އަހުރެންގެ މިއެކުވެރިޔާގެ ނިމުން އަހުރެން ފާހަގަކުރަނީ އެންމެ ކާމިޔާބު ނިމުމެއްގެ ގޮތުގައެވެ. އެހެނީ އޭނާގެ އެންމެ ފަހުނަމާދު ޢޭނާކުރީ މަސްޖިދުއްނަބަވީގައި ދުނިޔެމަތީގައިވާ ސުވަރުގޭގެ ބިންކޮޅު، ރަވްޟާގައި އިމާމާގެ ފަހަތުގައެވެ. (ކުރީސަފުގައެވެ.) އެއަށްފަހު އޭނާ 2 ގަޑި އިރު މާތްކަން ލިބިގެންވާ ރަވްޟާގަ ހޭދަކުރިއެވެ. ފުރާނަ ގެންދެވީ އެއިގެ ކުޑަ އިރުކޮޅެއް ފަހުންނެވެ. 
ދެން މިކިޔައިދެނީ އެކަން ހިނގައިދިއަ ގޮތެވެ. 
އޭނާއަކީ އަހަރެންގެ ވަރަށް ގާތް ރަޙްމަތްތެރިއެކެވެ. އަހަރެމެން އެންމެން އެފަހަރު އުމުރާއަށް ދިއައީ އެކުގައެވެ. މައްކާގައި ކުރަންޖެހޭ ކަންކަން ކުރުމަށްފަހު ދިއައީ މަދީނާއަށެވެ. މަދީނާގައި އެއް ދުވަސް ހޭދަކުރުމަށްފަހު 2 ވަނަ ދުވަހު އޭނާ މެންދުރު ނަމާދު ކުރީ މަސްޖިދުއްނަބަވީގައި ރަވްޟާގައި އިމާމާގެ ފަހަތުގައެވެ. (ކުރީސަފުގައެވެ.) އެއަށްފަހު އޭނާ 2 ގަޑި އިރު މާތްކަން ލިބިގެންވާ ރަވްޟާގަ ހޭދަކުރިއެވެ. 
އެއަށްފަހު އޭނާގެ މޭގައި ރިއްސަން ފެށިއެވެ. މޭގެ ރިހުން މާގަދަވުމުން އޭނާ ތަޅުންމަތީގައި އޮށޯތެވެ. ޢާއިލާގެ އެންމެން ވަށާލައިގެން ތިއްބައި މަޣްރިބް ނަމާދަށް ބަންގި ގޮވިވަގުތަކީ ﷲ ތަޢާލާ އެކަލާނގެ މަތިވެރި ޙަޟްރަތަށް އޭނާގެ ފުރާނަ ގެންދެވި ވަގުތެވެ. މަރުވެދިއައީ ޝަހާދަތް ކިޔުންމަތީގައެވެ. 
ފަސްދާނުލެވިފައިވަނީ އަލްބަޤިޢާ (ޖަންނަތުލްބަޤިޢާ) ޤަބުރުސްތާނުގައެވެ. އެއީ ރަސޫލް ޞައްލަﷲ ޢލައިހި ވަސައްލަމަ ގެ އަމިއްލަފުޅު ޢާއިލާގެ ގިނަ އަދަދެއްގެ ބޭފުޅުންނާއި ގިނަ އަދަދަދެއްގެ ޞަޙާބީންނާއި ޝަހީދުން ފަސްދާނުލެވިފައިވާ ޤަބުރުސްތާނެކެވެ. ވީމާ އޭނާ ވެސް ފަސްދާނު ލެވިގެން އެދިއައީ މަޙްޝަރު ދުވަހު ރަސޫލް ރަސޫލް ޞައްލަﷲ ޢލައިހި ވަސައްލަމަ ގެ ޝަފާޢަތް ލިބޭނެކަމަށް ވަރަށް ބޮޑަށް އުންމީދުކުރެވޭ ގޮތަށެވެ. 
މީސްތަކުންނޭވެ! އޭނާ ނިޔާވުމުން ކިތަންމެހައިވެސް ދެރަވިއެވެ. ނަމަވެސް އޭނާ ނިޔާވީ އޭނާ އެކަމަށް އެދުނު ގޮތަށެވެ. އެ ޝަރަފް އޭނާއަށް ލިބުނީ ހަމަ ހުރެލާފައި އެކަމަށް އެދުމަކުން ނޫނެވެ. އެކަމަށްޓަކައި ގަދައަޅައި މަސައްކަތްކޮށްގެންނެވެ. 
