ދަރިން ނުލިބޭނެކަމަށް ބެލެވޭ މީހަކާ ކައިވެނި ނުކުރުމަކީ މައްސަލައެއްތޯ؟
މިސުވާލުގެ ޖަވާބުގައި ބުނަންއޮތީ ދަރިން ބޭނުންވާ މީހަކު ދަރިން ނުލިބޭނެކަމަށް ބެލެވޭ މީހަކާ ކައިވެނި ނުކުރުމަކީ މައްސަލައެއް ނޫނެވެ. ރަނގަޅީވެސް އެގޮތެވެ. ކައިވެނި ކުރުމަށްފަހު މައްސަލަޖެހި ކައިވެނި ރޫޅުމުން ލިބޭ ދެރަ މާބޮޑުވާނެތީއެވެ.
ނަމަވެސް ވިސްނާލަން ޖެހޭނެ ކަމެއް އެބައޮތެވެ. އެކަމަކީ ދިމާވާ ސަބަބަކާއިހުރެ، ނޫނީ ޞިއްޙީ މައްސަލައެއް ހުރެގެން ނަމަވެސް މީހަކަށް ދަރިން ނުލިބޭތީ އޭނާގެ ހިތުގައި ޖެހޭނެފަދަ ބަހެއް ބުނެގެން ނުވާނެއެވެ. ސަބަބަކީ އެއީ އޭނާ އަމިއްލައަށް ލިބިގަންނަ ޙާލަތަކަށްނުވާތީއެވެ.
ތިރީގައިވާ ލިޔުން ވިދާޅުވެލެއްވުން އެދެމެވެ.
އަޅުގަނޑުމެންގެ ކައިވެންޏަށް 8 އަހަރުވެއްޖެއެވެ. އަދިވެސް ދަރިއަކު ނުލިބެއެވެ. ދެމަފިރިންގެ ޓެސްޓްތައް އެތައް ފަހަރަކު އެތައް ޑޮކްޓަރުންނެއް ހަދައިފިއެވެ. އެއްވެސް މައްސަލައެއް ފާހަގައެއް ނުކުރެވެއެވެ. ވީމާ ކުރާނެ ބޭސްފަރުވާއެއް ނެތެވެ. އޮތީ ދުޢާކުރުމެވެ. ދެމަފިރިން މިތިބީ ދުޢާކުރުންމަތީގައެވެ.
ކެތްތެރިކަން ކޮޅުންލައިގެނެއް ނުއުޅެމެވެ. ދެމަފިރިންވެސް މިތިބީ ކެތްތެރިކަންމަތީގައެވެ. ﷲ ދަރިއަކު ދެއްވަވާނެ ދުވަހެއްގެ އުންމީދުގައެވެ. އެކަމަކުވެސް އެންމެ ގާތް މީހުންގެ ފަރާތުންވެސް ނިކަމެތިކުރުމުގެ ބަސްތައް އަޑުއިވެއެވެ. އެކަމާއި ވަރަށް ދެރަވެއެވެ.
އެއްވެސް ސުވާލެއް ކުރާކަށް ބޭނުމެއް ނޫނެވެ. ބުނެލަން ބޭނުންވަނީ އަޅުގަނޑުމެން ފަދައިން ތިބެންޖެހިފައިވާ މީހުންގެ ހިތުގައި ޖެހޭފަދަ ބަސްތައް ނުބުނާށެވެ. އެފަދަ ބަސްތަކުގެ އަޑުއިވުމުން ވަރަށް ދެރަވެއެވެ.
މިއީ މިއަދުނޫހުގެ ކިޔުންތެރިއަކު ޙިއްޞާކޮށްފައިވާ ވާހަކަކޮޅެކެވެ. އެހެންކަމުން މިގެނެސްދެނީ ގުޅުންހުރި ވަރަށް މުހިންމު ލިޔުމެކެވެ. ކިޔުންތެރިން ވިސްނައިލުން މުހިންމު ލިޔުމެކެވެ.
ދަރިއަކު ލިބުމަކީ ދެމަފިރިއަކަށް ލިބޭނެ އެންމެ ބޮޑު އެއް ނިޢުމަތެވެ. ކައިވެނި ކުރެވޭ ހިސާބުން ފެށިގެން ދެމީހުންވެސް ދަރިއަކު ލިބުމުގެ ހުވަފެންތައް ދެކެން ފަށައެވެ. ދެމީހުންވެސް އިންތިޒާރު ކުރަނީ ލޯބި ލޯބި ދަރިއަކު ލިބޭނެ ދުވަހަކަށެވެ.
