އެމްޑީޕީގެ ހުސްވެފައިވާ ޗެއާޕާސަންގެ މަގާމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމް، ވާދަކުރައްވަން ނިންމަވައިފިއެވެ. 'އެކްސް' ގައި ކުރެއްވި ޕޯސްޓެއްގައި ކުރިއަށް އޮތް އެމްޑީޕީގެ ޗެއާޕާސަންގެ އިންތިޚާބުގައި ވާދަކުރުމަށް ނިންމަވާފައިވާކަން ހާމަކުރައްވައި މީކާއީލް ވަނީ އެމްޑީޕީގެ އާންމު މެންބަރުންގެ އެއްބާރުލުމާއި ތާއީދަށް އެދިވަޑައިގެންފައެވެ. މީކާއީލަކީ، މަޖިލީހުގައި ހިމެނޭ ޒުވާން މެންބަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އޭނާ އެންމެ ފުރަތަމަ 19 ވަނަ ރައްޔިތުންގެ މަޖިލީހަށް ހޮވިވަޑައިގަތީ ގަލޮޅު ދެކުނު ދާއިރާގެ މެންބަރުކަމަށެވެ. އެއަށްފަހު އޭނާ ވަނީ ދެވަނަ ފަހަރަށް ވެސް ގޮނޑި ދިފާއުކުރައްވައި 20 ވަނަ މަޖިލީހުން ވެސް ޖާގަ ހޯއްދަވައިފައެވެ. https://x.com/MickailNaseem/status/1994767465017217421 އެމްޑީޕީގެ ޗެއާޕާސަންކަމަށް ވާދަކުރައްވަން ނިންމެވިއިރު މީކާއީލަކީ، މަޖިލީހުގައި ވެސް އެންމެ ގިނައިން ޕާޓީ ދިފާއުކުރައްވައި ވަކާލާތުކުރައްވާ އެއް މެންބަރެވެ. މެއި 23، 2022ގައި އެމްޑީޕީގެ ޗެއާޕާސަންކަމާ ހަވާލުވެވަޑައިގެންނެވި، ކުރީގެ ރައީސް އިބްރާހީމް މުހައްމަދު ޞާލިހުގެ ސަރުކާރުގެ އިކޮނޮމިކް މިނިސްޓަރު ފައްޔާޒް, އެ މަގާމުން އިސްތިއުފާދެއްވިކަން ހާމަކުރެއްވީ މިދިޔަ އާދީއްތަ ދުވަހުގެ ރޭ އެ ޕާޓީން ބޭއްވި ގައުމީ މަޖިލީހުގެ ޖަލްސާގައެވެ. އެ މަގާމުން އިސްތިއުފާދެއްވައި، އެމްޑީޕީގެ ގައުމީ މަޖިލީހުގެ މެންބަރުންނަށް އެޑްރެސްކުރައްވައި ފޮނުއްވި ސިޓީއެއްގައި ފައްޔާޒު ލިޔުއްވި ގޮތުގައި އެ ޕާޓީގެ ޗެއާޕާސަންގެ މަގާމާ ހަވާލުވެވަޑައިގަތީ ވަރަށް ފޮނި އުންމީދުތަކާއެކުގައެވެ. ޕާޓީގެ ލީޑަރުންގެ މެދުގައި އުފެދިފައިވާ ނުތަނަވަސްކަން ހައްލުކުރުމަށް ގިނަ މަސައްކަތްތަކެއް ކުރެއްވިކަން ފާހަގަކުރައްވައި ފައްޔާޒު ވަނީ ޕާޓީ ހިންގުމަށް ހުރި ބައެއް ދަތިތައް ހިއްސާކުރައްވައިފައެވެ. އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ---- ސަން ފޮޓޯ/ މޫސާ ނަދީމް ފައްޔާޒުގެ އިސްތިއުފާއަށް ފަހު ރޭ އެމްޑީޕީގެ ގައުމީ މަޖިލީހުގެ ޖަލްސާއެއް ބާއްވައި، ވަގުތީ ޗެއާޕާސަނެއް ހަމަޖެއްސުމުގެ މަސައްކަތް ކުރިއެވެ. އެނގިފައިވާ ގޮތުގައި އެ މަގާމަށް ދެ ނަމެއް ހުށަހަޅަން މަސައްކަތްކުރިއެވެ. އެއީ މަޖިލީހުގެ ރައީސްކަން ކުރެއްވި، ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު އަސްލަމްގެ ނަމާއި، ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަމެވެ. އަސްލަމްގެ ނަން ހުށަހަޅަން މަޝްވަރާކުރީ ކުރީގެ ރައީސް އިބްރާހިމް މުޙައްމަދު ޞާލިހަށް ތާއީދުކުރައްވާ ފެކްޝަންގެ ތެރެއިންނެވެ. ވަހީދު ނަން ހުށަހެޅީ، ކުރީގެ ރައީސް މުޙައްމަދު ނަޝީދަށް ތާއީދުކުރައްވާ ފެކްޝަނުގެ ތެރެއިންނެވެ. https://sun.mv/214579 ނަމަވެސް އަސްލަމުގެ ނަން ހުށަހަޅައިފައެއް ނުވެއެވެ. އެއީ އެމްޑީޕީގެ ލީގަލް ޑައިރެކްޓަރު މުޙައްމަދު މައުރޫފް ދެއްވި ލަފާގައި، ޗެއާޕާސަންގެ މަގާމަށް ވަގުތީގޮތުން ހަމަޖައްސާ މީހަކީ، ގައުމީ މަޖިލީހުގެ މެންބަރުންގެ ތެރެއިން އިންތިހާބީ މެންބަރަކަށްވުން ލާޒިމުކުރާ ކަމަށް އޮތުމުންނެވެ. ދެން އެ މަގާމުގެ މަސްއޫލިއްޔަތުތައް ވަގުތީގޮތުން އަދާކުރަން ވަހީދުގެ ނަން ހުށަހެޅި ނަމަވެސް އޭނާ ނުހޮވަން ވަނީ ނިންމައިފައެވެ. ވަހީދު ވަގުތީ ޗެއާޕާސަންކަމަށް އައްޔަންކުރަން ފެނޭތޯ ގައުމީ މަޖިލީހުގެ މެންބަރުންގެ ތެރޭ ވޯޓަށް އެހުމުން ލިބުނީ 47 ވޯޓެވެ. ނަމަވެސް ފެންނަކަމަށް ކަނޑައަޅަން 48 ވޯޓު ބޭނުންވެއެވެ. އެހެންވެ އޭނާ ވެސް ނުހޮވުނެވެ. ވޯޓަށްފަހު، ނިޒާމު ގެއްލިފައިވާކަމަށް ބުނެ ރޭގެ ޖަލްސާ ވަނީ މެދުކަނޑާލައިފައެވެ.