ގޭޖް މޯލްޑިވްސް އުފެއްދީ 21 ޖުލައި 2010ގަ އެވެ. އެއީ ހިދުމަތެއްގެ ގޮތުގައި ސަލާމަތާއި ރައްކާތެރިކަން ފަރުދުންނާއި ވިޔަފާރިވެރިތަކަށް ފޯރުކޮށްދިނުމަށެވެ.
ރޭ ބާސެލޯ ނަސަންދުރައިގައި އެ ކުންފުނިން އެ ފާހަގަކުރީ ސާބިތުވެ ތިބެ އެ ހިދުމަތުގައި ހޭދަކުރި ކާމިޔާބު 15 އަހަރެވެ.
ގޭޖަކީ 21 ޖުލައި 2010ގައި ކުރީގެ ޕޮލިސް ކޮމިޝަނަރު އަބްދުﷲ ރިޔާޒު އިސްވެ ހުންނަވައި އުފެއްދި، ވަށައިޖެހޭ ސަލާމަތީ ހިދުމަތްތައް ދޭ އަމިއްލަ ކުންފުންޏެކެވެ.
މިވީ 15 އަހަރުގެ ތެރޭގައި ގޭޖްގެ ރައްކާތެރިކަމުގެ އައްޑަނަ އިތުރަށް ވަރުގަދަކޮށް، ސެކިއުރިޓީގެ އިތުރުން ފަޔާ ސޭފްޓީ އާއި އެކި ދާއިރާތަކުން މީހުން ތަމްރީންކުރުމުގެ ހިދުމަތް ވެސް އަންނަނީ ފޯރުކޮށްދެމުންނެވެ.
ގޭޖުން ދޭ ބައެއް ހިދުމަތްތަކުގެ ތެރޭގައި:
ރިސޯޓު، އިންޑަސްޓްރިއަލް، މެރިން އަދި އިވެންޓު ސެކިއުރިޓީ
ފަޔާ ސޭފްޓީ
ޕްރޮޓެކްޝަން
ސެކިއުރިޓީ އެސެސްމަންޓް
ޕްރައިވެޓް އިންވެސްޓިގޭޝަން
އެކްސެސް ކޮންޓްރޯލް، ސީސީޓީވީ އަދި މޮނީޓަރިން
ކޭޝް އިން ޓްރާންސިޓް ހިދުމަތް
ޓްރެއިނިން (ފަޔާ ބްރިގޭޑް، ލައިފް ގާޑު، އެމަޖެންސީ ފަސްޓް އެއިޑް އަދި ސެކިއުރިޓީ އޮފިސާ ޓްރެއިނިން)
ރޭގެ ރަސްމިއްޔާތު ޝަރަފުވެރި ކޮށްދެއްވީ ޓޫރިޒަމް މިނިސްޓަރު ތޯރިގު އިބްރާހިމް އެވެ. އޭނާ ދެއްކެވި ވާހަކައިގައި އެ ކުންފުންޏަށް ފާގަތި މުސްތަގްބަލަކާއި އިތުރު ކާމިޔާބީތަކަށް އެދިވަޑައިގެން، އެ ކުންފުނީގެ ވެރިންނާއި މުވައްޒަފުންނަށް ވަނީ މަރުހަބާ ދަންނަވާފަ އެވެ.
ރޭގެ ރަސްމިއްޔާތުގައި ގޭޖުން ވަނީ އެ ކުންފުނީގެ އާ ބްރޭންޑް އައިޑެންޓިޓީ އިފްތިތާހުކުރުމުގެ އިތުރުން ތަފާތު ތިން ދާއިރާއަކުން ގިނަ އަދަދެއްގެ އެވޯޑު ވެސް އެކި ފަރާތްތަކަށް ދީފަ އެވެ.
އޭގެ ތެރޭގައި 45އަށް ވުރެ ގިނަ ފަރާތްތަކަށް އެޕްރިސިއޭޝަން އެވޯޑާއި އެ ކުންފުންޏަށް 8 އަހަރާއި 9 އަހަރު ހިދުމަތް ކުރި މުވައްޒަފުންނަށް ސާވިސް އެވޯޑު އަދި އެއަށް ވުރެ ދިގު މުއްދަތަކަށް ހިދުމަތް ކުރި މުވައްޒަފުންނާއި އެހެނިހެން ކަންކަމާ ގުޅިގެން ޖުމުލަ 32 ފަރާތަކަށް ސްޕެޝަލް ރިކޮގްނިޝަން އެވޯޑު ހިމެނެ އެވެ.
އެ ރަސްމިއްޔާތުގައި ގޭޖުގެ ޗެއާމަން އަބްދުﷲ ރިޔާޒު ދެއްކެވި ވާހަކައިގައި އެ ކުންފުނީގެ ތާރީހުގައި ލިބުނު ކާމިޔާބީތަކާއި ކުރިއެރުންތަކުގެ މައްޗަށް އަލިއަޅުވާލެއްވި އެވެ.
އެ ކާމިޔާބީތަކުގެ އަލީގައި ކުންފުނީގެ ވިޔަފާރި އިތުރަށް ފުޅާވަމުން އަންނައިރު، އެކަމުގެ ފަހަތުގައިި ތިބީ ގޭޖުގެ މުވައްޒަފުންކަން ފާހަގަކުރައްވައި އޭނާ ވަނީ ހުރިހާ މުވައްޒަފުންނަށް ވެސް ޝުކުރު އަދާކުރައްވާފަ އެވެ.
އޭނާގެ ވާހަކަ ނިންމަވާލެއްވުމުގެ ކުރިން މުވައްޒަފުންނަށް ވަރަށް އުފާވެރި ހަބަރެއް ވެސް ވަނީ ދެއްވާފަ އެވެ. އެއީ އެ ކުންފުނީގެ ކާމިޔާބީގައި މުވައްޒަފުން ވެސް ބައިވެރި ކުރަން ނިންމިކަމެވެ. އެ ނިންމުމާ އެކު ގޭޖުގެ އަހަރީ ފައިދާއިން %10 މުވައްޒަފުންގެ މެދުގައި ބެހުމަށް ވަނީ ނިންމާފަ އެވެ.
ގޭޖް މޯލްޑިވްސް: ސަލާމަތީ އައްޑަނައެއްގެ ގޮތުގައި 15 އަހަރު
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