ﷲ ގެ ރަޙުމަތްފުޅާއެކު ބައެއް މިހުންނަށް ވަރަށް ފަސޭހައިން ދަރިން ލިބުމަށް މެދުވެރިވެއެވެ. އަނެއް ބަޔަކަށް ދަރިން ލިބެނީ އެކަމަށްޓަކާ އެތަކެއް މަސައްކަތެއް ކޮށްގެންނެވެ. އެއްވެސް ވަރަކަށް ދަރިން ނުލިބޭ މީހުންވެސް މަދެއް ނޫނެވެ.
ދަރިން ނުލިބެނީ އަންހެން މީހާއަށް ނުވަތަ ފިރިހެންމީހާގެ ހުންނަ މައްސަލަތަކެއްގެ ސަބަބުންކަމަށް ޑޮކްޓަރުން ބުނި ނަމަވެސް އެއްވެސް އެފަދަ މައްސަލައެއް ނެތިވެސް ދަރިން ލިބުމުން މަޙުރޫމްވެފައިވާ ކިތަންމެ ބަޔަކު އެބަތިއްބެވެ. އެކަމުން އެނގެނީ ދަރިން ލިބެނީވެސް ﷲ ތަޢާލާ ދެއްވެވުމުންކަމެވެ.
ދަރިން ލިބުމުގެ އުފަލުން މަހުރޫމްވެފައި ތިބޭ މީހުންގެ އިޙުސާސްތަކާ މެދު ފިކުރުކޮށްލެވެނީ ކިތައްމީހުންނަށް ބާވައޭ ހިތަށް އަރައެވެ. މާތް ﷲ ޤުރުޢާނުގައި އައްޝޫރާ ސޫރަތުގެ 49 ވަނަ އާޔަތުގައި ވަޙީކުރައްވާފައިވެއެވެ.
" އުޑުތަކާއި ބިމުގެ ވެރިކަން ވަނީ ﷲ އަށެވެ. އެކަލާނގެ އިރާދަކުރައްވާ އެއްޗެއް އެކަލާނގެ ހައްދަވަތެވެ. އެކަލާނގެ އިރާދަކުރައްވާ މީހަކަށް އަންހެންދަރިން ދެއްވަތެވެ. އަދި އެކަލާނގެ އިރާދަކުރައްވާ މީހަކަށް ފިރިހެންދަރިން ދެއްވަތެވެ. "
އަދިވެސް އެސޫރަތުގެ 50 ވަނަ އާޔަތުގައި ވަޙީކުރައްވާފައިވެއެވެ.
" ނުވަތަ އެއުރެންނަށް ފިރިހެން ދަރިންނާއި އަންހެން ދަރިން ދެއްވަތެވެ. އަދި އެކަލާނގެ އިރާދަކުރައްވާ މީހަކު ދަރިމައިނުވާ މީހަކު ކަމުގައި ލައްވަތެވެ. ހަމަކަށަވަރުން އެކަލާނގެއީ މޮޅަށް ދެނެވޮޑިގެންވާ ކުޅަދުންވަންތަ ރަސްކަލާނގެއެވެ."
ދަރިންނަކީ މާތްﷲ ކޮންމެ ދެމަފިރިއަކަށް ދެއްވާ ވަރަށްވެސް އަގު ބޮޑު ނިޢުމަތެއްކަން މަތީގައިވާ އާޔަތްތަކުން އެނގިގެން ދާނެއެވެ.
ކިޔައިދޭން މިއުޅެނީ އަހަރެންގެ ވާހަކައެވެ. ކޮންމެ ހާލެއްގައިވެސް މާތް ﷲ އަށް ޙަމްދު ހުއްޓެވެ. އަހަރެންނަކީ ދަރިން ލިބުމުގެ އުފަލުން މަޙުރޫމްވެފައިވާ އަންހެނަކީމެވެ. މީހަކާ އިނދެގެން އެތައް އަހަރެއް ވެގެން ދާއިރުވެސް އަހަރެންގެ ފިރިމީހާއަށް ދަރިއަކު ހޯދައިދިނުމަށް އަހަރެން މިވަނީ ނުކުޅެދިފައެވެ. އަހަރެންގެ ހުރި މައްސަލަތަކެއްގެ ސަބަބުންނެވެ.
