ފެނާއި ކަރަންޓާއި ނަރުދަމާ އަދި އިންޓަނެޓްގެ ހިދުމަތް ފޯރުކޮށްދޭ ފަރާތްތަކުން ގޭބިސީތަކަށް ފޯރުކޮށްދޭ ޚިދުމަތް ހަމަހަމަ ކުރަން މަޖުބޫރުކުރާ އިސްލާހެއް ގެނަނަން ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ހުށަހަޅުއްވައފިއެވެ.
މުދާ ގަންނަ ފަރާތްތަކާއި ހިދުމަތް ލިބިގަންނަ ފަރާތްތައް ހިމާޔަތްކުރުމުގެ ގާނޫނަށް މުހައްމަދު އިބްރާހިމް ހުށަހެޅުއްވި އިސްލާހުގައި ވަނީ ފެނާއި ކަރަންޓާއި ނަރުދަމާ އަދި އިންޓަނެޓްގެ ހިދުމަތް ފޯރުކޮށްދޭ ފަރާތްތަކުން ފޯރުކޮށްދޭ ޚިދުމަތް، އެ ގެއެއްގެ ހުރިހާ ހިސާބަކަށް އެއްމިންވަރަށް، އެއްބާރުމިނުގައި ފޯރުކޮށްދޭންޖެހޭނެ ކަމަށެވެ.
މީގެ އިތުރުން ގެއަކަށް ޚިދުމަތްތައް ގުޅުމާ އެކު އެ ތަނުގެ އެންމެހާ ކޮޓަރިތަކަށާއި ފަހާނާތަކާއި އަދި އެ ގެއެއްގެ ހުރިހާ ހިސާބަކަށް އެއްމިންވަރެއްގައި އެ ޚިދުމަތް ލިބޭކަން ކަށަވަރު ކުރުމަކީ އެ ޚިދުމަތް ދޭ ފަރާތުގެ ޒިންމާއެއް ކަމަށް އިސްލާހުގައި ވެއެވެ.
ހަމައެހެންމެ ޚިދުމަތް އެއް ހަމައެއްގައި ފޯރުކޮށްދިނުމަށް އިތުރު ފީއެއް ނައިގެން ނުވާނެކަމަށާއި، ޚިދުމަތް ފޯރުކޮށްދޭ ފަރާތުން އެ ޤާނޫނައި ހިލާފުވެއްޖެ ނަމަ، ޝަރުއީ ކޯޓަށް މައްސަލަ ހުށަހަޅައިގެން ގެއްލުމުގެ ބަދަލު ހޯދުމުގެ ފުރުސަތު އޮންނާނެ ކަމަށް ވެސް އިސްލާހުގައި ބުނެފައިވެ އެވެ. މީގެ ތެރޭގައި ޕްރައިވެޓް، ޕަބްލިކް އަދި ސަރުކާރު ހިއްސާވާ ކުންފުނިތައް ވެސް ހިމެނެއެވެ.
ރައްޔިތުންނަށް އަސާސީ ޚިދުމަތްތައް ފޯރުކޮށްދިނުމުގައި ތަފާތުކުރުން ހުންނަ ކަމުގެ ޝަކުވާ އަބަދުވެސް އޮވެއެވެ. އެގޮތުން ސްޕީޑް ދައްކޮށް ފެން ލިބުމާއި ކަރަންޓުގެ އެކިއެކި މައްސަލަތަކާއި، އިންޓަނެޓް މައްސަލަތައް ފާހަގަ ކުރެވެއެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi