ވޯލްޑް ކަޕްގެ ”ގްރޫޕް ޖީ“ ގައި ބެލްޖިއަމްއާ ދެކޮޅަށް ކުޅުނު މެޗު އެއްވަރުވުމަށްފަހު، އީރާނުގެ ފުޓުބޯޅަ ޓީމުން ވަނީ އެމެރިކާގެ ލޮސް އެންޖެލަސްގެ ސޯފައި ސްޓޭޑިއަމްގެ ލޮކަރު ރޫމުގައި ޝުކުރުގެ މެސެޖެއް ދޫކޮށްފައެވެ.
އީރާނުގެ ފުޓުބޯޅަ ފެޑެރޭޝަނުން އާންމުކުރި އަތުލިޔުމުން ލިޔެފައިވާ އެ މެސެޖުގައި، ލޮސް އެންޖެލަސް އިން ދިން މެހެމާންދާރީއަށް ޝުކުރު އަދާކޮށް، އެ ޓީމު މުބާރާތުގައި ކުރިއަށް ދަނީ ފަހުރުވެރިކަމާއެކު ކަމަށް ވަނީ ބަޔާންކޮށްފައެވެ.
އެ މެސެޖުގައި އިތުރަށް ބުނެފައިވަނީ އީރާނުގެ ރޫހަކީ ދެމިއޮތް އެއްޗެއް ކަމަށާއި، ހުރިހާ ގައުމުތަކުގެ މެދުގައި ސުލްހަ އާއި ގުޅުން ބަދަހިކުރުމަށް އެ ޓީމުން ގޮވާލާ ކަމަށެވެ. މީގެ އިތުރުން މެޗުތަކުގައި ޓީމަށް ތާއީދުކުރި ސަޕޯޓަރުންނަށް ވެސް ޓީމުން ވަނީ ޝުކުރު އަދާކޮށްފައެވެ.
މި މުބާރާތުގައި އީރާނުގެ ޓީމު ބޭސްކޭމްޕެއްގެ ގޮތުގައި ބޭނުންކުރަމުން އަންނަނީ މެކްސިކޯގެ ޓިހުއާނާއެވެ. އެމެރިކާގެ ސަރުކާރުން އެޅި ފިޔަވަޅުތަކުގެ ސަބަބުން، ޓީމުގެ ބައެއް އޮފިޝަލުންނާއި ސްޓާފުންނަށް އެމެރިކާއަށް އެތެރެވުމުގައި ދަތިތަކެއް ކުރިމަތިވެފައިވެއެވެ. މިކަމާ ގުޅިގެން ޓީމުގެ ކޯޗު އަމީރު ގަލަނޯއީ ވަނީ އެ ޓީމަށް ކުރިމަތިވި މިފަދަ ދަތިތަކަކީ އެހެން ޓީމުތަކަށް ކުރިމަތިނުވާ ގޮންޖެހުންތަކެއް ކަމަށް ތަކުރާރުކޮށް ފާހަގަކޮށްފައެވެ.
ބެލްޖިއަމް އާ 0-0 އިން އެއްވަރުވި މި މެޗުގެ ނަތީޖާއާއެކު، އީރާނަށް އަދިވެސް މުބާރާތުގެ ނޮކް-އައުޓް ސްޓޭޖަށް ދިއުމުގެ ފުރުސަތު އެބައޮތެވެ. މުބާރާތުގެ ފުރަތަމަ މެޗުގައި ނިއުޒިލެންޑާ ވާދަކޮށް 2-2 އިން އެއްވަރުކޮށްފައިވާ އީރާން، ގްރޫޕް ސްޓޭޖުގެ ފަހު މެޗުގައި ނުކުންނާނީ މިސްރާ ދެކޮޅަށެވެ.