ހުޅުމާލޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) ގެ މުވައްޒަފުންނަށް ޚާއްސަކޮށްގެން ތަރައްޤީކުރި "ރީތިގަސް" ފްލެޓުތައް ލިބުނު ފަރާތްތަކަށް އެޕާޓްމަންޓުތަކުގެ ތަޅުދަނޑިތައް ހަވާލުކުރަން ފަށައިފިއެވެ.
މި މަޝްރޫޢަކީ ހުޅުމާލޭގެ އެއްވަނަ ފިޔަވަހީގައި އެޗް.ޑީ.ސީގެ މުވައްޒަފުންގެ ބޯހިޔާވަހިކަމުގެ ދަތިކަން ޙައްލުކުރުމަށް ފެށި މަޝްރޫޢެކެވެ.
މިކަމަށްޓަކައި ހުޅުމާލޭގެ ރީތިގަސް މަގުގައި ބޭއްވި ޚާއްސަ ރަސްމިއްޔާތެއްގައި ބައެއް މުވައްޒަފުންނަށް އެޕާޓްމަންޓުތަކުގެ ތަޅުދަނޑި ހަވާލުކޮށްދެއްވީ، ޢިމާރާތްކުރުމާއި ގެދޮރުވެރިކަމާއި، ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބުއެވެ. މި ރަސްމިއްޔާތާއެކު އެޗް.ޑީ.ސީގެ މުވައްޒަފުންނަށް ލިބުނު މި ފްލެޓުތަކަށް ވަނުމުގެ މަގު ފަހިވެގެންދިޔައީއެވެ.
އެޗް.ޑީ.ސީން ދެއްވި މަޢުލޫމާތުތަކަށް ބަލާއިރު، މިރޭ ތަޅުދަނޑި ހަވާލުކުރަން ފެށީ މިހާތަނަށް މަސައްކަތް ނިމިފައިވާ ޓަވަރު A އަދި ޓަވަރު B ގައި ތަރައްޤީކޮށްފައިވާ ޖުމްލަ 153 އެޕާޓްމަންޓްގެ ތަޅުދަނޑިތަކެވެ. މިއީ އެޗް.ޑީ.ސީގެ މުވައްޒަފުންގެ ބޯހިޔާވަހިކަމުގެ ބޮޑު މައްސަލައަކަށް ޙައްލެއް ގެނެސްދޭނެ ކަމެއްކަމަށް ބެލެވެއެވެ.
މީގެ އިތުރުން، މި މަޝްރޫޢުގެ ދަށުން އަދި ބާކީ ހަތަރު ޓަވަރުގެ މަސައްކަތް ކުރިއަށްދާކަމަށް އެޗް.ޑީ.ސީން ހާމަކުރައްވައެވެ. މި ބާކީ ހުރި ޓަވަރުތަކުގެ މަސައްކަތް އަންނަ ޑިސެމްބަރު މަހުގެ 25 ވަނަ ދުވަހުގެ ކުރިން ނިންމުމަށް އެ ކޯޕަރޭޝަނުން ވަނީ އަމާޒު ހިފާފައެވެ. އެހެންކަމުން، މި މަޝްރޫޢުގެ ދަށުން ލިބޭނެ ހުރިހާ ފްލެޓެއްވެސް ކުރިއަށް އޮތް މަދު ދުވަސްކޮޅެއްގެ ތެރޭގައި އެ މުވައްޒަފުންނާ ހަވާލުކުރެވޭނެކަމަށް ލަފާކުރެވެއެވެ.