ލަންޑަން (ޖެނުއަރީ 30) - މެންޗެސްޓާ ޔުނައިޓެޑްގެ ވަގުތީ ކޯޗެއްގެ ގޮތުގައި މަސައްކަތް ކުރަމުން އަންނަ އެ ޓީމުގެ ކުރީގެ މިޑްފީލްޑަރު، މައިކަލް ކެރިކް އަށް އެ ޓީމުގެ ކޯޗުކަަން ދާއިމީ ކޮންޓްރެކްޓެއްގައި ދޭނެ ޝަރުތެއް އެބައޮތް ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ރުބެން އަމޮރިމް، ޔުނައިޓެޑްގެ ކޯޗުކަމުން ވަކިކޮށް އެ ޓީމުން ފުރަތަމަ ހަވާލުވި ވަގުތީ ކޯޗު، ޑަރެން ފްލެޗާއާ އެކު ނުކުމެ ދެ މެޗުން ވެސް މޮޅެއްނުވިއެވެ. އޭގެ ފަހުން، ޔުނައިޓެޑުން ވަނީ ކެރިކަށް ޓީމުގެ ކޯޗުގެ ޒިންމާ ވަގުތީގޮތުން ދީފަ އެވެ. ކެރިކްގެ ކޯޗުކަމުގައި ޔުނައިޓެޑުން އަމިއްލަ ދަނޑުގައި ވަނީ އިނގިރޭސި ޕްރިމިއާ ލީގުގެ ދެ ވަނައިގައި އޮތް ވާދަވެރި މެންޗެސްޓާ ސިޓީ ބަލިކޮށްފަ އެވެ. އަދި، ދެ ވަނަ މެޗުގައި ލީގުގެ އެއް ވަނައިގައި އޮތް އާސެނަލް ދަނޑުގައި މޮޅުވި އެވެ.
އެހެންވެ، ޔުނައިޓެޑްގެ ތާރީހުގައި ވެސް ދަށްކޮށް ދަމުން އަންނަ މި ސީޒަނުގައި، އެ ޓީމަށް ގަދަ ހަަތަރެއް ލިބި އަންނަ އަހަރުގެ ޗެމްޕިއަންސް ލީގުގައި ކުޅުމުގެ އުންމީދު ވަނީ ބޮޑުވެފަ އެވެ. އެއާ އެކު، ޔުނައިޓެޑްގެ ކޯޗަކަށް ދާއިމީ ކޮންޓްރެކްޓެއްގައި ކެރިކް ބެހެއްޓުމަށް ސަޕޯޓަރުން ކުރާ ޑިމާންޑްތައް ވެސް ވަނީ އިތުރު ވެފަ އެވެ.
އިނގިރޭސި މީޑިއާތަކުން ރިޕޯޓްކުރި ގޮތުގައި، ކެރިކަށް ޔުނައިޓެޑްގެ ކޯޗުކަން ދާއިމީ އެއްބަސްވުމެއްގައި ދޭން ކްލަބްގެ ފުޓްބޯޅައިގެ ކަންކަން ބަލަހައްޓާ އިނިއޯސް އިން ދީފައިވަނީ، އެންމެ ޝަރުތެކެވެ. ދެން، ޔުނައިޓެޑުން ކުޅެން އޮތް 15 މެޗުގެ ތެރެއިން 10 މެޗުން މޮޅުވުމެވެ.
ކެރިކް ވަނީ މީގެ ކުރިން 2021 ވަނަ އަހަރު ޔުނައިޓެޑްގެ ވަގުތީ ކޯޗަކަށް މަސައްކަތްކޮށްފަ އެވެ. އެއީ، 2021 ވަނަ އަހަރު ނޮވެމްބަރު މަހު، ޔުނައިޓެޑްގެ ކޯޗު، އޮލެ ގުނަ ސޯލްޝެއާ ވަކިކުރުމުން އެ ސީޒަނުގެ ބާކީބައިގަ އެެވެ. އެ ފަހަރު ކެރިކަށް ޓީމުގެ ކޯޗުކަން ނުދީ ގެނައީ އަޔަކްސްގެ ކޯޗު އެރިކް ޓެން ހާގް އެވެ. ކެރިކް ވަނީ މިޑްލްސްބަރާގެ ހެޑް ކޯޗެއްގެ ގޮތުގައި މަސައްކަތްކޮށްފަ އެވެ.