އޮލިމްޕަހުގެ ކަރަންޓު ބިލަށް އެރި ހަތަރު ލައްކަ ރުފިޔާ ނުދައްކައިގެން، އެތަނުން ކަރަންޓް ކަނޑާލާފައި އޮންނަތާ މަހެއްހާ ދުވަސް ވެއްޖެ އެވެ. އެކަމަކު އޭގެ ޒިންމާ ނަގާނެ ބަޔަކާ ދިމައެއް ނުވެ އެވެ.
އޮލިމްޕަސް ބަލަހައްޓަމުން އަންނަ މޯލްޑިވްސް އެންޓަޓައިންމަންޓް ކޮމްޕެނީ (އެމްއީސީ)ގެ ޗެއާމަން ދަރާ މުހައްމަދު ރަޝީދު ވިދާޅުވީ 2010 ވަނަ އަހަރުން ފެށިގެން އޮލިމްޕަހުގެ ކަރަންޓު ބިލް ނުދައްކާ ކަމަށާއި، ޕެންޑިން ބިލުތަކާ އެކު، އެތަނުގެ ކަރަންޓު ބިލަށް މިހާރު ހަތަރު ލައްކައެއްހާ ރުފިޔާ އަރާފައިވާ ކަމަށެވެ.
މިދިޔަ މޭ މަހު އެ ކުންފުންޏާ ހަވާލުވެވަޑައިގެންނެވި ރަޝީދު ވިދާޅުވީ އެ ފައިސާ ދައްކާނެ ވަރުގެ ބަޖެޓެއް އެ ކުންފުނީގައި ނެތް ކަމަށެވެ. އަދި ގިނަ ދުވަސްތަކެއް ވަންދެން ކަރަންޓު ބިލު ނުދައްކާ އޮތް ސަބަބު އެނގިވަޑައިގަންނަވާނީ ކުރިން އެ ކުންފުންޏާ ހަވާލުވެ ހުންނެވި މަރިޔަމް ވަހީދާ އަށް ކަމަށް ވެސް އޭނާ ވިދާޅުވި އެވެ.
މަރިޔަމް ވިދާޅުވީ ކަރަންޓް ބިލް ނުދައްކާ މައްސަލައިގައި އޭނާ ޒިންމާވާން ޖެހިވަޑައިނުގަންނަވާނެ ކަމަށެވެ. އިތުރު ވާހަކައެއް އޭނާ ނުދައްކަވަ އެވެ.
ކުރީގެ ސަރުކާރުން އުފެއްދި މި ކުންފުނި އުވާލުމަށް މިހާރުގެ ސަރުކާރުން ވަނީ ނިންމާފަ އެވެ. އޭގެ ފަހުން އޮލިމްޕަސް ދާނީ ނެޝެނަލް ސެންޓަ ފޯ ދި އާޓްސް (އެންސީއޭ)ގެ ދަށަށް ކަމަށްވެ އެވެ.
އެންސީއޭ އިން ބުނީ މިހާރު އެ މަސައްކަތް ކުރިއަށް ދާ ކަމަށެވެ.
އެންސީއޭގެ ސީއީއޯ އަލީ ވަހީދު (އަލިބެ) ވިދާޅުވީ އޮލިމްޕަހުގެ ކަރަންޓު ބިލުތައް ނުދައްކާތާ ދެ އަހަރު ވެފައިވާ އިރު މީގެ މަހެއްހާ ދުވަސް ކުރިން، ސްޓެލްކޯ އިން އެތަނުގެ ފިއުޒްތައް ވެސް ނަގާފައިވާ ކަމަށެވެ. ނަމަވެސް މި ވަގުތު އޮލިމްޕަސް މަރާމާތު ކުރަމުންދާތީ، ކަރަންޓް ނެތިގެން މާ ބޮޑު ދައްޗެއް ކުރިމަތިނުވާނެ ކަމަށް އޭނާ ވިދާޅުވި އެވެ.
އަލިބެ ވިދާޅުވީ ދެ ދުވަހެއްގެ ތެރޭގައި އެމްއީސީ އުވާލާނެ ކަމަށާއި އެއަށް ފަހު އެންސީއޭން އޮލިމްޕަހާ ހަވާލުވާނެ ކަމަށެވެ. ނަމަވެސް އެތަނުގެ ކަރަންޓް ބިލު އެންސީއޭން ދައްކަން ނުޖެހޭނެ ކަމަށް އޭނާ ވިދާޅުވި އެވެ.
"އެންސީއޭއަކުން ނޫން ކަރަންޓު ބިލް ދައްކަން ޖެހޭނީ. ދެން އަޅުގަނޑުމެން މީގައި ޖެހޭނީ އެމްއީސީއާ އެކު ވާހަކަދައްކައިގެން ކޮންމެވެސް ހައްލެއް ހޯދަން،" އަލިބެ ވިދާޅުވި އެވެ.
އޮލިމްޕަހުގެ ކަރަންޓު ބިލާ މެދު އެއްވެސް ބަޔަކު ޒިންމާ ނުވާއިރު، މީގެ ދަތިކަން ބައެއް މީހުންނަށް ދަނީ ފޯރަމުންނެވެ.
އޮލިމްޕަހުގައި ފިހާރައެއް ހިންގަމުން އަންނަ އަހުމަދު ޝަކީބް ބުނީ ކަރަންޓު ނެތިގެން އޭނާގެ ފިހާރަ މިހާރު ބަންދުކޮށްފައިވާ ކަމަށެވެ. އޭގެ ސަބަބުން ގެއްލުންތަކެއް ލިބޭ ކަމަށް ވެސް އޭނާ ބުންޏެވެ.
"ކަރަންޓު ނެތްތާ މިހާރު މަހެއްހާ ދުވަސް ވެދާނެ. އެކަމަކު ދެ ތިން ދުވަހަށް ކަރަންޓު ދިނުމަށް ފަހު އަނެއްކާވެސް މިހާރު ކަނޑާލާފައި ހުރީ. ކަރަންޓު ނެތުމުގެ ސަބަބުން ފިހާރައިގެ ވިޔަފާރި ހުރީ ހުއްޓިފައި،" ޝަކީބު ބުންޏެވެ.