ތިން މަސް ވަންދެން ކުޅުމާ ދުރުގައި ހުރެ އަލުން ދަނޑަށް ނުކުތް ބުކާޔޯ ސަކާ ރޭ ފުލަމް ކޮޅަށް ޖެހި ރީތި ލަނޑާ އެކު އާސެނަލްއަށް އާ ދިރުމެއް ލިބިއްޖެ އެވެ.
ރޭ 2-1 އިން މޮޅުވެ ލިވަޕޫލްއާ ދެމެދު އޮތް ޕޮއިންޓްގެ ތަފަތު ވަނީ ނުވަ ޕޮއިންޓަށް ކުޑަކޮށްފަ އެވެ. އެކަމަކު މިއީ ތިން މެޗުގެ ތަފާތެއް ކަމުން ލިވަޕޫލްއާ އަރާ ހަމަކުރުމަކީ ވުމަށް ވުރެ ނުވުން ކައިރި ކަމެއް ކަމަށް، ދިރާސާވެރިން ބުނެ އެވެ.
ސަކާ ކުޅެން ނުކުތީ 66 ވަނަ މިނިޓްގަ އެވެ. އޭނަ ލަނޑު ޖެހީ 73 ވަނަ މިނިޓްގައި ޒުވާން ވިންގާ ގެބްރީލް މާޓިނެއްލީ ވަރަށް ރީއްޗަށް ފުންނާބުން ގޯލުގެ ކުރިމައްޗަށް ހުރަސްކޮށްލި ބޯޅައެއްގައި، ހުހަށް ހުރެ ބޮލުން ފޮނުވާލައިގެންނެވެ.
އެކަމަކު ސަކާގެ އަނބުރި އައުން އުފާވެރިޔަސް މެޗުގެ 16 ވަނަ މިނިޓްގައި ދިފާއީ ކުޅުންތެރިޔާ ގެބްރީލް މަގަލެސްއަށް އަނިޔާވެގެން ޖެހުނީ ބާލާށެވެ. މިއީ އަންނަ ހަފުތާގައި އޮންނަ ޗެމްޕިއަންސް ލީގުގެ ކްއާޓާ ފައިނަލްގައި ރެއާލް މެޑްރިޑްއާ ދެކޮޅަށް ނުކުންނަ އިރު ކޯޗު މިކޭލް އާޓެޓާއަށް ކުރިމަތިވި ބޮޑު ހާސްކަމެކެވެ.
އިނގިރޭސި ޕްރިމިއަ ލީގުގައި މިރޭ ދަންވަރު ލިވަޕޫލުން އެ ޓީމުގެ އެންމެ ބޮޑު ވާދަވެރިޔާ އެވަޓަންއާ ދެކޮޅަށް ނުކުންނާނެ އެވެ. މި މެޗުން ލިވަޕޫލް މޮޅުވެއްޖެ ނަމަ ޕްރިމިއަ ލީގު ހޯދަން އެހެން ޓީމަށް ކުރެވޭނެ މާ ބޮޑު ކަމެއް އޮންނާނެ ކަމަކަށެއް ނުފެނެ އެވެ.