އިންސާނުންގެ ޙަޔާތުގައި އެންމެ މުހިންމު އެކައްޗަކީ ވަޤުތެވެ. ވަޤުތަކީ އެންމެ މުހިންމު ކަނަތައް ފާހަގަކުރަންޖެހެނީ ގެއްލިއްޖެނަމަ ނުވަތަ ފާއިތުވެއްޖެނަމަ އަނބުރައި ނުހޯދޭނެތީއެވެ. ފައިސާވެސް އަދި ވަޤުތު ނޫން ކޮންމެ އެއްޗަކީވެސް އަނބުރައި ހޯދޭނެ އެއްޗެއްސެވެ.  
ކޮފީގައި ތިބުމުގެ ވާހަކަ މިހާގިނައިން ދައްކަންޖެހޭ އެންމެ ބޮޑު ސަބަބަކީ އެކަމުގެ ސަބަބުން ގެއްލިގެންދާ ވަޤުތުތަކެވެ. ކޮފީއަކަށް ހިނގައްޖެނަމަ 2،3 ގަޑިއިރުވެސް މަދުވެފައި އޮންނާތީއެވެ.  
އެކުވެރިންގެ މިހާރުގެ އެންމެ ބޮޑު އެއް އާދައަކީ ގަދަވެ ހުންނައިރު ކޮފީ މޭޒުތައް ކައރިން ދުރަށް ދެވޭ ކަމަކަށް ނުވުމެވެ. ގުޅައިގެންވެސް ކޮފީއަށް ގެންދެއެވެ. އެކުގައި އެތައް ގަޑިއރެއްވަންދެން ވަޤުތު ހޭދަކުރެއެވެ. ނަމަވެސް ބަލިވެއްޖެ ނަމަ ޙާލުވެސް ބަލައިލެވޭ ކަމަކަށް ނުވެއެވެ.  
ސުވާލަކީ އެއީ ކޮން ރަޙްމަތްތެރިކަމެއް ހެއްޔެވެ؟ ރަހްމަތްތެރިޔާ ދެކެ އެވެވެނީ ކޮން ލޯތްބެއް ހެއްޔެވެ؟ ޙަޤީޤީ ރަޙްމަތްތެރިންނަކީ ބަލިވީމައި ވެސް ޙާލު ބަލައި އަދި އެހީތެރިކަމަށް ނުއެދުނު ނަމަވެސް އަމިއްލައަށް އިސް ނަގައިގެންވެސް އެހީތެރިކަން ފޯރުކޮށްދޭ މީހާއެވެ.  
އަހަރެންގެ ކްލިނިކަށް އަންނަ ބަލި މީހުންނާއިއެކު އެމީހުންގެ ރަޙްމަތްތެރިން އަންނަނީ ވަރަށް މަދުންނެވެ. ވަރަށް ބޮޑަށް ބަލިވެގެން ވެސް އެކަނި އަންނަ މީހުން މަދެއް ނޫނެވެ. ނަމަވެސް އެމީހުންގެ ވާހަކަތަކުން އެނގޭ ގޮތުގައި އެމީހުންގެ ރަހްމަތްތެރިން ވަރަށް ގިނައެވެ. ރަހްމަތްތެރިކަމުގެ ބޭނުމަކީ ކޮބައިކަމާއިމެދު ސުވާލު އުފެދެނީ މިހެންވެގެންނެވެ.  
ހަމަ އެއާއިއެކު އެއްކަމެއް ފާހަގަކޮށްލާނަމެވެ. ބަލިމީހާ ގޮވައިގެން ރަޙްމަތްތެރިން އަންނަ ނިޞްބަތަށް ބަލައިފިނަމަ ގިނައީ އަންހެނުންނެވެ. މިއާދަ ފިރިހެނުން ދަސްކުރަން އެބަޖެހެއެވެ. ރަހްމަތްތެރިޔާއަކީ އަންހެނަކަށްވުމުން ތިމާ ދިއުމަށް ހުރަސް ހުރިނަމަ ތިމާގެ އަނބިމީހާ ނުފޮނުވަނީ ކީއްވެގެން ހެއްޔެވެ؟ އިޚްލާޞްތެރި ރަޙްމަތްތެރިކަމަކީ އެއީ ނޫންހެއްޔެވެ؟
 
- ޑރ. ނިސްރީން ޢަބްދުﷲގެ ލިޔުމަކުން