އޭޝިއާގެ ކަނޑުގެ ސަރަހައްދުން ދަތުރުކުރަމުންދިޔަ އީރާނުގެ ތެޔޮ ޓޭންކަރުތަކުގެ ތެރެއިން މަދުވެގެން ތިން އުޅަނދެއް އެމެރިކާގެ އަސްކަރިއްޔާއިން ހިފަހައްޓައިފި އެވެ.
ޝިޕިން އަދި ސަލާމަތީ ދާއިރާގެ އޮފިޝަލުން ވިދާޅުވި ގޮތުގައި، އިންޑިއާ، މެލޭޝިއާ އަދި އޭޝިއާގެ ބައެއް އެހެން ގައުމުތަކާ ކައިރިން ދަތުރުކުރަމުންދިޔަ މި އުޅަނދުތައް މިހާރު ވަނީ އެހެން މިސްރާބުތަކަށް އަނބުރާލާފަ އެވެ. މިއީ އީރާނާ ދެކޮޅަށް އެމެރިކާއިން ކުރިއަށްގެންދާ ކަނޑުގެ ހަރަކާތްތައް އިތުރަށް ފުޅާކުރުމުގެ ތެރެއިން އެޅި ފިޔަވަޅެކެވެ.
މިއީ އީރާނުގެ ވިޔަފާރިތަކަށް ހުރަސްއެޅުމުގެ ގޮތުން އެމެރިކާއިން ކުރިއަށްގެންދާ ކަނޑުގެ ހުރަސްއެޅުން ވަރުގަދަކުރަމުންދާ ދަނޑިވަޅެއްގައި ހިނގި ކަމެކެވެ. ހަމަ އެއާ އެކު، ދުނިޔޭގެ ހަކަތައިގެ މައި މަގު ކަމަށްވާ ހޮރްމޫޒް ކަނޑުއޮޅިން ދަތުރުކުރާ އުޅަނދުތަކަށް އީރާނުން ވެސް ދަނީ ހުރަސްއަޅަމުންނެވެ.
މި ކުރިމަތިލުންތަކުގެ ސަބަބުން ދުނިޔޭގެ ތެލާއި ގޭހުގެ ސަޕްލައިގެ ފަސްބައިކުޅަ އެއްބަޔަށް އަސަރުކޮށް، ހަކަތައިގެ ބޮޑު ދަތިކަމެއް ވަނީ ކުރިމަތިވެފަ އެވެ.
ހިފެހެއްޓި އުޅަނދުތަކުގެ ތެރޭގައި 2 މިލިއަން ފީފާގެ ތެޔޮ ބަރުކޮށްފައިވާ 'ޑޮރޭނާ' ނަމަކަށް ކިޔާ ސުޕަޓޭންކަރަކާއި އޭގެ ޖާގައިގެ %65އަށް ތެޔޮ ބަރުކޮށްފައިވާ 'ސެވިން' ޓޭންކަރު ހިމެނެ އެވެ. މީގެ އިތުރުން، 'ޑީޕް ސީ' ނަމަކަށް ކިޔާ އުޅަނދެއްގެ މިސްރާބު ވެސް ވަނީ ބަދަލުކޮށްލާފަ އެވެ. އަދި އިންޑިއާއަށް މުދާ ބާލަން އުޅުނު 'ދަރިޔާ' ނަމަކަށް ކިޔާ ހަތަރުވަނަ ޓޭންކަރެއް ވެސް އެމެރިކާއިން ހިފަހައްޓާފައިވާ ކަމަށް ބެލެވެ އެވެ.
އެމެރިކާގެ ސެންޓްރަލް ކޮމާންޑުން ބުނި ގޮތުގައި، ބްލޮކޭޑާ ހިލާފުވާން އުޅުމުން 'ޑޮރޭނާ' މިހާރު ދަތުރުކުރަމުންދަނީ އެމެރިކާގެ މަނަވަރެއްގެ ބެލުމުގެ ދަށުން އިންޑިއާ ކަނޑުގަ އެވެ. އަދި މި ބްލޮކޭޑް ފެށި ފަހުން މިހާތަނަށް ޖުމްލަ 29 އުޅަނދަކަށް އެމެރިކާއިން ހުރަސްއަޅައި އަނބުރާ ފޮނުވާލާފައިވާ ކަމަށް ވެސް އެ އިދާރާއިން ބުންޏެވެ.
ކަނޑުގެ ސަލާމަތީ ކަންކަން ދިރާސާކުރާ ބޭފުޅަކު ފާހަގަކުރެއްވި ގޮތުގައި، ގަލްފުގެ ސަރަހައްދުގައި ހުރި މައިންތަކުގެ ނުރައްކަލުން ސަލާމަތްވުމަށްޓަކައި، އެމެރިކާއިން މިހާރު އީރާނުގެ އުޅަނދުތައް ހިފަހައްޓަމުންދަނީ ގަލްފުން ބޭރުން ހުޅުވިފައިވާ ކަނޑުގެ ސަރަހައްދުތަކުންނެވެ.
މި ހާދިސާތައް ހިނގާފައި މިވަނީ ދެ ފަރާތުން ވެސް އަނެއް ބައެއްގެ އުޅަނދުތައް ހިފަހައްޓަމުންދާ ދަނޑިވަޅެއްގަ އެވެ. އީރާނުން ވެސް ވަނީ ހޮރްމޫޒް ކަނޑުއޮޅިން ދަތުރުކުރި ބައެއް އުޅަނދުތަކަށް ހަމަލާދީ ހިފަހައްޓާފަ އެވެ.
މިހާރު ހަނގުރާމަ މެދުކަނޑާލުމުގެ އެއްބަސްވުމެއް އޮތް ނަމަވެސް، މައްސަލަ ހައްލުކުރުމުގެ މަޝްވަރާތައް އަލުން ފެށޭނެ ކަމުގެ މާ ބޮޑު ނިޝާނެއް ނުފެނެ އެވެ. އަދި ކަނޑުގެ މައި މަގުތަކުގައި އޮތް ނުތަނަވަސްކަން ދަނީ ދުވަހެއް ދުވަހަކަށް އިތުރުވަމުންނެވެ.