2024 ވަނަ އަހަރަކީ މިހާތަނަށް ރެކޯޑުކުރެވުނު އެންމެ ހޫނުގަދަ އަހަރު ކަމަށް ދިރާސާތަކުން ދައްކައިފިއެވެ.
ވޯލްޑް ވެދަރ އެޓްރިބިއުޝަން (ޑަބްލިއުޑަބްލިއުއޭ) އާއި ކްލައިމެޓް ސެންޓްރަލްގެ ދިރާސާއަކުން ފާހަގަކޮށްފައިވާ ގޮތުގައި މޫސުމަށް އަންނަ ބަދަލުތަކުގެ ސަބަބުން މުޅި ދުނިޔޭގެ ހޫނުމިން އަންނަނީ އިތުރުވަމުންނެވެ.
މި ދިރާސާގެ ނަތީޖާތަކުން ދައްކާގޮތުގައި އަންނަ އަހަރުގެ ގާތްގަނޑަކަށް 41 ދުވަހު ނުރައްކާތެރި މިންވަރަކަށް ހޫނުމިން އިތުރުވާނެއެވެ. އަދި މިއީ އިންސާނުންގެ ޢަމަލުތަކުގެ ސަބަބުން މޫސުމަށް އަންނަ ބަދަލުތަކާ ގުޅިގެން ކުރިމަތިވާ ކަމެއް ކަމަށްވެސް ބުނެފައިވެއެވެ.
Advertisement
ދިރާސާތަކުން ދައްކާގޮތުން، މޫސުމަށް ކުރާ ނޭދެވޭ އަސަރުތައް އެންމެ ބޮޑަށް ކުރަނީ އިކުއޭޓަރާ ކައިރި ޤައުމުތަކަށެވެ. ޚާއްޞަކޮށް މޫސުމަށް އަންނަ ބަދަލުތަކުގެ ސަބަބުން އަސަރުކުރާ ކުދި ޖަޒީރާ ޤައުމުތަކުގެ (ސިޑްސް) ރައްޔިތުންނަށް 130 އަށްވުރެ އިތުރަށް ހޫނުމިން ތަޖުރިބާކުރަން ޖެހެއެވެ.
ސިޑްސް ޤައުމުތަކަކީ މުޅި ދުނިޔޭގެ ނިސްބަތުން 0.02% ގްރީންހައުސް ގޭސް އުފައްދާ ޤައުމުތަކެއް ނަމަވެސް، މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ގިނަ ނުރައްކާތަކާ ކުރިމަތިލާން ޖެހެނީ އެ ޤައުމުތަކަށެވެ. މީގެ ތެރޭގައި މޫދުގެ ލޮނުގަނޑު އުފުލުމާއި، ގަދަފަދަ ސައިކްލޯންތަކާއި، ބޯކޮށް ވާރޭވެހުމާއި، ހޫނުގަދަވުމާއި، ހަނަފަސްވުން ހިމެނެއެވެ.
ޑަބްލިއުޑަބްލިއުއޭ އިން މިއަހަރު ކުރި 29 ދިރާސާއިން ދައްކާގޮތުގައި މޫސުމަށް އަންނަ ބަދަލުތަކުގެ ސަބަބުން މުޅި ދުނިޔޭގައި އެކި ބާވަތުގެ ގުދުރަތީ ކާރިސާތައް އިތުރުވެފައިވެއެވެ. މިކަމުގެ ސަބަބުން މަދުވެގެން 3،700 މީހުން މަރުވެ، އަދި މިލިއަނުން މީހުން ގެދޮރު ދޫކޮށް ދާން މަޖުބޫރުވެފައިވެއެވެ.