ ދަށުން މިޔަންމާގައި ފުރަތަމަ ފިޔަވަހީގެ ވޯޓުލުން އިއްޔެ ބާއްވައިފި އެވެ. 
އަންނަ ޖެނުއަރީ މަހު އިތުރު ދެ ބުރުގެ ވޯޓުލައި ނިމިގެން ނޫނީ ފައިނަލް ނަތީޖާއެއް ނޭނގޭނެ އެވެ. ވަރަށް ބޮޑަށް ގަބޫލު ކުރެވޭ ގޮތުގައި އެ އިންތިހާބު ކާމިޔާބުކޮށް އާ ރައީސަކަށް ވާނީ، 2021 ވަނަ އަހަރުގެ ބަގާވާތަށް ފަހު އަސްކަރީ ވެރިިއަކަށް ވަޑައިގެންނެވި ސީނިއާ ޖެނެރަލް މިން އަންގް ހަލައިންގް އެވެ.
އަސްކަރީ ސަރުކާރުން އެ ވޯޓް ނަގަނީ ޑިމޮކްރަސީއަކަށް ރުޖޫއަވުމުގެ ގޮތުންނެވެ. ނަމަވެސް އެކަމަށް ގާނޫނީ ހައިސިއްޔަތު ހޯދަން ދަތިވަނީ ކުރީގެ މަޝްހޫރު އިދިކޮޅު ޕާޓީތައް ރޭހުގައި ނެތުމުގެ ސަބަބުންނެވެ.
ގައުމީ އަދި ސަރަހައްދީ ގާނޫނު ހަދާ މަޖިލިހުގެ ގޮނޑިތަކަށް 57 ޕާޓީއެއްގެ 4،800 އަށް ވުރެ ގިނަ ކެންޑިޑޭޓުން ވާދަކުރާ އިރު، ސިޔާސީ ނުފޫޒު ވަރުގަދަ އަދި ގާބިލުކަން ހުރި ހަ ކެންޑިޑޭޓަކު ވާދަކުރެ އެވެ. އެންމެ ވާދަވެރި ޕާޓީއަކީ އަސްކަރިއްޔާގެ ތާއީދު ލިބިގެންވާ ޔޫނިއަން ސޮލިޑާރިޓީ އެންޑް ޑިވެލޮޕްމެންޓް ޕާޓީ އެވެ.
ވޯޓުލުން ކުރިއަށް ގެންދިއުމަށް ހަމަޖެހިފައި ވަނީ ތިން ފިޔަވައްސަކަށް ބަހާލައިގެންނެވެ. އިއްޔެ އޮތް ފުރަތަމަ ބުރުގައި ވޯޓުލީ މިޔަންމާގެ 330 އަވަށެއްގެ ތެރެއިން 102 އަވަށުގަ އެވެ. އަނެއް ދެ ބުރުގެ ބޯޓުލުން އޮންނާނީ ޖެނުއަރީ މަހު 11 އަދި 25 ގަ އެވެ. ނަމަވެސް ހަތިޔާރު އެޅި ގްރޫޕްތަކުގެ ހަމަނުޖެހުންތަކާ ގުޅިގެން 65 އަވަށެެއްގައި މި އިންތިހާބުގައި ވޯޓެއް ނުލާނެ އެވެ.
ފައިނަލް ނަތީޖާ އަންނަ ފެބްރުއަރީ މަހުގެ ތެރޭގައި އިއުލާން ކުރާނެ ކަމަށް ބެލެވެ އެވެ. ވޯޓުލާ މަރުކަޒުތަކުގައި ވޯޓު ގުނުމުގެ މަސައްކަތް އާންމުކޮށް އިއުލާން ކުރި ނަމަވެސް، އާދީއްތަ ދުވަހުގެ ވޯޓުގައި ޖުމްލަ ބައިވެރިވީ ކިހާ މީހުންނެއް ކަމެއް އަދި ސާފުވެފައެއް ނުވެ އެވެ.
މިހާރު އޮތް ނިޒާމަށް ފާޑުކިޔާ ފަރާތްތަކުން ބުނާ ގޮތުގައި މި އިންތިހާބަކީ މިހާރު އޮތް ނިޒާމަށް ގާނޫނީ ހައިސިއްޔަތު ހޯދުމަށް ނަގާ ވޯޓެކެވެ. އަސްކަރީ ވެރިކަން ފެށުނީ 2021 ވަނަ އަހަރުގެ ފެބްރުއަރީ މަހު އަންގް ސަން ސޫޗީގެ ވެރިކަން ސިފައިން ވައްޓާލުމަށް ފަހު އެވެ. ސޫޗީ 2020 ވަނަ އަހަރުގެ ރިޔާސީ އިންތިހާބު ކާމިޔާބު ކުރި ނަމަވެސް، އޭނާގެ ޑިމޮކްރަސީ ޕާޓީއަށް ދެވަނަ ދައުރެއްގައި ވެރިކަން ކުރުމުގެ ފުރުސަތެއް ނުދިނެވެ. އެ މީހުން ބުނި ގޮތުގައި ބޮޑެތި ޕާޓީތައް ބާކީކޮށް، ސަރުކާރުގެ ނުފޫޒުގެ ސަބަބުން ނަތީޖާގެ ސައްހަކަން ކަށަވަރެއް ނުވާނެ އެވެ.
އަސްކަރީ ވެރިކަމާ ދެކޮޅު ފަރާތްތަކާއި މިނިވަން ތަޖުރިބާކާރުން ވިދާޅުވާ ގޮތުގައި އަސްކަރީ ބާރުގެ ދަށުގައި އޮންނަ ޔޫނިއަން ސޮލިޑާރިޓީ އެންޑް ޑިވެލޮޕްމެންޓް ޕާޓީ (ޔޫނިއަން ސޮލިޑާރިޓީ އެންޑް ޑިވެލޮޕްމެންޓް ޕާޓީ) އަށް ކާމިޔާބު ލިބުމަކީ މަދަނީ ވެރިކަމަކަށް ބަދަލުވުމުގެ ހަގީގަތެއް ނޫނެވެ.