މިދިޔަ އަހަރުގެ ހަތަރު ވަނަ ކުއާޓަރުގައި އެސްޓީއޯ އަށް ޖުމްލަ އާމްދަނީގެ ގޮތުގައި 4.1 ބިލިއަން ރުފިޔާ ލިބިފައިވާ ކަމަށް އެ ކުންފުނިން ބުނެފިއެވެ.
އެސްޓީއޯ އިން އާންމުކުރި މިދިޔަ އަހަރުގެ ހަތަރު ވަނަ ކުއާޓަރުގެ ހިސާބުތައް ދައްކާ ގޮތުގައި އެ ކުއާޓަރުގައި ޖުމްލަ އާމްދަނީ ގޮތުގައި 4.1 ބިލިއަން ރުފިޔާ ލިބިފައިވާ އިރު އެއީ އެ އަހަރުގެ ތިން ވަނަ ކުއާޓަރާ އަޅާ ބަލާއިރު 8 ޕަސެންޓްގެ އިތުރުވުމެކެވެ. ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ ހުރިހާ ދާއިރާތަކުގެ ވިޔަފާރި ރަނގަޅުވުން ކަމަށް އެސްޓީއޯ އިން ބުނެއެވެ.
އެގޮތުން ތެލުގެ އާމްދަނީ 4 ޕަސެންޓް އިތުރުވެފައިވާ އިރު އެހެނިހެން އާމްދަނީ ވަނީ 19 ޕަސެންޓުން އިތުރުވެފައި ކަމަށް އެސްޓީއޯ އިން ބުނެއެވެ. ޖުމްލަ އާމްދަނީ އިތުރުވުމާއެކު ޖުމްލަ ފައިދާގެ ގޮތުގައި 671 މިލިއަން ރުފިޔާ ލިބިފައިވާ އިރު މިއީ މީގެ ކުރީ ކުއާޓަރާ އަޅާ ބަލާ އިރު 11 ޕަސެންޓްގެ އިތުރުވުމެކެވެ.
ހިންގުމުގެ ފައިދާ އޭގެ ކުރީ ކުއާޓަރާ އަޅާ ބަލައި 11 ޕަސެންޓް އިތުރުވެ، 322 މިލިއަން ރުފިޔާ ލިބިފައި ވެއެވެ. އަދި ފައިނޭންސް ކުރުމުގެ ހަރަދު ކުޑަކުރެވުމާއެކު ޓެކްސްއަށް ކެނޑުމުގެ ކުރިން ސާފު ފައިދާގެ ގޮތުގައި 276 މިލިއަން ރުފިޔާ ލިބިފައިވާ ކަމަށް އެސްޓީއޯ އިން ބުނެއެވެ. މިއީ މީގެ ކުރީ ކުއާޓަރާ އަޅާ ބަލާ އިރު 20 ޕަސެންޓްގެ އިތުރުވުމެކެވެ. ޓެކުހަށް ކެނޑުމަށްފަހު މިދިޔަ އަހަރުގެ ހަތަރު ވަނަ ކުއާޓަރުގެ ސާފު ފައިދާގެ ގޮތުގައި ވަނީ 244 މިލިއަން ރުފިޔާ ލިބިފައެވެ.
އެސްޓީއޯ އިން ބުނީ 2025 ވަނަ އަހަރު ކުންފުނީގެ ވިޔަފާރި ރަނގަޅު ވުމާއެކު ޖުމްލަ އާމްދަނީގެ ގޮތުގައި ވަނީ 15.5 ބިލިއަން ރުފިޔާ ލިބިފައި ކަމަށެވެ. މިއީ މީގެ ކުރީ އަހަރާ އަޅާ ބަލާ އިރު 98 މިލިއަން ރުފިޔާގެ އިތުރުވުމެކެވެ. އާމްދަނީ އިތުރުވުމާއެކު ކުންފުނީގެ ފައިދާ އިތުރުވެ ޓެކްސްއަށް ކެނޑުމުގެ ކުރިން ވަނީ 910 މިލިއަން ރުފިޔާ ލިބިފައެވެ. ޓެކުހަށް ކެނޑުމަށްފަހު ސާފު ފައިދާގެ ގޮތުގައި ވަނީ 762 މިލިއަން ރުފިޔާ ލިބިފައެވެ. މިއީ، އޭގެ ކުރީ އަހަރާ އަޅާ ބަލާއިރު 3 ޕަސެންޓްގެ އިތުރުވުމެކެވެ.