އެމެރިކާ ސަރުކާރުގެ 43 ދުވަހުގެ ދިގު ޝަޓްޑައުން ނިމުމަކަށް އައުމާއެކު، ދުނިޔޭގެ ކްރިޕްޓޯ މާކެޓަށް ވަގުތީ ހަމަޖެހުމެއް ލިބިއްޖެއެވެ. އިޤްތިޞާދީ ގޮތުން އޮތް ބައެއް ހާސްކަން ފިލައިގެން ދިއުމުން، އެންމެ ބޮޑު ކްރިޕްޓޯ ކަރަންސީ ކަމަށްވާ ބިޓްކޮއިންގެ އަގު ގާތްގަނޑަކަށް 103,600 ޑޮލަރުގައި ހިފެހެއްޓިފައިވާއިރު، އިންވެސްޓަރުން ދަނީ އިތުރު އިޤްތިޞާދީ އިޝާރާތްތަކަށް އިންތިޒާރު ކުރަމުންނެވެ. މި ހަމަޖެހުމާއެކު، ޓްރޭޑަރުންގެ ސަމާލުކަން ވަނީ ބޮޑެތި އިންވެސްޓަރުންގެ ހަރަކާތްތަކަށް ހުއްޓިފައެވެ. ތަޖުރިބާކާރުން ފާހަގަކުރާ ގޮތުގައި، ބިޓްކޮއިންގެ އަގު ހިފެހެއްޓުމަށް 101,000 ޑޮލަރާއި 101,500 ޑޮލަރަކީ މުހިންމު ސަޕޯޓު ލެވެލްތަކެކެވެ. އަދި އަގު މައްޗަށް ދިއުމަށް 105,000 ޑޮލަރުގެ ހުރަހަކީ ފަހަނަޅައި ދާންޖެހޭ މުހިންމު ލެވެލްއެކެވެ. https://sun.mv/213567 ބިޓްކޮއިންގެ އަގު ހިފެހެއްޓިފައިވާއިރު، އެހެނިހެން ކްރިޕްޓޯ ކަރަންސީތަކަށް ވަނީ އަގު ދަށްވުމުގެ ޕްރެޝަރު ކުރިމަތިވެފައެވެ. ދެވަނައަށް އެންމެ ބޮޑު ކަރަންސީ ކަމަށްވާ އީތީރިއަމްގެ އަގު 2.7 އިންސައްތަ ދަށްވެ، 3,454 ޑޮލަރަށް ވެއްޓިފައިވެއެވެ. މީގެ އިތުރުން ސޮލާނާ، އެކްސްއާރްޕީ، އަދި ޑޯޖްކޮއިން ފަދަ އެހެނިހެން މަޝްހޫރު ކޮއިންތަކަށްވެސް ވަނީ ކޮންމެވެސް ވަރެއްގެ ދަށްވުމެއް އައިސްފައެވެ. މާކެޓުގެ ހާލަތާ ގުޅޭގޮތުން ވާހަކަ ދައްކަވަމުން، ޕީއައި42 ގެ ކޯ-ފައުންޑާ އަދި ސީއީއޯ، އަވީނާޝް ޝެކާ ވިދާޅުވީ، މިއީ މާކެޓުގެ ބޮޑެތި ހަރަކާތްތަކަށް ފަހު އަންނަ "ހަމަޖެހުމުގެ މަރުހަލާއެއް" ކަމަށާއި، މިފަދަ ދަނޑިވަޅުތަކުގައި ބޮޑެތި މާލީ އިދާރާތަކާއި ދުނިޔޭގެ އިޤްތިޞާދީ ފެކްޓަރުތަކުގެ ނުފޫޒު ބޮޑުވާނެ ކަމަށެވެ. ޑެލްޓާ އެކްސްޗޭންޖްގެ ރިސާޗް އެނަލިސްޓް، ރިޔާ ސެހްގަލް ފާހަގަކުރެއްވި ގޮތުގައި، ބިޓްކޮއިންގެ އަގު 105,000 ޑޮލަރުން ދަށުގައި އުޅުނު ކަމުގައި ވިޔަސް، އޮން-ޗެއިން ޑޭޓާއިން ހިތްވަރު ލިބެއެވެ. "ދިގު މުއްދަތަށް ކޮއިން ހިފަހައްޓާ ފަރާތްތަކުން އަދިވެސް ދަނީ ކޮއިން އެއްކުރަމުން، މިއީ މާކެޓު އަލުން އާރާސްތުވުމުގެ އުންމީދު އާކޮށްދޭ ކަމެއް،" އޭނާ ވިދާޅުވިއެވެ. ޖުމްލަކޮށް ބަލާއިރު، ކްރިޕްޓޯ މާކެޓުގެ މިހާރުގެ ހާލަތު ހުރީ ރައްކާތެރިކަމާއެކުއެވެ. ނަމަވެސް، ދިގު މުއްދަތަށް އިންވެސްޓްކުރާ ފަރާތްތަކުން ކޮއިން އެއްކުރަމުންދާތީ، މާކެޓަށް އިތުރު ފައިސާ ވަންނަ ހިސާބުން ބިޓްކޮއިންގެ އަގު އަލުން 105,000 ޑޮލަރުގެ ހުރަސް ފަހަނަޅައި ދިއުމަށް މަސައްކަތް ކުރާނެ ކަމަށް ތަޖުރިބާކާރުން ލަފާކުރެއެވެ.