ދިރާގު ދިވެހި ޕްރިމިއާ ލީގުގައި މިއަދު ހަވީރު ޓީސީ ސްޕޯޓްސް ކްލަބް އަތުން އޮޑި ސްޕޯޓްސް ކްލަބް މޮޅުވި މެޗުގައި ފިޓްޖެހިގެން ދަނޑުމަތީގައި ފަރުވާ ދިނުމަށް ފަހު، ހޮސްޕިޓަލަށް ގެންގޮސް، އޮޑީގެ ކެޕްޓަން، މުހައްމަދު ރަޝީދު (ހޮކޭ) އަށް ފަރުވާދެމުން އެބަގެންދެ އެވެ.
ބޯ ވިއްސާރައިގެ ތެރޭގައި މެޗުގެ ބޮޑުބައި ކުޅެން ޖެހުނު މިއަދުގެ މެޗުން އޮޑި މޮޅުވީ 3-0 އިންނެވެ. މި މެޗުގެ 66 ވަނަ މިނިޓްގައި، ދަނޑުގެ މެދެއްހާ ހިސާބުން މަތިން އައި ބޯޅައަކަށް ފުންމައިގެން އަރައި ވެއްޓުނު ފަހުން ހޮކޭ އަށް ދަނޑުމަތީގައި ގިނަ އިރުތަކެއް ވަންދެން ފަރުވާ ދިނުމަށް ފަހު، އަށިގަނޑުގައި ދަނޑުން ބާލައި، ވަގުތުން އޭޑީކޭ ހޮސްޕިޓަލަށް ގެންދިޔަ އެވެ.
ރ. އަލިފުއްޓަށް އުފަން، ހޮކޭ އަށް ތިން ފަަހަރެއްގެ މަތިން ފިޓްޖެހުނު ކަމަށް އޮޑީގެ އޮފިޝަލް އަލީ ޝިފާޒު ވަނީ މީޑިއާ އަށް މައުލޫމާތު ދީފަ އެވެ. އެ ގޮތުން، ފުރަތަމަ ފަހަރަށް ދަނޑުމަތިން ފިޓްޖެހުނުއިރު، ދެ ވަނަ ފަހަރަށް ފިޓް ޖެހުނީ ހޮސްޕިޓަލަށް ގެންދިޔަ މަގުމަތީގަ އެވެ. އަދި، ތިން ވަނަ ފަހަރަށް ފިޓްޖެހުނީ ހޮސްޕިޓަަލަށް ގެންދިޔަ ފަހުން ކަމަށް އޭނާ ވަނީ ބުނެފަ އެވެ.
އަނިޔާވެގެން ހޮކޭ އަށް ދަނޑުމަތީގައި ފަރުވާ ދިނުމަށް ފަހު ސްޓްރެޗަރުގައި ދަނޑުން ގެންދަނީ--- ފޮޓޯ: ރާއިފް ޔޫސުފް / އަދަދު ސްޕޯޓްސް
އިމަޖެންސީ ޔުނިޓްގައި ބާއްވައިގެން ހޮކޭ އަށް ފަރުވާ ދެމުން އަންނައިރު، މިހާރު ހާލު އަންނަނީ ރަނގަޅުވަމުންނެވެ.
ފުރަަތަމަ ޑިވިޝަނުގައި ގިނަ ކްލަބްތަކަކަށް ކުޅެފައިވާ ހޮކޭ، ފުރަތަމަ ޑިވިޝަނުގެ ފުޓްބޯޅައިން ރިޓަޔާކުރުމަށް ފަހު، އެނބުރި އައީ އޮޑީގެ ކެޕްޓަންގެ ގޮތުގައި މި ސީޒަނުގަ އެވެ.
އޮޑިން މިރޭ ނެރުނު ބަޔާނެއްގައި ވަނީ ހޮކޭ އަށް ދިމާވި މި ކުއްލި ހާލަތުގައި އޭނާ އަށް މެޑިކަލް އެހީތެރިކަން ފޯރުކޮށްދިން އޮޑީގެ ފިޓްނަސް ކޯޗު، އަހުމަދު މަހުފޫޒް މުހައްމަދު އާއި ޓީސީގެ ފިޒިއޯ ޝަރަފުއްދީން (ޝަރަފް) އަދި މާޒިޔާގެ މެޑިކަލް އޮފިސަރު، ޑރ. ހިޝާމް ޒަކީ އަށް ޝުކުރު އަދާކޮށްފަ އެވެ.