އަހަރެމެން ކޮންމެ މީހަކީވެސް އަބަދުވެސް އެތައް ބައިވަރު ކަންތައްތަކަކަށް ބޭނުންވެގެން ހުންނަ މީހެކެވެ. ކުދިކުދި ކަންކަން އަބަދުވެސް ދާނީ ކުރިމަތިވަމުންނެވެ. ބޮޑެތި ކަންކަން ކުރިމަތިވާނީ ކޮން ވަގުތަކުކަން ހަމައެކަކަށްވެސް ނޭނގޭނެއެވެ. އެހެންކަމުން ކޮންމެ މީހަކުވެސް އަބަދުވެސް ހުންނަންވާނީ ބޭނުންވާ ކަންކަމަށް އެދި ﷲ ތަޢާލާއަށް ކޮންމެ ވަގުތަކުވެސް ދެންނެވޭ ޙާލަތުގައެވެ.  
އެ ޙާލަތުގައި ހުރުމަށްޓަކައި ފުރަތަމަ ކުރަންޖެހޭ ކަމަކީ ފަރުޟު 5 ނަމާދު އަދާކުރަމުން ގެންދިއުމެވެ. ނަމަވެސް ގިނަ ބައަކު ނަމާދުކުރަން ފަށަނީ ﷲ ތަޢާލާގެ ޙަޟްރަތުން ކަމަކަށް ބޭނުންވުމުންނެވެ. ކޮންމެވެސް މުޞީބާތެއް ކުރިމަތިވުމުން އެކަމުން ސަލާމަތްވުމަށެވެ. އެއީ ރަނގަޅު ގޮތެއް ނޫނެވެ. އެއީ ހެދޭ ގޯހެކެވެ.  
ނަމާދަކީ ﷲ ތަޢާލާ އާއި ތިމާ އާއި ދެމެދުގައި ގުޅުން އުފެއްދުމަށް އޮތް ވަސީލަތެކެވެ. އެންމެ މުހިންމު ވަސީލަތެވެ. ﷲ ތައާލާ އާއި މުޢާމަލާތު ކުރުމަށްވެސް އޮތް މަގެވެ. ފުރަތަމަ ނަމާދުކުރާށެވެ! ﷲ ތައާލާ އާއި ތިމާ އާއި ދެމެދު ގުޅުންތައް އުފައްދާށެވެ.  
އެ ގުޅުންތައް އުފެދިގެން ދިއުމުން ތިބާ އެދޭ ކަންކަން ޙާޞިލުވެގެންދާނެއެވެ. ތިބާގެ މައްސަލަތަކަސް ޙައްލު ފެންނާނެއެވެ. ވީމާ ފުރަތަމަ ކުރަން ޖެހޭ ކަމަކީ ނަމާދުތައް ފުރިހަމައަށް އަދާކޮށް ﷲ ތަޢާލާ އާއި ގުޅުން އުފެއްދުމެވެ.  
ފަރުޟު 5 ނަމާދުން އެންމެ ނަމާދެއްވެސް ނުއަޅާށެވެ. ކޮންމެ ދުވަހަކުވެސް 5 ނަމާދު އަދާކުރާށެވެ. ފަރުވާތެރިކަމާއިއެކުގައެވެ. ޚުޝޫޢަތްތެރި ކަމާއިއެކުގައެވެ. ނަމާދު ކުރަންޖެހޭނީ ނަމާދަކަށް ނަމާދެއް ނޫނެވެ. ﷲ ތަޢާލާ ޤަބޫލުފުޅު ކުރައްވަވާނެ ފެންވަރުގައެވެ. ނަމާދުކުރުމުގެ ފައިދާ ފެންނާނީ އެއިރުންނެވެ.  
ފަރުޟު ނަމާދުން އުނިވާބައި ރަވާތިބް ސުންނަތުން ފޫބައްދައިދެއެވެ. ވީމާ ކުރާ ނަމާދުތައް ފުރިހަމަކުރުމަށްޓަކައި ރަވާތިބު ސުންނަތްތައް ކުރަން ޖެހެއެވެ. ނަމާދުކުރަން ލޯބި ކުރުމަކީ އެއީއެވެ.
 
- މުފްތީ މެންކުގެ ދަރުސަކުން