އަންނަ އަންގާރަ ދުވަހު، ބާސެލޯސް ނަސަންދުރާގައި ފަށާ ހަތް ވަނަ ކެރަމް ވޯލްޑް ކަޕަށް ގައުމީ ފިރިހެން ކެރަމް ޓީމުން ފޯކަސް ބަހައްޓައިގެން މަސައްކަތްކޮށް ޓާގެޓްތައް ހާސިލްކުރަން މަސައްކަތްކުރާނެ ކަމަށް ޓީމުގެ ކުޅުންތެރިޔާ، އާދަމް އަދީލް ބުނެފި އެވެ.
ގައުމީ ކެރަމް ޓީމުގެ މައުލޫމާތު ހިއްސާ ކުރުމަށާއި މުބާރާތަށް ތައްޔާރުކުރި، ރާއްޖެ ޓީމުގެ ޕްރޮމޯޝަނަލް ލަވަ ލޯންޗްކުރުމަށް، ބުރާސްފަތި ދުވަހު، ހެންވޭރު ބޯޅަ ގޭގައި ކުރިއަށްދިޔަ އިވެންޓްގައި، "އަދަދު ސްޕޯޓްސް" އިން ކުރި ސުވާލަކަށް ދިން ޖަވާބުގައި، އަދީލް ބުނީ، ފިރިހެން ޓީމުން ބައިނަލްއަގުވާމީ ކޮންމެ މުބާރާތަކަށް ނުކުންނައިރު ވެސް އޮންނާނީ މަދުވެގެން ގަދަ ތިނެއްގެ ތެރޭގައި ހިމެނުމުގެ ޓާގެޓެއް ކަމަށެވެ.
"މި ފަހުން އެކި ޓްރެއިނިންތަކުގެ އެހީތެރިކަމާ އެކު މި އައީ އިމްޕޫރްވަމުން، އަސްލު ޓީމު އައީ ޕްރޮގްރެސް ވަމުން، ސްކޮޑުގެ ތެރޭގައި ހިމެނޭ ހުރިހާ ކުޅުންތެރިން ވެސް އައީ ޕްރޮގްރެސް ވަމުން. ދެން، ޕްލޭޔަރުން އިންޓަޗޭންޖް ވިޔަސް، ޓޮޕް އަށް މި އަރާ ހަތަރެއް ނޫނީ ފަސް ކުޅުންތެރިން ވަރަށް ޗޭންޖް ނުވޭ. ދެން އޭގެ ތެރެއިން ޓާގެޓް ހަދައިގެން މި އައީ މަދުވެގެން ފައިނަލް ކުޅެން ޖެހޭނެއޭ،" އަދީލް ބުންޏެވެ.
ކެރަމް ވޯލްޑް ކަޕްގައި ވާދަކުރާ ރާއްޖޭގެ ފިރިހެން ޓީމުގެ ސްކޮޑުގައި އަދީލްގެ އިތުރުން ހިމެނެނީ، އިބްރާހިމް ހުޖާން އަލީ، ހަސަން ނާޒިމް، އިސްމާއިލް އަޒްމީން އަދި މުހައްމަދު މުންތަސިރު އެވެ.
އަދީލް ބުނީ، ފިރިހެން ޓީމުގެ ކުޅުންތެރިންގެ ކިބައިގައި ކަނޑައަޅާ ޓާގެޓަށް ވާސިލްވުމުގެ ހުނަރު އެބަހުރި ކަމަށެވެ. އަދި، އަމިއްލަ ހުނަރު ތަރައްގީ ކުރަން، ކުޅުންތެރިން އަމިއްލަ އަށް މަސައްކަތް ކުރާކަން ވެސް އަދީލް ފާހަގަކޮށްފައިވެ އެވެ.
"އެ ކޮލިޓީ، އެ ސްކިލް އެބަހުރި އަޅުގަނޑުމެންގެ ޕްލޭޔަރުންގެ، ދެން، ވަރަށް ގިނަ ޕްލޭޔަރުންނަކީ ނެޝަނަލް ޓީމުގައި މި ލިބޭ ޓްރެއިނިންގެ އިތުރުން ޕްރައިވެޓް ޓްރެއިނިން އަށް ވެސް ޓޮޕް ލެވަލް ގައުމުތަކަށް ގޮސް، ޓޮޕް ކޯޗުން ކައިރީ ވޯކް ކުރާ ޕްލޭޔަރުން، އެހެންވީމަ، ވަރަށް ޕޮޒިޓިވްކޮށް ފެންނަނީ، އަޅުގަނޑުމެންގެ ޓާގެޓަކީ، އަބަދުވެސް ޓީމު އިވެންޓްގައި އެންމެ ކުޑަމިނުން ފައިނަލުގައި ކުޅުން،" އަދީލް ބުންޏެވެ.
