ފަލަސްޠީނު ރައްޔިތުންނާއެކު ތިބިކަން އަމަލީ ގޮތުން ދައްކަންޖެހޭ: ރައީސް
ފަލަސްޠީނު ރައްޔިތުންނާއެކު ދުނިޔެ އެއްބައިވަންތަކަންމަތީ ދެމިތިބިކަން, އަމަލީގޮތުން ދެއްކުން އިތުރުކުރަން ޖެހޭ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. ރައީސް މިގޮތަށް ވިދާޅުވީ މިއަދު ފާހަގަކުރަމުންދާ، ފަލަސްޠީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަގުވާމީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ. ރައީސްގެ ޕޯސްޓުގައި ވަނީ، ފަލަސްޠީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަގުވާމީ ދުވަސް ފާހަގަކުރާއިރު، ހަނގުރާމަ ހުއްޓާލުމުގެ އެއްބަސްވުމާ ޚިލާފުވެ، އިސްރާއިލުން ޣައްޒާއަށް މެދުކެނޑުމެއްނެތި ދޭ ހަމަލާތަކާ ރާއްޖެއިން ދެކޮޅުކަން ފާހަގަކުރައްވާފައެވެ. އަދި ގަވައިދާ ޚިލާފަށް ފަލަސްޠީނުގައި އިސްރާއީލު ރައްޔިތުން އާބާދުކުރުމާ ދެކޮޅުކަން ވެސް އެ މަނިކުފާނު ފާހަގަކުރެއްވިއެވެ. https://x.com/MMuizzu/status/1994669405326999560 ފަލަސްޠީނު ރައްޔިތުންގެ އާންމު ދިރިއުޅުމަށް ބޮޑެތި ހުރަސްތަކެއް އެޅުމުން ފަލަސްޠީނުގެ ހަމަޖެހުމާއި އިގުތިސާދީ ގޮތުން ރަނގަޅު މުސްތަގުބަލެއް ހޯދުމުގެ އުންމީދު ގެއްލޭ ކަމަށް ރައީސް ވިދާޅުވެފައިވެއެވެ. މި މޭރުމުން ވާހަކަދައްކަވަމުން ރައީސް ވިދާޅުވީ ފަލަސްޠީނު ރައްޔިތުންނާއެކު އެއްބައިވަންތަވުން، މާނަހުރި ޢަމަލަށް ބަދަލުކޮށް ފަލަސްތީނުގެ ރައްޔިތުންގެ ޙައްގުތަކާއި އުންމީދުތައް ފުރިހަމައަށް ޙަގީގަތަކަށް ހެދުމަށް ބައިނަލްއަގުވާމީ މުޖުތަމައުއިން އިތުރަށް މަސައްކަތްކުރަން ޖެހޭ ކަމަށެވެ. މީގެ އިތުރުން އެ މަނިކުފާނު ވަނީ 1967ގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސް ވެރިރަށަކަށް ހަދާ، ފަލަސްޠީނުގައި މިނިވަން ދައުލަތެއް ގާއިމުކުރުމަށް ގޮވާލި ގޮވާލެއްވުން ތަކުރާރުކުރައްވާފައެވެ. ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަގުގުވާމީ ދުވަހެއް ފާހަގަކުރަން ފަށާފައިވަނީ އދ.ގެ އާންމު މަޖިލީހުން 1977 ގައި މި ދުވަސް ފާހަގަކުރުމަށް ނިންމައިގެންނެވެ. ނޮވެމްބަރު 29، 1977 ވަނަ ދުވަހަކީ އދ. ގެ ގަރާރަކުން، ފަލަސްޠީނާއި އިސްރާއީލް، ދެ ދައުލަތެއްގެ ގޮތުގައި ވަކިކުރަން ފާސްކުރި ދުވަހެވެ. އެމެރިކާ މެދުވެރިވެގެން އިސްރާއީލާއި ހަމާސްއިން ކުރިއަށްގެންދިޔަ މަޝްވަރާތަކަށް ފަހު، ހަމަލާތައް މެދުކަނޑާލުމުގެ އެއްބަސްވުމެއްގައި ސޮއިކުރީ މިދިޔަ މަހު ނުވަ ވަނަ ދުވަހެވެ. ނަމަވެސް އިސްރާއީލުން ވަނީ ތަކުރާރުކޮށް އެ އެއްބަސްވުމާ ޚިލާފުވެފައެވެ. ޣައްޒާގެ މީޑިއާ އޮފީހުން ރިޕޯޓުކޮށްފައިވާ ގޮތުގައި، އެ އެއްބަސްވުން ހެދި ފަހުން، މިދިޔަ މަހުގެ 10 ވަނަ ދުވަހާއި މި މަހުގެ 22 ވަނަ ދުވަހާ ދޭތެރޭ އިސްރާއީލުން ވަނީ 497 ފަހަރު އެއްބަސްވުމާ ޚިލާފުވެފައެވެ. އެގޮތުން 142 ފަހަރު ޣައްޒާގެ ރައްޔިތުންނަށް އަމާޒުކޮށް ބަޑި ޖަހައި، 228 ފަހަރު ބޮމުގެ ހަމަލާތައް ދީފައިވާ ކަމަށް އެ އޮފީހުން ބުނެފައިވެއެވެ. އެ ހަމަލާތަކުގައި ޝަހީދުކޮށްލި މީހުންގެ އަދަދު 347އަށް އަރާ ކަމަށް ރިޕޯޓުތަކުގައިވެއެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