ރިވައިވަލް ސްޕޯޓްސް އިން މިހާރު ކުރިއަށްދާ އަކުއާސްޕްރިންގް ސައުތު އެފްރިކާ އިންޓަނޭޝަނަލް ބެޑްމިންޓަން މުބާރާތުގެ ފަސް ކުއާޓާ ފައިނަލެއްގައި ވާދަކުރަން ތައްޔާރުވެއްޖެ އެވެ.
ދެކުނު އެފްރިކާގެ މި މުބާރާތުގައި ރިވައިވަލް އިން ކުއާޓާ ފައިނަލުގައި ވާދަކުރާނީ، އަންހެން ސިންގަލްސް ދެ މެޗާއި އަންހެން ޑަބަލަސް، ފިރިހެން ޑަބަލްސް އަދި މިކްސް ޑަބަލްސްގަ އެވެ.
އެ ގޮތުން، އަންހެން ސިންގަލްސްގައި، އައިމިނަތު ނަބީހާ (ނަބީ) އަންހެން ސިންގަލްސްގެ ގަދަ 32 ކުޅުންތެރިންގެ ބުރުގައި، ދެކުނު އެފްރިކާގެ ތިއޮޑޯރާ އޮފްޓެންސްއާ އަތުން 21-04، 21-05 އިން މޮޅުވެ، ގަދަ 16 ބުރުގައި މޮރިޝަސްގެ ޝިއާރާ ހައު ހޮން އަތުން 21-09، 25-23 އިން މޮޅުވެ، ކުއާޓާ ފައިނަލަށް ދަތުރުކޮށްފަ އެވެ. ކުއާޓާގައި ކުޅޭނީ، ސައުދީ އަރަބިއްޔާގެ ހަދީޖާ ކައުސަރުއާ އެވެ.
އަންހެން ސިންގަލްސްގެ ގަދަ 16 ބުރުގައި، ފާތިމަތު ނަބާހާ (ނަބާ)، ވަނީ ދެކުނު އެފްރިކާގެ އަނިކާ ނެލް އަތުން 21-15، 21-10 އިން މޮޅުވެފަ އެވެ. އަދި، ކުއާޓާ ފައިނަލުގައި ކުޅޭނީ މޮރިޝަސްގެ ތިޔާ ބުރުތުންއާ ދެކޮޅަށެވެ. އަންހެން ޑަބަލްސްގައި ނަބާ އާއި ނަބީގެ ޕެއާ އިން، ކުއާޓާ ފައިނަލުގައި ބައްދަލުކުރާނީ ދެކުނު އެފްރިކާގެ ޑެބޯރާ ގޮޑްފްރޭ އާއި އަންރީ ޝޫންސްއާ އެވެ.
ފިރިހެން ޑަަބަލްސްގައި ޒަޔާން ޒަކީ އާއި ނިބާލްގެ ޕެއާ ބައްދަލުކުރީ ގަދަ 16 ބުރުގަ އެވެ. އެއީ، ދެކުނު އެފްރިކާގެ ޖޯހަން އޮބާހޯޒްލާ އާއި ރިޔާން އާމަންޑް ސްވާޓްގެ ޕެއާއާ އެވެ. އެ މެޗުން ޒަޔާން އާއި ނިބާލް މޮޅުވީ، 21-12، 21-13 އިންނެވެ. ކުއާޓާ ފައިނަލުގައި ޒަޔާން އާއި ނިބާލް ބައްދަލުކުރާނީ އޮސްޓްރޭލިއާގެ އަވިނާޝް ސްރިނިވާސް އާއި އެފްރައިމް ސްޓެފެންގެ ޕެއާއާ އެވެ.
އަދި، މިކްސް ޑަބަލްސްގައި، ޒަޔާން ޒަކީ އާއި ނަބާގެ ޕެއާ ބައްދަލުކުރާނީ ދެކުނު އެފްރިކާގެ ޖޯހަން ވެން ޓޮންޑާ އާއި ޓްވައިލާ ވެން ރީނަންގެ ޕެއާއާ އެވެ. ނަބާ އާއި ޒަޔާން، މި މެޗުން، 21-12، 21-11 އިން މޮޅުވެ، ކުއާޓާ ފައިނަލުގައި ބައްދަލުކުރާނީ، ދެކުނު އެފްރިކާގެ އެންތަނީ ފިލިޕްސް އާއި އަންރީ ޝޫނީސްއާ އެވެ.
ފިރިހެން ސިންގަލްސް އަށް ބަލާއިރު، ނިބާލް އާއި ޒަޔާން ވެސް ގަދަ 16 ބުރުގައި ކުޅުނެވެ. ނިބާލް ކުޅެން ޖެހުނީ މި މުބާރާތުގައި ދެ ވަނަ އަށް ސީޑުކޮށްފައިވާ ޕޯޗުގަލްގެ ބްރޫނޯ ކަވާލިއޯއާ އެވެ. އެ މެޗުން ކަވާލިއޯ މޮޅުވީ 21-18، 21-14 އިންނެވެ. ފިރިހެން ސިންގަލްސްގެ ގަދަ 32 ބުރުގައި، ޒަޔާން ވަނީ ސައުދީ އަރަބިއްޔާގެ އަބްދުލް އަޒީޒް މުގާވީއާ ދެކޮޅަށް ކުޅެ، 21-09، 21-15 އިން މޮޅުވެފަ އެވެ. އެކަމަކު، ގަދަ 16 ބުރުގައި، ޒަޔާން ވަނީ އިންޑިއާގެ ރަޖޭޝް ސްރިކާރު އަތުން 21-16، 21-15 އިން ބަލިވެފަ އެވެ.