ފުވައްމުލަކުގެ ފުނާޑު އަވަށުގެ ޗަސްބިން ސަރަހައްދުގައި އަލިފާނުގެ ބޮޑު ހާދިސާއެއް ހިނގައިފިއެވެ. 'ސަން'އިން ސުވާލުކުރުމުން ފުވައްމުލަކު ހުޅަނގު ދެކުނު ކައުންސިލަރު އާމިނަތު އިނާޔާ ވިދާޅުވީ، އަލިފާނުގެ ހާދިސާ ހިނގިކަމުގެ މައުލޫމާތު ލިބިފައިވަނީ މިރޭ 10:48 ހާއިރު ކަމަށެވެ. އެމްއެންޑީއެފުން ބުނީ، ފުވައްމުލަކު ފުނާޑު އަވަށުގެ ޗަސްބިން ސަރަހައްދުގައި ރޯވި އަލިފާންގަނޑު ނިއްވާލުމަށް ފަޔާ އެންޑް ރެސްކިއުއިން ހަރަކާތްތެރިވަމުން އަންނަ ކަމަށެވެ. އެ ސަރަހައްދުގައި ދޭތެރެއަކުން އަލިފާނުގެ ހާދިސާ ހިނގާ ކަމަށް، އިނާޔާ ވިދާޅުވިއެވެ. https://x.com/MNDF_Official/status/1994837006715949066 އެމްއެންޑީއެފުން ބުނި ގޮތުގައި ފުވައްމުލަކު ސިޓީ ފުނާޑު އަވަށު ޗަސްބިން ސަރަޙައްދުގައި އަލިފާން ރޯވެގެން އެމްއެންޑީއެފް ސަދަން އޭރިއާ ކޮމާންޑް، ފުވައްމުލަކު ފަޔަރ ސްޓޭޝަނުން ދަނީ ހަރަކާތްތެރިވަމުންނެވެ. އަދި މި ހާދިސާގެ ރިޕޯޓް ލިބިފައިވަނީ މިރޭ 22:35 ހާއިރު ކަމަށް އެމްއެންޑީއެފުން ބުންޏެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި އެ ސަރަހައްދުގައި ވަނީ ވަރަށް ބޯޑަށް އަނދައިފައެވެ. ފުވައްމުލަކުގެ ފުނާޑު އަވަށުގެ ޗަސްބިން ސަރަހައްދުގައި އަލިފާން ރޯވެފައި --- ފޮޓޯ: ފުވައްމުލަކު ހުޅަނގު ދެކުނު ކައުންސިލަރު އާމިނަތު އިނާޔާ ފާހަގަކުރެވޭ ގޮތުގައި މީގެ ދެ މަސްކުރިން ސެޕްޓެމްބަރު ފުވައްމުލަކުގެ ހޯދަނޑު ޗަސްބިން ސަރަހައްދުގައި ރޯވެ، ގާތްގަނޑަކަށް އެ ތަނުގެ ދިހަ ޕަސެންޓު އަނދާފައިވެއެވެ. އެ ހާދިސާއާ ގުޅިގެން ފުވައްމުލައް ސިޓީގެ މޭޔަރު އިސްމާއިލް ރަފީގް 'ސަން'އަށް އޭރު ވިދާޅުވީ، އެތަނުގައި ރޯވީ ސިނގިރޭޓެއް އެއްލައިގެން ކަމަށް ބެލެވޭ ކަމަށެވެ. އިސްމާއީލް ވިދާޅުވީ އެ ތަނުގެ ދިހަ ވަރަކަށް ޕަސެންޓު ގާތްގަނޑަކަށް އޭރު އަނދާފައިވާ ކަމަށެވެ. އަދި ހަމަ އެ މަހު ފުވައްމުލަކު ދަނޑިމަގު ޗަސްބިން ސަރަހައްދުގައިވެސް އަލިފާނުގެ ހާދިސާއެއް ހިނގައިފައެވެ.