އަމާޒަކީ ރައީސް ޑރ. މުހައްމަދު މުއިއްޒަށް ވެރިކަމުގެ ދެވަނަ ދައުރެއް ފަހިކޮށްދިނުން ކަމަށް ވިދާޅުވެ، ވެރިކަންކުރާ ޕީއެންސީގައި ރިޔާސީ ޕްރައިމަރީ އެއް ނޯންނާނެ ކަމުގެ ސިގްނަލެއް އެ ޕާޓީގެ ޗެއާޕާސަން އަބްދުއްރަހީމް އަބްދުﷲ ދެއްވައިފިއެވެ.
ޕީއެންސީގެ އެތެރޭގެ އިންތިހާބާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި 'ދަ ޕްރެސް' އިން ސުވާލުކުރުމުން އަބްދުއްރަހީމް ވިދާޅުވީ، އެ ޕާޓީން އަމާޒު ހިފާފައި ވަނީ 2008 ވަނަ އަހަރުން ފެށިގެން އަމަލުކުރަމުންދާ ފެހި ގާނޫނުއަސާސީގެ ދަށުން ވެރިކަމުގެ ދެވަނަ ދައުރެއް ފުރިހަމަކުރައްވާ ރައީސަކަށް މިހާރުގެ ރައީސް މުއިއްޒު ހެދުމަށް ކަމަށެވެ.
2028 ގައި ބާއްވާ ރިޔާސީ އިންތިހާބުގައި ވާދަކުރައްވާނަންތޯ ސުވާލުކުރުމުން ރައްޔިތުންގެ މަޖިލީހުގެ ރައީސްކަން ވެސް ކުރައްވާ އަބްދުއްރަހީމް ވިދާޅުވީ، ރައީސްކަމަށް ވާދަކުރެއްވުމުގެ ވިސްނުމެއް ނެތް ކަމަށާއި، ވާދަ ނުކުރައްވާނަން ކަމަށެވެ.
"ދިވެހިރާއްޖޭގެ ވެރިކަމަށް ކުރިމަތިލުމުގެ ވިސްނުމެއް ދުވަހަކު ވެސް ނުގެންގުޅޭނަމޭ، އަދި ކުރިއަށް އޮތް ތާނގަ ވެސް ނުގެންގުޅޭނަން، ވާދައެއް ނުވެސް ކުރާނަން، އެ ފަދަ ފުރުސަތެއް ލިބުނަސް އެކަމުން ސަލާމަތްވާނަން،" އަބްދުއްރަހީމް ވިދާޅުވިއެވެ.
ދެވަނަ ދައުރެއް ރައީސަށް ހޯއްދަވައިދެއްވަން މަސައްކަތްކުރައްވާނެ ކަމަށް އަބްދުއްރަހީމް ވިދާޅުވުމާ ގުޅިގެން ކުރި ސުވާލަށް ޖަވާބުދެއްވަމުން އަބްދުއްރަހީމް ވިދާޅުވީ، ޕީއެންސީގެ އަސާސީ ގަވައިދުގައިވާ ގޮތުން، އެ ޕާޓީގެ މެންބަރަކީ ރައީސުލްޖުމްހޫރިއްޔާ ކަމުގައި ވާ ނަމަ، އަދި ދެވަނަ ދައުރަކަށް ކުރިމަތިލާން ހުށަހަޅައިފިނަމަ، އެ މެންބަރަކަށް ޕްރައިމަރީއަކާ ނުލާ ރިޔާސީ ޓިކެޓު ދިނުމަށް ޕާޓީގެ މެންބަރުންގެ މަޖިލީހުން ނިންމޭނެ ކަމަށެވެ.
"އެހެންވީމާ ޕްރައިމަރީއެއް ބާއްވަން ޖެހޭ ކަމެއް ނޫން ތީކީއެއް،"
އެހެންކަމުން މީގެ ހަތަރު އަހަރު ފަހުން ރިޔާސީ ޕްރައިމަރީއެއްގައި ރައީސް ވާދަކުރެއްވުމުގެ ހިޔާލު ގެންގުޅުއްވާތޯ ސުވާލުކުރުމަށް ރައީސް އޮފީހުގެ އިސް ތަރުޖަމާނު އަދި ޕީއެންސީގެ ވެސް ތަރުޖަމާނު ހީނާ ވަލީދަށް ގުޅުމުން ފޯނަށް ޖަވާބު ދެއްވާފައެއް ނުވެއެވެ.
ރިޔާސީ އިންތިހާބުގެ ވާހަކަ މި ދެކެވުނީ، 2028 ވަނަ އަހަރު ބާއްވާ އިންތިހާބުގައި ވާދަކުރައްވާނެ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއީލް މިއަދު އިއުލާނުކުރައްވާފައި ވަނިކޮށެވެ. ވެރިކަމަށް ޝައުގުވެރިކަން ހުރިތޯ އަދި އިންތިހާބުގައި ވާދަކުރައްވާނަންތޯ އެ ޕާޓީގެ ރައީސް އަބްދުﷲ ޝާހިދާއި މާލޭގެ މޭޔަރު އާދަމް އާޒިމާ ސުވާލުކުރުމުން، ދެ ބޭފުޅުން އަދި ޖަވާބެއް ދެއްވާފައެއް ނުވެއެވެ.