ފުލުހުން ތަހުޤީޤު ކުރަމުންދާ ކުޑަކުއްޖަކަށް ޖިންސީ ގޯނާކުރި މައްސަލައަކާއި ގުޅިގެން ހޯދަމުންދާ ބިދޭސީއެއްގެ ފޮޓޯ އާއްމުކޮށްފިއެވެ.
ފުލުހުން ހޯދަމުންދާ ބިދޭސީއަކީ ބަންގްލަދޭޝްގެ ރައްޔިތެއްކަމުގައިވާ އުމުރުން 34 އަހަރުގެ ޝަފިކްއެވެ. ފުލުހުން ހާމަކުރާ ގޮތުގައި މި މީހާ ދިރިއުޅޭ ތަނެއް ނޭނގުމުގެ ސަބަބުން މި މީހާވަނީ ހޯދާ ނުފެނިފައެވެ.
މި މީހާ އާއި ބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ އެ މައުލޫމާތެއް، މޯލްޑިވްސް ޕޮލިސް ސަވިސްގެ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓްގެ ނަންބަރު 9790163، ނުވަތަ ހޮޓްލައިން ނަންބަރު 3322111 އަށް ގުޅުއްވައި ހިއްސާކުރުމަށް ފުލުހުން އެދިލައްވައެވެ.
މިފަދަ ކަންކަމުގައި އާއްމުންގެ ފަރާތުން ލިބޭ އެއްބާރުލުމަށް ފުލުހުންވަނީ ޝުކުރު އަދާކޮށްފައެވެ.