ޓީމުގެ ޓާގެޓްތަކުގެ އިތުރުން، އިންޑިވިޖުއަލް ޓާގެޓްތައް ވެސް ކުުޅުންތެރިންގެ އެބަހުރިކަން ފާހަގަކޮށް، އަދީލް ބުނީ، ގަދަ 8 ގެ ތެރޭގައި ހިމެނުމަކީ ވެސް ބޮޑު ކާމިޔާބަކަށްވާނެ ކަމަށެެވެ.
"އެންމެ ބޮޑަށް ސިންގަލްސް ކުޅޭ ކުޅުންތެރިން ގަދަ އަށަކަށް އެރުނު ކަމަށް ވިޔަސް އެއީ ވަރަށް ބޮޑު ކާމިޔާބެއް. އެ ހިސާބުން ވަރަށް ވާދަވެރިވާނެ. ގަދަ އަށަކަށް އަރާފައި ދެ މެޗަށް ފަހު ފައިނަލަށް މި ދެވެނީ. ސިންގަލްސް އިވެންޓްތަކުގައި އެންމެ ކުޑަމިނުން ގަދަ އަށެއް، ދެން، ޓީމު އިވެންޓްގައި ފައިނަލް ކުޅުން ޓާގެޓަކީ ފިރިހެން ޓީމުގެ،" އަދީލް ބުންޏެވެ.
މިދިޔަ އަހަރު، އެެމެރިކާގެ ކެލަފޯނިއާގައި ކުރިއަށްދިޔަ، ހަ ވަނަ ކެރަމް ވޯލްޑް ކަޕުން ރާއްޖޭގެ އަންހެން އަދި ފިރިހެން ޓީމުން ލޯ މެޑަލް ހޯދި އެވެ. ފިރިހެން ގައުމީ ޓީމުން ޓީމް އިވެންޓްގައި ފުރަތަމަ ފަހަރަށް ކެރަމް ވޯލްޑް ކަޕެއްގައި މެޑަލެއް ހޯދިއިރު، އެ ޓީމުން ތިން ވަނަ ހޮވި މެޗުގައި ބައްދަލުކުރީ ސިންގަޕޫރާ އެވެ. އަންހެން ގައުމީ ޓީމުން ތިން ވަނަ ހޯދީ އެމެރިކާ ބަލިކޮށްފަ އެވެ.
ބާސެލޯސް ނަސަންދުރާގައި ހަތް ވަނަ ކެރަމް ވޯލްޑް ކަޕް އޮންނާނީ ޑިސެމްބަރު 2-6 އަށެވެ. މިއި، 2014 ވަނަ އަހަރުގެ ފަހުން، ރާއްޖޭގައި ކެރަމް ވޯލްޑް ކަޕް ބާއްވާ ފުރަތަމަ ފަހަރެވެ. އެ ފަހަރު ކެރަމް ވޯލްޑް ކަޕް އޮތީ ސަން އައިލެންޑް ރިސޯޓުގަ އެވެ. މި ފަހަރު، މާލެ ސަރަހައްދުގައި، ސަޕޯޓަރުންނަށް ވަދެވޭ ގޮތަށް ވޯލްޑް ކަޕްގެ މެޗުތައް އޮތުމުން އޭގެ ފައިދާ ކުޅުންތެރިންނަށް ނެގެން އޮތީ ވީހާވެސް ގިނަ ބަޔަކު ޓީމަށް ސަޕޯޓްކުރުމަށް އައިސްގެންކަން، ޓީމުގެ ކުޅުންތެރިންނާއި މުބާރާތް އިންތިޒާމްކުރާ ފަރާތްތަކުން ވަނީ ފާހަގަކޮށްފަ އެވެ.
ކެރަމް ވޯލްޑް ކަޕްގައި ރާއްޖޭގެ ފިރިހެން ކެރަމް ޓީމުގެ ފޯކަސް ބަހައްޓައިގެން ޓާގެޓްތަކާ ދިމާލަށް ކެރަމް ވޯލްޑް ކަޕްގައި ރާއްޖޭގެ ފިރިހެން ކެރަމް ޓީމުގެ ފޯކަސް ބަހައްޓައިގެން ޓާގެޓްތަކާ ދިމާލަށް
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