އައްޑޫ ބޮޑުހުޅުގެ މައްސަލާގައި ދައުލަތުން ދަޢުވާކުރާ ސާޅީސް ތިން މީހެއްގެ މައްސަލައިގެ ޝަރީޢަތް ފަށައިފިއެވެ.
މިއަދު ޝަރީޢަތް ފެށި ސާޅީސް ތިންމީހުންނަކީ މިއަހަރުގެ ފެބްރުއަރީމަހުގެ ހަތްވަނަދުވަހު ރާއްޖޭގެ ވެރިކަމުން އަމިއްލަފުޅަށް އިސްތިއުފާ ދެއްވުމަށްފަހު ކުރީގެ ރައީސް މުޙަންމަދު ނަޝީދު އިސްކޮށް ހުންނަވައިގެން ފެބްރުއަރީ 8 ވަނަ ދުވަހު މާލެއާއި އަތޮޅުތަކުގައި ހިންގި ހަމަނުޖެހުންތަކުގެ ތެރެއިން އައްޑޫ ސިޓީގައި ހަމަނުޖެހުން އުފައްދައި ހުޅުޖެހިކަމުގެ ތުހުމަތުގައި ހައްޔަރުކޮށްފައިވާ މަސާޅީސް ތިންމީހެކެވެ.
މިމައްސަލައިގެ ޝަރީޢަތުގެ ފުރަތަމަ އަޑުއެހުން މިއަދު ކްރިމިނަލް ކޯޓުގައި ބާއްވާފައިވާއިރު، ދައުވާ އުފުލާފައިވާ ފަރާތްތަކުގެ ތެރެއިން މިއަދު ކޯޓަށް ހާޒިރުވީ ތިރީސްފަސް މީހުންނެވެ. މިއަދުގެ ޝަރީޢަތުގައި މަޖިލީހަށް ޙާޒިރުވި މީހުންގެ ތެރެއިން އެންމެ މީހަކު ފިޔަވައި އެހެން އެންމެން ވަނީ ދަޢުވާގައި ކުރިއަށްދާން ބޭނުންވަނީ ޤާނޫނީ ވަކީލަކާއެކު ކަމަށް ބުނެ އެފުރުސަތަށް އެދިފައެވެ. ކޯޓުންވަނީ އެފުރުސަތު އެމީހުންނަށް ދީފައެވެ.
މިއަދުގެ ޝަރީޢަތުގެ މަޖިލީހަށް ހާޒިރުނުވާ އަށްމީހުންނަކީ ތަފާތު ސަބަބުތަކާހެދި އެމީހުންނަށް ޗިޓު ރައްދު ނުކުރެވުމުގެ ސަބަބުން ޙާޒިރުނުވާ މީހުންނެވެ. އޭގެތެރޭގައި ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު މުހައްމަދު ރަޝީދާއި، އައްޑޫ ސިޓީ ކައުންސިލްގެ ފޭދޫ ދައިރާގެ މެމްބަރު އަހުމަދު މިރުޒާދު ހިމެނެއެވެ.
އަމިއްލަފުޅަށް އިސްތިއުފާ ދެއްވުމަށްފަހު ނަޝީދު އިސްކޮށް ހުންނަވައިގެން ރާއްޖޭގެ އެކިކަންކޮޅުތަކުގައި ހަމަނުޖެހުން އުފައްދަވައި، ތަންތަނުގައި ހުޅުޖަހައި ދައުލަތާއި ޢާއްމުނަނަށް އެތައް މިލިއަން ރުފިޔާގެ ގެއްލުން ދީފައިވާއިރު، ނަޝީދާއި، މިހަމަނުޖެހުންތަކުގައި ބައިވެރި މީހުންގެ މައްސަލަ ނުބަލައި ލަސްކުރުމަށް އެދި އެމްޑީޕީން ދަނީ ކަމާބެހޭ ފަރާތްތަކުގައި ވާހަކަ ދައްކަމުންނެވެ. އަދި އެކަމަށް ގޮވާލައި އެޕާޓީން މުޒާހަރާ ކުރަމުންދާކަންވެސް ފާހަގަކުރެވެއެވެ.