ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން ރާއްޖެއަށް އެތަކެތި އެތެރެކުރަން އުޅުނުކަމުގެ ތުހުމަތުގައި މީހަކު ހައްޔަރުކޮށް ޝަރީއަތް ނިމެންދެން ބަންދުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 45 އަހަރުގެ ދިވެހި ފިރިހެނެކެވެ.
އޭނާ މަސްތުވާތަކެތި އެތެރެކުރަން މަސައްކަތް ކޮށްފައިވަނީ ހަށިގަނޑުގައި އެތަކެތި ފޮރުވައިގެންކަމަށް ކޯޓު އަމުރުގައި ބަޔާންކޮށްފައިވެއެވެ. އެގޮތުން އޭނާގެ ހަށިގަނޑުން ގިނަ އަދަދެއްގެ މަސްތުވާތަކެތި ހުރި ބުލެޓުތަކެއް ފުލުހުން ވަނީ ހޯދާފައެވެ.
އޭނާ ހައްޔަރު ކުރުމަށްފަހު ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ކޯޓުން ނެރުނު އަމުރުގައި ބުނެފައިވަނީ އޭނާގެ މައްޗަށް ތުހުމަތު ކުރެވޭ މިންވަރަށް ހެއްކާއި ގަރީނާ ހުށަހެޅިފައިވާ ކަމަށެވެ. އެގޮތުން ފުލުހެއްގެ ބަޔާނާއި، ހުޅުމާލެ ހޮސްޕިޓަލްގެ ސީޓީ ސްކޭން ލިއުންތަކާއި، ރިޕޯޓާއި އިތުރު ހެކި ހުށަހަޅާފައިވާކަމަށް މި އަމުރުގައި ވަނީ ބުނެފައެވެ. އަދި އޭނާ ހަށިގަނޑު އެތެރޭގައި ފޮރުވައިގެން އެތެރެކުރި މަސްތުވާތަކެތީގެ ބަރުދަނަށް ބަލާއިރު، ޓްރެފިކިން ގެ މިންގަނޑަށް ފެތޭކަމަށް ކޯޓު އަމުރުގައި ބުނެފައިވެއެވެ.
އެހެންކަމުންމުޖުތަމައުގެ ސަލާމަތާއި ރައްކާތެރިކަމަށްޓަކައި ޝަރީއަތް ނިމެންދެން ބަންދު ކުރުމަށް އަމުރުކޮށްފައިވެއެވެ. އިތުރަށް ކޯޓު އަމުރުގައި ބުނެފައިވަނީ އޭނާއަކީ އެ ބާވަތުގެ ހައްޔަރާ، ބަންދު ލޮގް ހުރި ފަރާތަކަށްވާތީ، ބަންދުން ދޫކޮށްލައިފިނަމަ ކުށް ތަކުރާރު ކުރުމުގެ ފުރުސަތު އޮތްކަމަށެވެ.