ﷲ އަށް ހަމްދުހުއްޓެވެ. މިކަން އެނގިހުރެވެސް އަހަރެންގެ ފިރިމީހާ އަހަރެންނަށް ވަރަށް ރަނގަޅެވެ. އެހެންނަމަވެސް އާއިލާގެ ބައެއް މީހުންނާ ބައެއް ރައްޓެހިންނާއި ދަންނަ މީހުން އަހަރެންނާ ދޭތެރޭގައި ކަންތައްކުރާ ގޮތުން ވަރަށް ދެރަވެއެވެ. ވަރަށް ހިތުގައި ޖެހެއެވެ. މަގުމަތިން ފެނިލާއިރަށް އަހައިލާނެއެވެ. ދަރިއަކު ހޯދަން ނޫޅެން ހެއްޔެވެ؟
އެވަގުތު އަހަރެންގެ ހިތަށް ކުރާ އަސަރު އަހަރެން ހެއްދެވި ފަރާތް ދެނެވޮޑިގެންވާނެއެވެ. އެހެންނަމަވެސް އަހަރެން ހިނިތުންވެލާފައި ބުނަމަވެ. ﷲ ތަޢާލާ އިރާދަފުޅުކުރެއްވި އިރަކުންނެވެ. ދެން ބައެއް މީހުން ބުނާނެއެވެ. ދަރިއަކު ނުހޯދާ އެހާ ދުވަސް ވަންދެން ހުންނާކަށް ނުވާނެއެވެ. އުމުރުން މައްޗަށް ދާ ވަރަކަށް ދަރިއަކު ލިބުމުގެ ފުރުސަތުވެސް ކުޑަވާނެއެވެ. އަހަރެން ހޯދަން ބޭނުންނުވަނީ އޭ އެމީހުންގެ ހިތަށް އަރަންވީ ކީއްވެ ހެއްޔެވެ؟ އެފަދަ އެއްޗެއް އަހަރެން ދުވަހަކުވެސް ބުނެފައެއް ނޯންނާނެއެވެ. ވީއިރު އެކަހަލަ ބަސްތައް އަހަރެންނަށް ރައްދު ކުރަންވީ ކީއްވެ ހެއްޔެވެ؟
ބުނަން ހެއްޔެވެ؟ އަހަރެން ދަރިއަކު ވަރަށް ބޭނުމެވެ. އެކަމަށް އަހަރެންނަށް ކުރެވުނުހާ މަސައްކަތެއް މިދަނީ ކުރަމުންނެވެ. އެކަމަކަށް އެދި އަހަރެން މިދަނީ ﷲ ތަޢާލާގެ ހަޟްރަތުގައި ދަންނަވަމުންނެވެ. އަހަރެންނަށް އޮތީ ކެތްތެރިވެ އެކަލާނގެ އަށް ވަކީލުކުރުމެވެ. އެކި މީހުން ﷲ ތަޢާލާ އިމްތިހާނު ކުރައްވާނީ އެކި ގޮތަށެވެ.
ބައެއް ފަހަރު ބައެއް މީހުން ބުނެއެވެ. ދަރިއަކު ހޯދަން ތިއުޅެނީ މާލަހުންނެވެ. ކުރިން ތިޔަކަމަށް މަސައްކަތް ކުރިނަމަ މިހާރު ލިބުނީހެވެ. ކުރަންވާ ވަރަށް އަދިވެސް މަސައްކަތް ނުކުރަނީއެވެ. މިފަދަ ބަސްތައް އަހަރެންގެ ހިތަށް ހެރެނީ ތޫނު ހަންޖަރެއް ފަދައިން ކަމެއް ނޭނގެނީހެއްޔެވެ؟ އަހަރެން ކުރާ މަސައްކަތް ނުފެންނަ ހާލު ތިޔަހެން ތިބުނަނީ އަހަރެންނާ ބެހޭގޮތުން ކިހާ ވަރަކަށް އެނގިގެން ހެއްޔެވެ؟
 
ބައެއް ފަހަރު އާއިލާ މީހުންނާ ރަޙުމަތްތެރިން ބަނޑުބޮޑުވުމުން އަހަރެން ކައިރީގައި ނުބުނެ ހުރެއެވެ. އަހަރެންނަށް ފެންނަނީ ވިހަން ކައިރިވެފައި ހުއްޓައެވެ. އެތަން ފެނި އާއިލާ އެހެން މީހެއް ކައިރީ ނޫނީ އެހެން ރަހުމަތްތެރިއެއް ކައިރީގައި އަހައިލާއިރު އެކަން އެމީހުންނަށް މާކުރިންވެސް އެނގެއެވެ. އެއްވެސް މީހަކާ މެދު ގޯސްކޮށް ދެކޭކަށް އަހަރެން ބޭނުމެއް ނޫނެވެ. ނަމަވެސް އެވަގުތު އަހަރެންގެ ހިތަށް އަރާ އެއްޗެހިން ހިތުގައި ޖެހި ރޮވެންވެސް ރޮވެއެވެ. އަހަރެންނަށް ވިސްނޭ ގޮތުގައި އަހަރެން މީ ދަރިން ނުލިބޭ މީހަކަށް ވުމުން އަހަރެން ކައިރީގައި ބުނަން ފަސްޖެހެނީއެވެ. އަހަރެންގެ އެސްފީނާ ޖެހިދާނެތީއެވެ. ޤަބޫލުކުރަމެވެ. އެންމެ ގާތްކޮށް އުޅޭ މީހާގެ ފަރާތުންވެސް އެސްފިނާ ޖެހިދާނެއެވެ. ނަމަވެސް އެއްވެސް އިންސާނަކާމެދު އަހަރެންގެ ހިތުގައި ހަސަދަވެރިކަމެއް ނެތްކަން ﷲ ދެނެވޮޑިގެން ވާނެއެވެ.
