ފީފާ ވޯލްޑް ކަޕް ފުޓްބޯޅަ މުބާރާތް ފެށެން ފަސް ދުވަހަށް ވެފައިވަނިކޮށް، މުބާރާތުގައި ވާދަކުރާ އިރާން ގައުމީ ޓީމުގެ ކުޅުންތެރިންނަށް އެމެރިކާއަށް އެތެރެވުމުގެ ވިސާ ދީފިކަމަށް ވައިޓް ހައުސްގެ އިސް އޮފިޝަލަކު ކަށަވަރުކޮށްދެއްވައިފިއެވެ. އިރާން ޓީމަށް ވިސާ މި ލިބުނީ، ލޮސް އެންޖެލިސްގައި އެގައުމު ކުޅޭ ފުރަތަމަ މެޗަށް އެންމެ 10 ދުވަހަށް ވެފައި ވަނިކޮށެވެ. މެކްސިކޯގައި ހުންނަވާ އިރާނުގެ ސަފީރު އަބުލްފަޒްލް ޕަސަންދީދޭ ބުރާސްފަތި ދުވަހުގެ ރޭ ވިދާޅުވީ އޭރުވެސް ޓީމަށް ވިސާ ނުލިބޭ ކަމަށެވެ. ނަމަވެސް، ވައިޓް ހައުސްގެ އޮފިޝަލް ރޮއިޓާސްއަށް މައުލޫމާތު ދެއްވި ގޮތުގައި، މިއަދުގެ ވަގުތެއްގައި ޓީމުގެ ހުރިހާ ކުޅުންތެރިންނަށް ވިސާ ހަމަޖައްސާދީފައިވާ ކަމަށެވެ. ވިސާގެ މައްސަލަތަކާ ހުރެ އަދި އެމެރިކާގައި އިރާން ޓީމުގެ ހަރަކާތްތައް ވީހާވެސް މަދުކުރުމުގެ ބޭނުމުގައި، އިރާނުން ވަނީ ޓީމު ކޭމްޕްކުރުމަށް ކުރިން ހަމަޖެއްސި އެމެރިކާގެ އެރިޒޯނާގެ ބަދަލުގައި، މެކްސިކޯގެ ބޯޑަރު ކައިރީގައި އޮންނަ ޓިހުއާނާއަށް އެންމެ ފަހު ވަގުތު ބަދަލުކޮށްފައެވެ. އިރާން ޓީމު އާދިއްތަ ދުވަހުގެ ހެނދުނު މެކްސިކޯގެ ޓިހުއާނާއަށް ދިއުމަށް ވަނީ ހަމަޖެހިފައެވެ. 1930 ވަނަ އަހަރު ވޯލްޑް ކަޕް ބާއްވަން ފެށީއްސުރެ، މުބާރާތް ބާއްވާ ގައުމަކުން އެގައުމަކާ ހަނގުރާމައެއްގެ ހާލަތުގައި އޮތް ގައުމެއްގެ ޓީމަކަށް މަރުހަބާ ކިޔަންޖެހޭ މިއީ ފުރަތަމަ ފަހަރެވެ. އެހެންކަމުން މިއަހަރުގެ ވޯލްޑް ކަޕް މިހާރު ވަނީ ސިޔާސީ ބޮޑު ކުރިމަތިލުމަކަށް ބަދަލުވެފައެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ މިދިޔަ އަންގާރަ ދުވަހު ވިދާޅުވެފައިވަނީ، އިރާނުގެ ރިވޮލިއުޝަނަރީ ގާޑްސްއާ ގުޅުންހުރި އެއްވެސް އޮފިޝަލަކަށް ނުވަތަ މީހަކަށް އެމެރިކާއަށް އެތެރެވުމުގެ ހުއްދަ ނުދޭނެ ކަމަށެވެ. އިރާނުގައި ކޮންމެހެން އަދާކުރަންޖެހޭ ސިފައިންގެ ހިދުމަތް މި ބާރުގެ ދަށުގައި ފުރިހަމަކޮށްފައިވާ ބައެއް ކުޅުންތެރިން ޓީމުގައި ހިމެނޭތީ ވިސާ ދިނުމުގައި ގޮންޖެހުންތަކެއް ކުރިމަތިވިއެވެ. މީގެ އިތުރުން، ކުރިން ރިވޮލިއުޝަނަރީ ގާޑްސްގެ ކޮމާންޑަރެއްގެ ގޮތުގައި ހުންނެވި އިރާން ފުޓްބޯޅަ ފެޑެރޭޝަންގެ ރައީސް މަހްދީ ތާޖަށް، މިދިޔަ ޑިސެމްބަރު މަހު ވޮޝިންގްޓަންގައި ބޭއްވި މުބާރާތުގެ ގުރުއަތުލުމުގެ ރަސްމިއްޔާތަށް އެމެރިކާއަށް އެތެރެވުމުގެ ހުއްދަވެސް ދީފައެއް ނުވެއެވެ. އިރާނުގެ ސަފީރު ޕަސަންދީދޭ ވިދާޅުވީ، ދެގައުމުގެ ދެމެދުގައި ހަނގުރާމައިގެ ހާލަތެއް އޮތް ނަމަވެސް އިރާނުން ވޯލްޑް ކަޕްގައި ވާދަކުރަން ބޭނުންވުމަކީ އެގައުމުން ސުލްހައަށް އެދޭކަމުގެ ހެކިލިބޭ ކަމެއް ކަމަށެވެ. މިއަހަރުގެ ވޯލްޑް ކަޕްގެ ގްރޫޕް ޖީގައި އިރާން ހިމެނޭއިރު، އެގައުމުގެ ފުރަތަމަ މެޗުގައި ޖޫން 15 ވާ ހޯމަ ދުވަހު ލޮސް އެންޖެލިސްގައި ނިއުޒީލޭންޑާ ދެކޮޅަށް ނުކުންނާނެއެވެ. މި ގްރޫޕްގައި ދެން އިރާން ވާދަކުރާނީ ބެލްޖިއަމް އަދި މިސްރާއެވެ.