ސަރުކާރަށް ދެ އަަހަރު؛ ހޯރަފުށީ ބޮޓްލިން ޕްލާންޓުގެ މަސައްކަތް ހުއްޓިފަ!

ހޯރަފުށީގައި ގާއިމުކުރާ ބިއްލޫރި ފުޅީގައި ފެން ބަންދު ކުރާ ބްޓޮލިން ޕްލާންޓުގެ މަސައްކަތް ނިމުމަކާ ގާތްވެފައި ވަނިކޮށް އެތަނުގެ މަސައްކަތް އެއްކޮށް ހުއްޓާލައި އޮންނަތާ ގިނަ ދުވަސް ތަކެއް ވެއްޖެ އެވެ. ހޯރަފުށީ ކައުންސިލުން ނެރުނު ބަޔާނެއްގައި ވަނީ، ބޮޓްލިން ޕްލާންޓު ހުޅުވުމާ ގާތްވެފައިވަނިކޮށް، އެ ތަނުގެ މަސައްކަތް ހުއްޓުވައި، މުވައްޒަފުން ވެސް ވަކިކޮށްފައިވާ ކަމަށެވެ. މިއީ ޕްރޮޖެކްޓުތައް ނުހުއްޓުވާނެ ކަމަށާއި، މުވައްޒަފުން ވަކިނުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވެ ވަޑައިގެންނެވި ވައުދާ ޚިލާފަށް، ރައްޔިތުން ނިކަމެތި ކުރުން ކަމަށް އެ ބަޔާނުގައި ބުނެފައިވެއެވެ. އަދި އެ ކަން އެންމެ ހަރުކަށި އިބާރާތުން ވަނީ ކުށްވެރިކޮށްފަ އެވެ. ހޯރަފުށީ ބޮޓްލިން ޕްލާންޓަކީ އެ ރަށު ކައުންސިލްގެ 40 ޕަސެންޓު ހިއްސާ އޮންނަ މަޝްރޫއެކެވެ. އަދި އެ މަޝްރޫއު ކުރިއެރުވުމަށް ދިމާވާ ގޮންޖެހުންތަކާއި ހުރަސްތައް ނައްތާލުމަށާއި، ފެންވަރު ރަނގަޅުކޮށް، އިތުރަށް ތަރައްގީ ކުރުމަށް ފެނަކައާއެކު އެއްބަސްވެފައިވާއިރު، ކައުންސިލްގެ އެއްވެސް މަޝްވަރާއެއް ނެތި، އެ ޕްރޮޖެކްޓުގެ މަަސައްކަތް ހުއްޓުމަކަށް ގެނައުމަށް ފެނަކައިގެ ޑިރެކްޓަރުންގެ ބޯޑުން ނިންމިނިންމުން މުރާޖައާ ކުރުމަށް ހޯރަފުށީ ކައުންސިލުން ވަނީ ގޮވާލައިފަ އެވެ. އަދި ވަކިކުރި މުވައްޒަފުންގެ ވަޒީފާތައް އިއާދަކޮށްދިނުމަށް ވެސް ފެނަކައިގެ އެމްޑީއަށާއި ޑިރެކްޓަރުންނަށް ގޮވައިލި އެވެ.މިއީ އެ ކައުންސިލުން ފެނަކައާއެކުވީ އެއްބަސްވުމާ ކަނޑައެޅިގެން ހިލާފަށް ކޮށްފައިވާ ކަމަކަށްވާތީ، އެ ކަމުގައި އިންސާފު ހޯދާނީ ޝަރީއަތަށް މައްސަލަ ހުށަހަޅައިގެން ކަމަށް އެ ބަޔާނުގައިވެ އެވެ. ހޯރަފުށީގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ އެ ބޮޓްލިން ޕްލާންޓުގެ މަސައްކަތް ހުއްޓާލައި އެ ތަނުން މުވައްޒަފުން ވަކިކުރުމުން އިދިކޮޅު އެމްޑީޕީން ވެސް ވަނީ ކަންބޮޑުވުން ފާޅުކޮށްފަ އެވެ.ޕްލާޓުން ވަޒީފާ އިން ވަކިކުރި މީހުންގެ ފަރާތުން "ހޯރަ" އޮންލައިން އަށް މައުލޫމާތު ދިން މީހާ ބުނީ އެމީހުން ތިބީ އެކަތިކަޓެއްގައި ކަމަށާއި ވަކިކުރި މީހުންނާއި އެމީހުންގެ އާއިލާތަކަށް ދާއިރާގެ މެންބަރު އަލީ މޫސާ އާއި މުއިއްޒު ސަރުކާރު ގުޅިގެން ދިން "އަނިޔާ" ހަދާން ނުނެތޭނެ ކަމަށާއި އެކަމުގެ ބަދަލު ސަރުކާރަށް ދޭން ބޭނުންވަނީ "ވޯޓު ފޮށިން" ކަމަށެވެ. "އަންނަ ކައުންސިލް އިންތިހާބަށް ސަރުކާރުން ދައްކާ މީހުނަށް ވޯޓު ނުދިނުމަށް މިހާރު ވާނީ ނިންމާފަ، ވޯޓުފޮށި ނުފެނިގެން މި ތިބީ ސަރުކާރަށް ނޫނެކޭ ބުނަން" އޭނާ ބުންޏެވެ. ހޯރަފުށިން ވަޒީފާއިން ވަކިކުރި 15 މީހުން މިފަދައިން ބުނާއިރު ސަރުކާރުން އަންނަނީ އަންނަ އަހަރުގެ އޭޕްރީލްގެ ތެރޭގައި ބާއްވާ ލޯކަލް ކައުންސިލް އިންތިހާބަށް ތައްޔާރު ވަމުންނެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