ބޮލީވުޑްގެ މަގުބޫލު ޑައިރެކްޓަރު ޑޭވިޑް ދަވަން ޑައިރެކްޓްކޮށް ބެލުންތެރިންނަށް ގެނެސްދޭ ފިލްމު "ހެ ޖަވާނީ ތޯ އިޝްގް ހޯނާ ހޭ"ގެ ޓްރެއިލާ ދައްކާލައިފިއެވެ. މި ފިލްމަކީ، އޮޅުންބޮޅުންތަކުން ފުރިގެންވާ، ހެއްވާ މަޖާ ހާދިސާތަކެއް ދައްކުވައިދޭނެ ފިލްމެއްކަން އިއްޔެ ރިލީޒްކުރި ޓްރެއިލާއިން އެނގިގެން ހިނގައްޖެކަމަށް ބެލުންތެރިން ވަނީ ބުނެފައެވެ. ވަރުން ދަވަން، މްރްނާލް ތާކޫރް އަދި ޕޫޖާ ހެގްޅޭ މުހިންމު ރޯލުތައް ކުޅެފައިވާ މި ފިލްމުގެ ވާހަކަ ބިނާވެފައިވަނީ ދެމީހަކާ ލޯބީގެ ގޮތުން ގުޅިގެން އުޅުމުގެ ތެރޭގައި ދިމާވާ "ޑަބަލް ޓްރަބަލް" ނުވަތަ ދެގުނަ ތަކުލީފުތަކެއްގެ މައްޗަށެވެ. މި ފިލްމުގެ ޓްރެއިލާގައި ޑޭވިޑް ދަވަންގެ ކުރީގެ މަޝްހޫރު ފިލްމެއް ކަމަށްވާ "ބީވީ ނަމްބަރު 1"ގެ ކްލެސިކް ލަވަތައް ކަމަށްވާ "ޗުނަރީ ޗުނަރީ" އަދި "އިޝްޤް ސޯނާ ހައި" ފަދަ ލަވަތައް ބޭނުންކޮށްފައި ހުރުމުން، ބެލުންތެރިން މާޒީގެ ފޮނި ހަނދާންތަކަކަށް ގެންގޮސްދޭ ކަމަށް ވެސް ގިނަބަޔަކު ވަނީ ބުނެފައެވެ. ފިލްމު "ހެ ޖަވާނީ ތޯ އިޝްގް ހޯނާ ހޭ"ގެ ޓްރެއިލާގެ މަންޒަރެއް--ފޮޓޯ/އެންޑީޓީވީ އަންނަ މަހުގެ ފަސް ވަނަ ދުވަހު ސިނަމާތަކަށް ގެންނަން ތާވަލުކޮށްފައި އޮތް ފިލްމު "ހެ ޖަވާނީ ތޯ އިޝްގް ހޯނާ ހޭ" އަކީ ވަރުންގެ ބައްޕަ ޑޭވިޑް ދަވަންގެ ކެރިއަރުގެ އެންމެ ފަހު ފިލްމަށް ވެދާނެ ކަމަށް ވެސް ވަނީ ބުނެފައެވެ. މި ފިލްމަކީ، ވަރޫން ހިމަނައިގެން ޑޭވިޑް އުފެއްދި ހަތަރު ވަނަ ފިލްމެވެ. ދެ ބަފައިން އެކީގައި ކުރިން ގެނެސްދިން ފިލްމުތަކަކީ 2020ގެ "ކޫލީ ނަމްބަރު 1" އާއި 2018ގެ "ޖުޅުވާ 2"ގެ އިތުރުން 2014 ގެ "ތޫ މޭރާ ހީރޯ"އެވެ.