އޮކްޓޫބަރު މަހަކީ އިންޓަނެޓު މެދުވެރިކޮށް ހިންގާ ކުށްތަކަށް ހޭލުންތެރިކަން އިތުރުކުރުމުގެ ބައިނަލްއަގުވާމީ މަހުގެ ގޮތުގައި ފާހަގަކުރާ މަހެވެ.
ރޭ ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން، ސައިބަރ ކްރައިމް ސެންޓަރުގެ ފަރާތުން ޗީފް އިންސްޕެކްޓަރ އޮފް ޕޮލިސް މުޙައްމަދު ފަޔާޒް އިސްމާއީލް ވިދާޅުވީ، މި މަސް ފާހަގަކުރުމަށާއި ރައްޔިތުން ހޭލުންތެރިކުރުވުމަށް ހާއްސަ ޕްރޮގްރާމުތަކެއް ހިންގުމަށް ރާވާފައިވާ ކަމަށާއި ސޯޝަލް މީޑިއާގައި ވެސް ހާއްސަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ. އެގޮތުން ފޭސްބުކް، ޓިކްޓޮކް، އިންސްޓަގްރާމް އަދި ޔޫޓިއުބް ޗެނަލް ލޯންޗުކޮށް ރައްޔިތުން ހޭލުންތެރިކުރުވުމަށް ހާއްސަ ހަރަކާތްތަކެއް ކުރިއަށް ގެންދަން ނިންމާފައިވާ ކަމަށެވެ. 
މީގެ އިތުރުން މި މަހު 20 ވަނަ ދުވަހު އަތޮޅުތަކުގައި، ފުލުހުންގެ އިދާރާތައް ހުރި ހުރިހާ ރަށެއްގައި ވެސް އާންމު ރައްޔިތުން ހޭލުންތެރިކުރުވުމަށް މައުލޫމާތުދިނުމުގެ ޕްރޮގްރާމްތައް ކުރިއަށް ގެންދާނެކަމަށާ އަދި ހަމަ އެދުވަހު ހުޅުމާލެ ހިޔާ ސަރަހައްދުގައި ވެސް މިކަމަށް ހާއްސަ ބޫތުތަކެއް ބަހައްޓައިގެން މައުލޫމާތުދިނުމުގެ ހަރަކާތްތައް ކުރިއަށް ގެންދާނެކަމަށް ވިދާޅުވިއެވެ.
ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން ޗީފް އިންސްޕެކްޓަރ އޮފް ޕޮލިސް ރައޫފުއްދީން ސައީދު ވިދާޅުވީ މިހާރު ރާއްޖޭގެ ސައިބަރ ކްރައިމްގެ ހާލަތު އޮތްގޮތުން، އެންމެ މަހެއްގައި ކޮށްލާ މަސައްކަތުން އެކަމަށް އެކަށީގެންވާ ގޮތެއްގައި ހޭލުންތެރި ނުކުރެވޭނެ ކަމަށެވެ. އަދި މިފަދަ ކުށްތައް ހުއްޓުވުމަށް ފަރުދީ ގޮތުންނާއި ގައުމީ ފެންވަރުގައި މަސައްކަތްތަކެއް ކުރަން އެބަޖެހޭ ކަމަށާ އަދި މުޅި މުޖުތަމައުގެ އެއްބާރުލުން ވެސް  މިފަދަ ކުށްތައް ހުއްޓުވުމަށް ބޭނުންވާ ކަމަށް ވިދާޅުވިއެވެ. 
"މިހާރު ގިނަވެގެން މިއުޅެނީ ސައިބަރ ސެކިއުރިޓީ ހިމެނޭ ސައިބަރ ކްރައިމްތައް. މިފަދަ ކުށްތައް މި ހިންގަނީ ހަގީގަތުގަ ސައިބަރ ސެކިއުރިޓިއަށް ހޭލުންތެރި ނުވީމަ. ޑިވައިސްތައް އޭގެ އެންމެ ރަނގަޅު ގޮތުގައި އަދި ރައްކާތެރިގޮތުގައި ބޭނުން ނުކުރެވޭތީ. ސައިބަރ ސްޕޭސްގެ ތެރެއިން އަޅުގަނޑުމެން ވަރަށް ބައިވަރު ކަންކަން އެބަކުރަން. މުނިފޫހިފިލުވުމާއި، ފައިސާގެ މުއާމަލާތްތަކާ އަދި ތައުލީމު ހާސިލުކުރުންފަދަ އެތައް ކަމެއް އެބަހިމެނޭ. އެހެންނަމަވެސް މިތަކެތި ރައްކާތެރިގޮތުގައި ބޭނުން ނުކުރެވުމުގެ ނަތީޖާއަކަށްވަނީ ކޮންމެވެސް ހިސާބަކުން ގެއްލުމެއްލިބުމުގެ ފުރުސަތު ވަރަށް ބޮޑުވެގެން ދިއުން." ރައޫފުއްދީން ސައީދު ވިދާޅުވިއެވެ. 
ރައޫފުއްދީން ސައީދު އިތުރަށް ވިދާޅުވީ، މި މަސް ސައިބަރ ކްރައިމް އެވެއާނަސް މަހެއްގެ ގޮތުގައި ފާހަގަކުރަނީ ހަގީގަތުގައި މިކަމުގެ ނުރައްކާތެރިކަން އޮތް މިންވަރު ރައްޔިތުންނަށް އަންގައިދިނުމަށް ކަމަށެވެ. އަދި އިންޓަނެޓުގެ ވަސިލަތްތައް ރައްޔިތުންނަށް އެންމެ ރަނގަޅަށް ބޭނުންކުރެވޭނެ ގޮތަކީ ކޮބައިތޯއާއި އެކި ވަސީލަތްތައް ބޭނުންކުރަމުންދާއިރު، ގެއްލުމެއް ނުލިބޭ ގޮތަށް ރައްކާތެރިކޮށް ބޭނުންކުރެވޭނެ ގޮތްތަކަކީ ކޮބައިކަން ރައްޔިތުންނާއި، މުއައްސަސާތަކާއި ސަރުކާރުގެ އިދާރާތްތަކުގެ ބޭފުޅުންނަށް ވެސް ކިޔައިދިނުމަށް މި މަހު ހާއްސަ ހަރާކަތްތަކެއް ހިންގާނެ ކަމަށެވެ. 