އޭނާއަކީ ފަތިސް ނަމާދު ޤަވާއިދުން ޖަމާއަތުގައި ކުރަމުން އައި މީހެކެވެ. މިސްކިތުން ފައިބަނީ 9 ޖަހައިލީމައެވެ. އެހައިއިރު ވަންދެން އޭނާ މިސްކިތުގައި އިނދެ ކުރި މަސައްކަތަކީ ކީރިތި ޤްރްއާން ހިތުދަސްކުރުމެވެ. ދުވާލަކު ކޮންމެވެސް މިންވަރެއް ދަސްކޮށްފައި ނޫނީ އޭނާ މިސްކިތަކުން ނުފައިބައެވެ. އެގޮތުގައި މަސައްކަތްކޮށް އޭނާ ކީރިތި ޤްރްއާން ހިތުދަސްކުރިއެވެ. އެއަށްފަހު މުސްލިމް އިލްމްވެރިން ހިންގާ ސްކޫލަކަށް ގޮސް އިމްތިޙާނުގައި ބައިވެރިވެ ޙާފިޛަކަށްވިއެވެ. 
މިވާހަކައިން ބުނެދޭންވީ ވާހަކައަކީ ރަނގަޅު ގޮތުގައި މަރުގެންދެވުމަށް އެދޭނަމަ އެކަމަށް އެދިގެން މަސައްކަތް ކުރަން ޖެހޭ ކަމެވެ. ހަމަ ހިތަށް އެރިހައި ގޮތަކަށް އުޅެމުން އެންމެ ރަނގަޅު ގޮތުގައި މަރު ގެންދެވުމަށް އެދުމަކުން ކުރާނެ ފައިދާއެއް ނެތިދާނެ ކަމެވެ. ވީމާ ހަމަ ކޮންމެ މީހަކުވެސް ޥީހައި ބޮޑަށް އެކަމަށް އެދިގެން މަސައްކަތްކުރާށެވެ! ﷲ ތަޢާލާ ނިޢްމަތްތައް މިންވަރު ކުރައްވަވަނީ ވަކި މީހަކަށް ނޫނެވެ. އެކަމަށް އެދިގެން މަސައްކަތްކުރާ އެންމެންނަށެވެ. 
- ޝައިޚް މުޙައްމަދު ހޮބޮލޮސްގެ ދަރުސަކުން
https://www.youtube.com/watch?v=u6y4MxMvTwY
ވިސްނައިލާށެވެ! އަހަރެމެންގެ ތެރެއިން ގިނަ މީހުން އަބަދުވެސް އުޅޭނީ އެމީހާ ކުރަން ބޭނުންވި ކަންކަން އެމީހާ ބޭނުންވި ގޮތަށް ޙާޞިލުނުކުރެވިގެންނެވެ. ތިމާއަށް ﷲ ތަޢާލާ ކުރަން އެންގެވި ކަންކަން ފުރިހަމަކުރެވޭ ގޮތާއިމެދު ނުވެސް ވިސްނާނެއެވެ.
ކޮންމެ ކަމެއްވެސް ތިމާ އެދޭ ގޮތަށް ޙާޞިލުކުރެވޭނީ އެކަމަކަށް އެދުމުގެ އިތުރުން އެކަމަށް އެދިގެން ތިމާ ކުރަންޖެހޭ މަސައްކަތްވެސް ކުރި މީހަކަށެވެ. ވީމާ ރަނގަޅު ނިމުމަމަކަށް އެދޭމީހާ އެކަމަށް އެދިގެން މަސައްކަތްކުރަންވާނެއެވެ. އެއިރުން އެމީހަކަށް އެކަން ހިންމަވައިދެއްވަވާނެތެވެ. އިން ޝާ ﷲ 
ޝައިޚް ހޮބްލޮސް ވިދާޅުވެދެއްވާފައި އެވަނީ ﷲ ތަޢާލާގެ ރުހިވޮޑިގަތުން ހޯދަން ގަދައަޅައި މަސައްކަތްކުރަމުން އައި ޒުވާނެއްގެ މަރު، އޭނާ އެދޭފައިން އެންމެ މަތީ ފެންވަރުގައި ﷲ ތަޢާލާގެ ޙަޟްރަތަށް އުފުލުނު ގޮތުގެ އުފާވެރި ވާހަކައެވެ. މިފަދަ ފުރުޞަތުތައް، އެކަމަށް އެދިގެން މަސައްކަތްކުރާ ކޮންމެ މީހަކަށްވެސް އެބައޮތެވެ. އިން ޝާ ﷲ