ޖަލަށް ހުކުމްކޮށްފައި ތިބި ގައިދީންގެ ތެރެއިން ދެ ހާހެއްހާ މީހުން މުޖުތަމައަށް ދޫވެފައިވާ ކަމަށާއި އޭގެ ތެރެއިން ހާހެއްހާ މީހުން މި އަހަރުގެ ތެރޭގައި އަނބުރާ ޖަލަށް ގެންގޮސްފައިވާ ކަމަށް ހޯމް މިނިސްޓްރީން ބުނެފި އެވެ. ހޯމް މިނިސްޓްރީގެ ސްޓޭޓް މިނިސްޓަރު މުހައްމަދު ފަޔާޒް މިއަދު ވިދާޅުވީ، މި ސަރުކާރުން ވެރިކަމާ ހަވާލުވި އިރު، ޖަލުތަކުގައި ހުކުމް ތަންފީޒު ކުރަމުންދަނީ 500 އަށް ވުރެ މަދު އަދަދެއްގެ ގައިދީން ކަމަށެވެ. އެހެންވެ، އެކި ސަބަބުތަކާ ހުރެ ޖަލުން ދޫވެފައި ތިބި، އަދި ޖަލަށް ހުކުމްކޮށްފައި ތިބި ގައިދީން މުޖުތަމައުން ހޯދައު އެ މީހުން އަނބުރާ ޖަލަށް ގެންދިޔުމަކީ އެ މިނިސްޓްރީން ވަރަށް ބޮޑު އިސްކަމެއް ދޭ ކަމެއް ކަމަށް އޭނާ ވިދާޅުވި އެވެ. ފަޔާޒް ވިދާޅުވި ގޮތުގައި ފުލުހުންނާ ގުޅިގެން މިހާތަނަށް ކުރެވުނު މަސައްކަތްތަކުން މިހާތަނަށް ހާހެއްހާ ގައިދީން އަނބުރާ ޖަލަށް ވަނީ ގެންގޮސްފަ އެވެ. އޭނާ ވިދާޅުވީ "ދެވަނަ ފުރުސަތު"ގެ ދަށުން ކުރީ ސަރުކާރުން ދޫކޮށްލި ކުށްވެރިންގެ ތެރެއިން ގިނަ ބަޔަކު އަނބުރާ ޖަލަށް ފޮނުވާލާފައިވާ ކަމަށެވެ. "އަޅުގަނޑުމެން ދެވަނަ ފުރުސަތުގެ ހުރިހާ އެންމެންނެއް ހައްޔަރެއް ނުކުރަން. އަދި އެއިން މީހަކު މަގުމަތިން ފެނުނު ނަމަވެސް ޖަލަކަށް ނުގެންދަން. އެކަމަކު ދެވަނަ ފުރުސަތުގެ ދަށުން ދޫކޮށްލި ގިނަ ބަޔަކު ދެވަނަ ފަހަރަށް ދަނީ ކުށްތަކަށް އަރައިގަންނަމުން. މިފަދަ މީހުން އަޅުގަނޑުމެން އަނބުރާ ޖަލަށް މި ފޮނުވާލަނީ،" ފަޔާޒް ވިދާޅުވި އެވެ. އޭނާ ވިދާޅުވީ، މުޖުތަމައަށް ދޫވެފައިވާ އިތުރު 500އެއްހާ ގައިދީން ހޯދައު ހައްޔަރު ކުރުމުގެ މަސައްކަތް ޑީޕީއާރުއެސްއާ ގުޅިގެން މިނިސްޓްރީން ކުރަމުން އަންނަ ކަމަށެވެ. އަދި މުޖުތަމައަށް ދޫވެފައިވާ ގިނަ ކުށްވެރިންތަކެއް ހައްޔަރު ކުރުމުން، ކުށުގެ މިންވަރު ވެސް މަދުވެފައިވާކަން އޭނާ ފާހަގަ ކުރެއްވި އެވެ.