ގާތްގަނޑަކަށް އެއްލައްކަ ރުފިޔާގެ ކެނަބިހާ އެކު އިންޑިއާ ފިރިހެނަކު އެއާޕޯޓުން ހިފަހައްޓައިފިއެވެ.
ކަސްޓަމުން މިއަދު ބުނީ މި މަހުގެ 13 ވަނަ ދުވަހު ވައިގެ މަގުން އައި އިންޑިއާގެ ފިރިހެނެއްގެ ލަގެޖުގައި މަސްތުވާތަކެތި ހުރި ކަމަށް ޝައްކުކުރެވިގެން ބަލައި ފާސްކުރި ކަމަށެވެ.
އެ މީހާގެ ލަގެޖު ފާސްކޮށް ފެނުނު ތަކެތި ފުރަތަމަ މަރުހަލާގައި ތަހްލީލުކުރިއިރު ކެނަބިހަށް ޕޮޒިޓިވް ކަމަށާއި، ޕެކިން އާ އެކު ބަރުދަނުގައި ޖުމްލަ 235 ގްރާމް ހުރި ކަމަށް ކަސްޓަމުން މައުލޫމާތު ދެއެވެ. އެ ތަކެތީގެ މަގުމަތީ އަގު ގާތްގަނޑަކަށް ލައްކައަކަށް އަރާ ކަމަށް ވެސް ބުންޏެވެ.
މި މައްސަލަ އިތުރަށް ތަހްގީގުކުރުމަށްޓަކައި މަސްތުވާތަކެއްޗާ އެކު، 31 އަހަރުގެ އެ މީހާ ފުލުހުންނާ ހަވާލުކޮށްފައިވާ ކަމަށް ވެސް ކަސްޓަމުން ބުންޏެވެ.
ކަސްޓަމުން މިފަދައިން ބުނީ މި ފެށޭ އާ އަހަރާ ދިމާކޮށް މަސްތުވާތަކެތީގެ ވިޔަފާރި ހުއްޓުވުމަށްޓަކައި ފުލުހުން އޮޕަރޭޝަނެއް ފަށާފައިވާކަން ހާމަކޮށްފައިވަނިކޮށެވެ.