އަދި އޮކްޓޫބަރު މަސް ސައިބަރ ކްރައިމް އެވެއާނަސް މަހެއްގެ ގޮތުގައި ފާހަގަކުރި ނަމަވެސް މިހާރު މި މުޖުތަމައު އޮތް ހާލަތަށް ބަލައިފިނަމަ އެއީ އެންމެ މަހަކުން ހޭލުންތެރިވެ ކަންކަން ހައްލުވާނެކަމެއް ނޫންކަމަށާ އަދި ފުލުހުންގެ ޚިދުމަތުގެ ކުރިއަށް އޮތް ފަސް އަހަރުގެ ސްޓްރެޓީޖިކް އެކްޝަން ޕްލޭންގައި ވެސް މިފަދަ ކަންކަމަށް ހޭލުންތެރިކުރުވުމުގެ ގޮތުން ކުރަންވާ ކަންކަން ރާވައި ހިމަނާފައިވާ ކަމަށްވެސް ވިދާޅުވިއެވެ.  އެގޮތުން، ސްކޫލުތަކުގެ މުދައްރިސުންނާއި ދަރިވަރުންނާއި ބެލެނިވެރިންނަށް އަމާޒުކޮށްގެން ވެސް ހޭލުންތެރިކުރުވުމުގެ މިފަދަ ގިނަ ޕްރޮގްރާމުތަކެއް ކުރިއަށް ގެންގޮސްފައިވާކަމަށް ވިދާޅުވިއެވެ. 
އޭގެ އިތުރުން، ސައިބަރ ކްރައިމް ހުއްޓުވުމަށް ގާނޫނީ ގޮތުން ވެސް ކުރަންހުރި ބައިވަރު ކަންކަން އެބަހުރި ކަމަށާއި އެގޮތުން މިހާރު ވެސް ރައްޔިތުންގެ މަޖިލީހަށް މިކަމާ ގުޅޭ ތިން ބިލެއް ހުށަހަޅާފައިވާނެ ކަމަށްވެސް ވިދާޅުވިއެވެ. އޭގެ ތެރޭގައި ގާނޫނުލް އުގޫބާތަށް ގެންނަ ބަދަލުތަކެއްގެ ތެރެއަށް ސައިބަރ ކްރައިމް މައްސަލަތައް އިތުރުކޮށް އަދި ޖިނާއީ އިޖުރާއަތުގެ ގާނޫނަށް ބަދަލުތައް ގެނައުމަށް ވެސް ހުށަހަޅާފައިވާ ކަމަށެވެ. މީގެއިތުރުން ސާވިސް ޕްރޮވައިޑަރުންގެ ފަރާތުން މައުލޫމާތުހޯދުމާއި، ރާއްޖެއިން ބޭރުން މައުލޫމާތު ހޯދުމާއި، އެވިޑެންސް ކަލެކްޓުކުރުން އަދި މިކަހަލަ އެތައް ކަމެއްގައި ފުލުހުންނަށް އެއްބާރުލުން ދިނުމާ ގުޅޭގޮތުން ބިލުގައި ހިމަނާފައިވާނެކަމަށް ވިދާޅުވިއެވެ. 
‘’ދެން އޮންނާނީ ގާނޫނަށް ގެންނަ ބަދަލުތަކެއް. އެ ބަދަލުގެ ތެރެއިން، ރާއްޖެއިން ބޭރުގެ ސާވިސް ޕްރޮވައިޑަރތަކުން، އަޅުގަނޑުމެންނަށް ހުށަހަޅާ ޖިނާއީ މައްސަލަތަކުގެ އެވިޑެންސް [ރާއްޖޭން ބޭރުގެ ސަރވިސް ޕްރޮވައިޑަރުންގެ ފަރާތުން] ހޯދޭނެ މަގުތަކެއް ފަހިވެގެން ދާނެ. ދެ ވައްތަރެއްގެ ސައިބަރ ކްރައިމް މިއުޅެނީ. އެއް ވައްތަރަކީ ސައިބަރ އެނޭބަލްޑް ކްރައިމް. މިކަހަލަ ކްރައިމްތަކުގައި ކޮމްޕިއުޓަރު މި ބޭނުންކުރަނީ، މިހާރު ކުށްވެރިން ވެސް ޓެކްނޮލޮޖީ ބޭނުންކުރޭ. އާންމު ދިރިއުޅުމުގައި ވެސް ޓެކްނޮލޮޖީ ބޭނުންކުރީމަ ފަސޭހަވާނެ. ހަމަ އެގޮތަށް މި ޓެކްނޮލޮޖީތައް ބޭނުންކޮށްގެން މި ކްރައިމްތައް ހިންގާ ފަރާތްތަކުން އައު އީޖާދުތަކެއް ހޯދާނެ. އެކި ގޮތްގޮތަށް މި ކުށްތަކަށް އަރައިގަނޭ.'' ޗީފް އިންސްޕެކްޓަރ އޮފް ޕޮލިސް ރައޫފުއްދީން ސައީދު ވިދާޅުވިއެވެ.
 
 
ހަބަރު: ޕޮލިސް