ބައެއް ފަހަރު އާއިލީ އެއްވުން ތަކަށް ނުދާތީ އާއިލާ މިހުން ޝަކުވާ ކުރެއެވެ. އެންމެންދެކެވެސް އަހަރެން ވަރަށް ލޯބިވެއެވެ. ވަގުތު ހޭދަކުރަންވެސް ބޭނުންވެއެވެ. އެކަމަކުވެސް އެންމެން އެމީހުންގެ ދަރިންނާއެކު އުޅޭ ލޯބިގޮތް ފެނުމުން އަހަރެންނަށްވެސް އެކަމަށް އެދެވެނީއެވެ. އެނަސީބު އަހަރެންނަށް ނުލިބޭތީ ހިތްދަތިވަނީއެވެ. މިއީ ﷲ ތަޢާލާގެ އިމްތިޙާނެއްކަން އަހަރެންނަށް އެނގެއެވެ. އެކަމަކުވެސް މިހިތަށް ކުރާ އަސަރަށް ބާރެއް ނުފޯރުވެއެވެ.
މީސްމީޑިއާ އެކައުންޓްތައް ބޭނުން ކުރަނީ ހިތްހަމަޖައްސާލުމަށެވެ. ބައެއް ފަހަރު އެކުވެރިން އެމީހުންގެ ދަރިންނާއެކު ކުރެވިފައި ހުންނަ މަޖާ ކަންތައް ހިއްސާކޮށްފަ ހުރެއެވެ. އަނެއްބައި ފަހަރު ދަރިންނާ އެކު ދައްކާފައި ހުންނަ ލޯބި ވާހަކަތައްވެސް ޙިއްސާ ކުރެއެވެ. އެކަހަލަ ކޮންމެ ޕޯސްޓެއް އަހަރެންނަށް ކިޔައިލެވެނީ ކިޔާ ހިތުންނެވެ. ބައެއް ފަހަރު ހިނިވެސް އާދެއެވެ. އެކަމަކު އާހިރު ކަން ނިމޭއިރު އަހަރެންގެ ދެލޮލުން އޮހެމުން ދާނީ ހޫނު ކަރުނައެވެ.
ދަރިން ލިބުމަކީ ތިޔަ އެންމެހާ ބޭފުޅުންނަށް ލިބިފައިވާ ވަރަށް ބޮޑު އުފަލެއްކަން އަހަރެންނަށްވެސް އެނގެއެވެ. އެކަމަށްޓަކައި ﷲ އަށް ޙަމްދުހުއްޓެވެ. އެކަމަކު އަހަރެން ކަހަލަ ދަރިން ނުލިބޭ އަންހެނުންނާ މެދުވެސް ވިސްނާލާށެވެ. ކޮންމެ މީހަކީ ހިތްވަރުގަދަ މީހެއް ނޫނެވެ. އެފަދަ ސުވާލުތައް ކުރުން ހުއްޓާލާށެވެ. ހަޤީގަތް ނޭނގިހުރެ އަހަރެމެންގެ ދިރިއުޅުމާ މެދު ވާހަކަ ނުދައްކާށެވެ. އަހަރެމެންގެ އިޙުސާސްތައް ދެނެގަންނާން މަސައްކަތް ކުރާށެވެ. އަދި އަހަރެމެން ކަހަލަ ދަރިން ލިބުމުން މަޙްރޫމްވެފައި ތިބި ދެމަފިރިންނަށްޓަކާ ހެޔޮ ހިތުން ދުޢާކޮށްދޭށެވެ. ﷲ ތިޔަ އެންމެހާ ބޭފުޅުންނާއި ދަރިންނަށް ހެޔޮރަޙުމަތް ލައްވާށި! އާމީން
-- ޢައްޒަ މުޙައްމަދު