ލަންކާގައި ތިބި ދިވެހީންނަށް ކާބޯތަކެތި ފޯރުކޮށްދީ، އެއާޕޯޓުގައި ތާށިވެފައިވާ މީހުންނަށް އެހީވަނީ

ސްރީ ލަންކާއަށް މިހާރު ކުރަމުންދާ ވިއްސާރައާ ގުޅިގެން, އެ ގައުމުގައި ތިބި، އެހީތެރިކަން ބޭނުންވެފައިވާ ދިވެހީންނަށް ފެނާއި ބައެއް އަސާސީ ކާބޯތަކެތި ފޯރުކޮށްދިނުމުގެ މަސައްކަތް ފަށައިފި ކަމަށް ލަންކާގައި ހުންނަ ދިވެހިރާއްޖޭގެ ހައި ކޮމިޝަނުން ބުނެފިއެވެ. ޕީއެސްއެމްއަށް މައުލޫމާތުދެމުން ލަންކާ ހައި ކޮމިޝަނުން ބުނީ، ފެންބޮޑުވުމުގެ ހާދިސާގައި އެހީތެރިކަން ބޭނުންވާ ފަރާތްތައް ރިޕޯޓުކުރުމަށް ކޯލް ސެންޓަރެއް ގާއިމުކޮށްފައިވާ ކަމަށެވެ. އަދި އެހީތެރިކަމަށް އެދޭ، ކާބޯތަކެތި ހޯދަން އުނދަގޫ ހިސާބުތަކުގައި ދިރިއުޅޭ ދިވެހިންނަށް ޒަރޫރީ ކާބޯތަކެއްޗާއި ފެން ފޯރުކުރުމުގެ މަސައްކަތް ކުރިއަށްގެންދާ ކަމަށް ކޮމިޝަނުން މައުލޫމާތުދިނެވެ. ލަންކާއަށް މިހާރު ކުރަމުންދާ ގަދަ ވިއްސާރައިގެ ސަބަބުން ވަރަށް ގިނަ މީހުން އެ ގައުމުގެ ބައިނަލްއަގްވާމީ އެއާޕޯޓްގައި ތާށިވެފައި އެބަތިއްބެވެ. އޭގެ ތެރޭގައި ރާއްޖެއަށް ފުރަން އުޅުނު ދިވެހީންވެސް ހިމެނެއެވެ. ދިވެހީންނަށް އެހީ ފޯރުކޮށްދޭން ފެށުން: ހައިކޮމިޝަނުން ވަނީ، އެހީ ބޭނުންވެފައިވާ ދިވެހީންނަށް ކާބޯތަކެތި ފޯރުކޮށްދެމުން އަންނަ ކަމަށް ބުނެފައި -- ފޮޓޯ/ ލަންކާގައި ހުންނަ ދިވެހި ހައިކޮމިޝަން ހައި ކޮމިޝަނުން ބުނީ މިހާރު އެ އެންމެންގެ ހާލު ގާތުން ބަލަމުންދާ ކަމަށެވެ. އަދި އެ މީހުންގެ ހާލަތު ދެނެގަނެ އެހީވުމުގެ މަސައްކަތް ފަށައިފައިވާ ކަމަށް ހައިކޮމިޝަނުން ބުންޏެވެ. ލަންކާއަށް މިހާރު ކުރަމުންދާ ވިއްސާރައިގައި 123 މީހުން މަރުވެ، 130 މީހުން ގެއްލިފައިވެއެވެ. އަދި މީހުން ދިރިއުޅެމުން އައި 15،000އަށް ވުރެ ގިނަ ގެ ހަލާކުވެ، 44،000އަށް ވުރެ ގިނަ މީހުންނަށް ވަނީ ވަގުތީ ހިޔާއަށް ބަދަލުވާން ޖެހިފައެވެ. ރާއްޖޭގެ މޫސުމާ ބެހޭ އިދާރާއިން ވަނީ، 'ޑިޓުވާ'ގެ ނަން ދީފައިވާ ތޫފާން މާދަމާގެ ހެނދުނުގެ ވަގުތެއްގައި އިންޑިއާގެ އުތުރުގެ ޓަމިލްނާޑޫ، ޕޫޑޫޗެރީ އަދި އަންދުރަ ޕްރަދޭޝްގެ ދެކުނު އައްސޭރިފަށަށް ޖެހޭނެ ކަމަށް ލަފާކޮށްފައެވެ. އެ ތުފާނާ ގުޅިގެން ރާއްޖެއަށް، ޚާއްސަކޮށް މެދުރާއްޖެ ތެރޭގެ އެކި ހިސާބުތަކަށާއި ދެކުނުގެ ބައެއް އަތޮޅުތަކަށް ވިއްސާކުރުމާއެކު ގުގުރާނެ ކަމަށް މެޓް އޮފީހުން ލަފާކުރެެއެވެ. ނަމަވެސް، ތޫފާން ދަތުރުކުރަނީ ރާއްޖެއާ ދުރަށް ކަމަށް އެ އިދާރާއިން ބުނެފައިވެއެވެ. https://sun.mv/214565 ލަންކާއަކީ ގިނަ އަދަދެއްގެ ދިވެހީން ދިރިއުޅޭ އަދި ބޭސްފަރުވާއަށާއި ކިޔެވުމަށާއި ޗުއްޓީ ހޭދަކުރަން ވެސް ދިވެހީން އާންމުކޮށް ގޮސް އުޅޭ ގައުމެކެވެ. އެހެންކަމުން ލަންކާގައި ހުންނަ ދިވެހި ރާއްޖޭގެ ހައި ކޮމިޝަނުން ވަނީ ލަންކާއަށް ކޮންމެހެން ކުރަންޖެހޭ ދަތުރުތައް ނޫން އެހެން ދަތުރުތައް ނުކުރުމަށް އެދިފައެވެ. އަދި ބިންތިރި ސަރަޙައްދާއި މޫދާއި ކޯރު ކައިރި ސަރަޙައްދުގައި ދިރިއުޅޭ މީހުން، ލަންކާގެ ކަމާ ގުޅުންހުރި އިދާރާތަކުން ދޭ އިންޒާރަށް ސަމާލުވެ، ރައްކާތެރި ހިސާބުތަކަށް ދިއުމަށް އަންގާފައެވެ. ލަންކާގައި ހުންނަ ރާއްޖޭގެ އެމްބަސީގެ ހޮޓްލައިން ނަންބަރަކީ, 09476991666 އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